VIDEO: ગુજરાતની હાર બાદ પત્રકાર પર ભડક્યો ગ્લેન ફિલિપ્સ, ગુસ્સામાં કહ્યું- 'આ બહુ ખરાબ અને બકવાસ સવાલ છે'
છેલ્લું અપડેટ : 27 May 2026
IPL 2026ના રોમાંચક ક્વોલિફાયર-1માં રોયલ ચેલેન્જર્સ બેંગલુરુ (RCB) સામે ગુજરાત ટાઈટન્સ (GT) ને 92 રને કારમી હારનો સામનો કરવો પડ્યો છે. આ હાર બાદ આયોજિત પ્રેસ કોન્ફરન્સ દરમિયાન એક ચોંકાવનારી ઘટના સામે આવી છે. ગુજરાત ટાઈટન્સ તરફથી રમી રહેલો ન્યુઝીલેન્ડના સ્ટાર ઓલરાઉન્ડર ગ્લેન ફિલિપ્સ એક પત્રકારના સવાલ પર ખરાબ રીતે ગુસ્સે થઈ ગયો હતો. સવાલ સાંભળતા જ ફિલિપ્સે તીખી પ્રતિક્રિયા આપતા કહ્યું કે, "આ શું બકવાસ સવાલ છે?" હાલ આ ઘટનાનો વીડિયો સોશિયલ મીડિયા પર જોરદાર વાયરલ થઈ રહ્યો છે.
રજત પાટીદારના તોફાની 93 રન, RCBનો હિમાલય જેવો સ્કોર
ધર્મશાલાના રમણીય સ્ટેડિયમમાં રમાયેલી આ હાઈ-સ્ટેક મેચમાં ટોસ હારીને પહેલા બેટિંગ કરવા ઉતરેલી RCBની ટીમે નિર્ધારિત 20 ઓવરમાં 254 રનનો વિશાળ સ્કોર ખડકી દીધો હતો. ટીમ વતી રજત પાટીદારે માત્ર 33 બોલમાં અણનમ 93 રનની વિસ્ફોટક ઈનિંગ રમીને ગુજરાતના બોલર્સની લાઈન-લેન્થ બગાડી નાખી હતી. પોતાની આ ઇનિંગ દરમિયાન પાટીદારે ચોગ્ગા-છગ્ગાનો વરસાદ કર્યો હતો. આ ઉપરાંત વિરાટ કોહલી અને કૃણાલ પંડ્યાએ પણ ઉપયોગી યોગદાન આપીને ટીમને મજબૂત સ્થિતિમાં પહોંચાડી હતી.
રનના પહાડ નીચે દબાયું ગુજરાત ટાઈટન્સ
255 રનના કપરા લક્ષ્યાંકનો પીછો કરવા ઉતરેલી ગુજરાત ટાઈટન્સની શરૂઆત અત્યંત ખરાબ રહી હતી. ટીમે પાવરપ્લેથી જ નિયમિત અંતરે વિકેટો ગુમાવવાનું શરૂ કરી દીધું હતું. કેપ્ટન શુભમન ગિલ પણ આ મહત્ત્વની મેચમાં મોટી ઇનિંગ રમવામાં નિષ્ફળ રહ્યો હતો. મિડલ ઓર્ડરના બેટર્સ પણ ક્રીઝ પર ટકી નહતા શક્યા, પરિણામે આખી ટીમ 20 ઓવરમાં માત્ર 162 રન જ બનાવી શકી અને ગુજરાતે 92 રનથી મેચ ગુમાવવી પડી હતી.
સવાલ સાંભળીને કેમ ગુસ્સે થયા ગ્લેન ફિલિપ્સ?
મેચ પૂરી થયા બાદ ગુજરાત ટાઈટન્સ વતી ગ્લેન ફિલિપ્સ મીડિયાને સંબોધવા આવ્યો હતો. આ દરમિયાન એક રિપોર્ટરે તેને સવાલ પૂછ્યો કે, "શું 250થી વધુ રનના ટાર્ગેટના દબાણને કારણે ટીમની માનસિકતા પર અસર પડી હતી અને એટલે જ હાર થઈ?" આ સવાલ સાંભળતા જ ફિલિપ્સનો પારો ચડી ગયો હતો.
અમે દબાણથી ડરીએ તેવા ખેલાડી નથી: ગ્લેન ફિલિપ્સ
રિપોર્ટરને રોકતા ગ્લેન ફિલિપ્સે રોષે ભરાઈને કહ્યું, “આ બહુ ખરાબ અને બકવાસ સવાલ છે. કોઈ પણ એવું વિચારીને નથી જતું કે ‘તમને ખબર છે કે અમે પહેલેથી જ હાર માની લીધી છે?’ અમે પ્રોફેશનલ ક્રિકેટર્સ છીએ. જો અમે દબાણથી આટલા ડરી જતા હોત, તો ક્યારેય આ સ્તર સુધી પહોંચી જ ન શક્યા હોત. અમે હંમેશા દરેક મેચ જીતવાના મક્કમ ઈરાદા સાથે જ મેદાનમાં ઉતરીએ છીએ."
તેણે વધુમાં ઉમેર્યું કે, "T20 ક્રિકેટ અનિશ્ચિતતાઓથી ભરેલું છે અને અહીં કંઈપણ શક્ય છે. અમને છેલ્લી ઘડી સુધી વિશ્વાસ હતો કે અમે આ લક્ષ્યાંક પ્રાપ્ત કરી શકીએ છીએ, પરંતુ પાવરપ્લેમાં જ શરૂઆતની વિકેટો પડી જવાને કારણે અમે મેચમાં વાપસી ન કરી શક્યા.”
રન ચેઝ કરવા અંગે ગ્લેન ફિલિપ્સે કહ્યું કે, “જ્યારે તમે 250 રનનો પીછો કરવા મેદાનમાં ઉતરો છો ત્યારે સ્કોરબોર્ડનું દબાણ ખૂબ વધારે હોય છે. બહુ ઓછી ટીમોએ આવું કર્યું છે. તમે પણ જાણતા હશો કે પંજાબ કિંગ્સે કેટલીક વખત આવું કરીને બતાવ્યું છે અને તે ખરેખર શાનદાર રહ્યું છે. હું હજી સુધી એવી કોઈ ટીમનો ભાગ બન્યો નથી જે 250 રનની આસપાસના સ્કોર સુધી પણ પહોંચી હોય. તમે પણ જાણો છો કે 250નો સ્કોર ક્યારેક જ જોવા મળે છે.”
એક રિપોર્ટરે તેમને પૂછ્યું કે મેચ ન રમવા છતાં મીડિયા સાથે વાત કરવી અજીબ નથી લાગતી? આ સવાલના જવાબમાં ગ્લેન ફિલિપ્સે કહ્યું કે, “ના, બિલકુલ નહીં. અમે બધા ટીમનો એક ભાગ છીએ. મીડિયા સામે અમારી દરેકની પોતાની એક જવાબદારી હોય છે. મને લાગે છે કે ઘણી વખત એવા ખેલાડીનો નજરિયો ખૂબ કામ આવે છે, જે મેચ ન રમી રહ્યો હોય. હવે જ્યારે અમે ક્વોલિફાયર-2 મેચ રમવા જઈ રહ્યા છીએ ત્યારે આ બાબત ખૂબ ઉપયોગી સાબિત થઈ શકે છે. અમે અત્યાર સુધી ખૂબ સારું ક્રિકેટ રમ્યા છીએ. અત્યાર સુધી મેદાનમાં ઉતરેલા દરેક ખેલાડીએ હવે આગામી મેચ માટે તૈયારી કરવાની છે. આશિષ નેહરા હંમેશાં કહે છે, ‘ચિલ પિલ.’”
RCB ફાઈનલમાં, ગુજરાત માટે હજુ એક તક બાકી
આ શાનદાર અને પ્રચંડ જીત સાથે રોયલ ચેલેન્જર્સ બેંગલુરુએ IPL 2026ની ફાઈનલમાં સત્તાવાર રીતે એન્ટ્રી કરી લીધી છે, જેને પગલે સોશિયલ મીડિયા પર RCBના ફેન્સ જશ્ન મનાવી રહ્યા છે. બીજી તરફ, ક્વોલિફાયર-1 ગુમાવ્યા બાદ પણ ગુજરાત ટાઇટન્સની સફર સદંતર સમાપ્ત નથી થઈ. ટુર્નામેન્ટમાં ટકી રહેવા માટે હવે તેમણે ક્વોલિફાયર-2 મેચ જીતવાની આશા પર નજર રાખવી પડશે.