'ભારત માટે સમાપ્ત થશે ICC ટાઈટલનો દુષ્કાળ', વર્લ્ડ કપ ટ્રોફીના અનાવરણ સમયે કેપ્ટને કહી મોટી વાત
છેલ્લું અપડેટ : 11 Aug 2025
મહિલા ODI વર્લ્ડ કપ 2025 શરૂ થવામાં હવે 50 દિવસ બાકી છે. આ ટુર્નામેન્ટ શરૂ થાય તે પહેલા, 11 ઓગસ્ટના રોજ મુંબઈમાં વર્લ્ડ કપ ટ્રોફીનું અનાવરણ કરવામાં આવ્યું હતું. આ કાર્યક્રમમાં ICC પ્રમુખ જય શાહ, ભારતીય મહિલા ટીમના કેપ્ટન હરમનપ્રીત કૌર અને ભારતીય મેન્સ ટીમના ભૂતપૂર્વ અનુભવી યુવરાજ સિંહ અને અન્ય ઘણા ખેલાડીઓ હાજર રહ્યા હતા. આ ટ્રોફીના અનાવરણ પ્રસંગે, હરમનપ્રીત કૌરે ફેન્સ માટે હૃદયસ્પર્શી નિવેદન આપ્યું છે. તમને જણાવી દઈએ કે વર્લ્ડ કપ 30 સપ્ટેમ્બરથી શરૂ થશે અને ફાઈનલ મેચ 2 નવેમ્બરે રમાશે.
ટ્રોફી લોન્ચ કાર્યક્રમ દરમિયાન હરમનપ્રીત કૌરે મોટું નિવેદન આપ્યું
આ પ્રસંગે, હરમનપ્રીત કૌરે કહ્યું કે તે અને તેની ટીમ ICC મહિલા ODI વર્લ્ડ કપના દુષ્કાળને સમાપ્ત કરવા માટે સંપૂર્ણપણે તૈયાર છે. તેમની ટીમ આ ટુર્નામેન્ટ માટે સખત મહેનત કરી રહી છે. ટ્રોફી અનાવરણ કાર્યક્રમમાં હરમનપ્રીતે કહ્યું કે, "આ વખતે અમે ટ્રોફી જીતવાની રાહનો અંત લાવવા માંગીએ છીએ. વર્લ્ડ કપ હંમેશા ખાસ હોય છે, હું હંમેશા દેશ માટે કંઈક ખાસ કરવા માંગુ છું. જ્યારે પણ હું યુવરાજ ભૈયાને જોઉં છું, ત્યારે મને ઘણી પ્રેરણા મળે છે."
તે ઈનિંગે મારું જીવન બદલી નાખ્યું- હરમનપ્રીત કૌર
આ કાર્યક્રમ દરમિયાન હરમનપ્રીત કૌરે 2017 વર્લ્ડ કપની સેમીફાઈનલમાં ઓસ્ટ્રેલિયા સામે રમાયેલી 171 રનની ઈનિંગનો ઉલ્લેખ કર્યો. તેણે કહ્યું કે તે ઈનિંગ પછી ભારતમાં તેનું જે રીતે સ્વાગત કરવામાં આવ્યું તેનાથી તેને ગુઝબમ્પ્સ આવી ગયા હતા. હરમનપ્રીતે કહ્યું કે, "તે ઈનિંગ મારા અને સમગ્ર મહિલા ક્રિકેટ માટે ખાસ હતી. તે ઈનિંગ પછી મારા જીવનમાં મોટો ફેરફાર આવ્યો. જ્યારે અમે ભારત પાછા ફર્યા, ત્યારે ઘણા લોકો અમારી રાહ જોઈ રહ્યા હતા, અમને ઉત્સાહિત કરી રહ્યા હતા, ભલે અમે હારી ગયા પરંતુ તેઓએ અમને સપોર્ટ આપ્યો, આજે પણ તે વિશે વિચારીને મને ગુઝબમ્પ્સ આવી જાય છે."
ભારતીય મહિલા ટીમ 2005 અને 2017ના વર્લ્ડ કપની ફાઈનલમાં પહોંચી હતી
તમને જણાવી દઈએ કે ભારતીય ટીમ બે વખત વર્લ્ડ કપ જીતવાની નજીક પહોંચી છે, પરંતુ ફાઈનલ મેચોમાં હાર બાદ તેને ટુર્નામેન્ટમાંથી બહાર થવું પડ્યું હતું. ભારતીય મહિલા ટીમ 2005ના વર્લ્ડ કપમાં રનર-અપ રહી હતી, જેમાં તે ફાઈનલમાં ઓસ્ટ્રેલિયા સામે 98 રનથી હારી ગઈ હતી. આ પછી, ભારતીય ટીમ 2017ના ફાઈનલમાં પહોંચવામાં સફળ રહી, જેમાં તેઓ ફાઈનલમાં ઈંગ્લેન્ડ સામે 9 રનથી હારી ગઈ હતી.
