IPL 2026 / લીગમાં થઈ કેન વિલિયમસનની વાપસી, ફ્રેન્ચાઈઝીના માલિકે પોસ્ટ શેર કરી આપી જાણકારી
છેલ્લું અપડેટ : 16 Oct 2025
IPL 2026 માટેના મિની ઓક્શન પહેલા જ એક મોટી જાહેરાત થઈ છે. ન્યુઝીલેન્ડના પૂર્વ કેપ્ટન કેન વિલિયમસનની લીગમાં વાપસી થઈ છે. SRH અને GT ટીમનો ભાગ રહેલો કેન હવે એક નવી ટીમ સાથે જોડાયો છે. લખનૌ સુપર જાયન્ટ્સ (LSG) ના માલિક સંજીવ ગોએન્કાએ જાહેરાત કરી છે કે કેન વિલિયમસન IPL 2026 પહેલા ફ્રેન્ચાઈઝીમાં તેના નવા વ્યૂહાત્મક સલાહકાર (Strategic Advisor) તરીકે જોડાયો છે.
IPL 2025માં સાતમા સ્થાને રહેલ લખનૌ સુપર જાયન્ટ્સ (LSG) ટીમના પુનર્નિર્માણ પર ધ્યાન કેન્દ્રિત કરશે. વિશ્વ ક્રિકેટના કેટલાક મોટા નામો ટીમમાં હોવા છતાં, તેનું ગઈ સિઝનમાં નિરાશાજનક પ્રદર્શન રહ્યું હતું. ટીમમાં IPL ઈતિહાસના સૌથી મોંઘા ખેલાડી રિષભ પંતનો સમાવેશ થાય છે, જેને LSG દ્વારા 27 કરોડ રૂપિયામાં ખરીદવામાં આવ્યો હતો.
સંજીવ ગોએન્કાએ ટ્વિટ કર્યું, "અમે કેનનું સુપર જાયન્ટ્સ પરિવારમાં અને તેની નવી ભૂમિકામાં સ્વાગત કરીને ખુશ છીએ. તેનું નેતૃત્વ, આંતરિક વ્યૂહરચના, રમતની ઊંડી સમજ અને ખેલાડીઓને પ્રેરણા આપવાની ક્ષમતા તેને ટીમમાં એક મૂલ્યવાન ઉમેરો બનાવે છે." મીડિયા અહેવાલો અનુસાર, કેન વિલિયમસન ઝહીર ખાનનું સ્થાન લેશે, જેમણે ગયા સિઝનમાં મેન્ટર તરીકે સેવા આપી હતી.
35 વર્ષીય વિલિયમસન આંતરરાષ્ટ્રીય ક્રિકેટમાં એક્ટિવ છે, પરંતુ ફ્રેન્ચાઈઝી તક મેળવવા માટે તેણે ન્યુઝીલેન્ડના સેન્ટ્રલ કોન્ટ્રાક્ટમાંથી પોતાનું નામ પાછું ખેંચી લીધું છે. તેણે 93 T20 મેચમાં 2,575 રન, 105 ટેસ્ટ મેચમાં 9,276 રન અને 173 ODI મેચમાં 7,236 રન બનાવ્યા છે. વિલિયમસનને આધુનિક યુગના મહાન બેટ્સમેનોમાંથી એક ગણવામાં આવે છે.
IPLમાં, વિલિયમસને ઘણા વર્ષો સુધી સનરાઈઝર્સ હૈદરાબાદનું પ્રતિનિધિત્વ કર્યું હતું. 2018માં, તેણે ઓરેન્જ આર્મીને ફાઈનલમાં પહોંચાડી હતી. ત્યારબાદ, તે થોડા સમય માટે ગુજરાત ટાઈટન્સનો પણ ભાગ રહ્યો હતો. હવે, લખનૌમાં, તે ટીમને સફળતા તરફ દોરી જવા માટે કોચ જસ્ટિન લેંગર સાથે કામ કરશે.
