રોહિત-કોહલીના ભવિષ્યથી લઈને સૂર્યાને કેપ્ટન બનાવવા સુધી, હેડ કોચ ગૌતમ ગભીરે આપ્યા દરેક સવાલોના જવાબ

ટીમ ઈન્ડિયાના નવા હેડ કોચ ગૌતમ ગંભીરે શ્રીલંકા પ્રવાસ પર રવાના થતા પહેલા પોતાની પ્રથમ પ્રેસ કોન્ફરન્સમાં ઘણા મોટા નિવેદન આપ્યા છે. આ દરમિયાન BCCIના ચીફ સિલેક્ટર અજીત અગરકર પણ તેમની સાથે સવાલોના જવાબ આપતા જોવા મળ્યા હતા. દરેકના મનમાં સૌથી મોટો પ્રશ્ન એ હતો કે હાર્દિક પંડ્યાની જગ્યાએ સૂર્યકુમાર યાદવને T20 ટીમનો કેપ્ટન કેમ બનાવવામાં આવ્યો છે. ચીફ સિલેક્ટર અજીત અગરકરે તેની પાછળનું સૌથી મોટું કારણ જણાવ્યું છે.

આ કારણોસર પંડ્યાને કેપ્ટન બનાવવામાં આવ્યો ન હતો

પ્રેસ કોન્ફરન્સમાં T20 ટીમના નવા કેપ્ટન વિશે વાત કરતા અજીત અગરકરે કહ્યું કે, સૂર્યકુમાર યાદવ એક સારો વિકલ્પ છે. તેણે પોતાની પ્રતિભા બતાવી છે. તે જ સમયે, હાર્દિક અમારા માટે મહત્ત્વપૂર્ણ ખેલાડી છે. તેમના જેવી પ્રતિભા શોધવી મુશ્કેલ છે. પરંતુ છેલ્લા 2 વર્ષમાં તેની ફિટનેસ એક મોટો પડકાર છે. આવી સ્થિતિમાં, અમે કેપ્ટન તરીકે એવો ખેલાડી ઈચ્છતા હતા જે હંમેશા ઉપલબ્ધ હોય અને પોતાની ભૂમિકા સારી રીતે નિભાવી શકે. સૂર્યામાં તે બધા ગુણો છે.

વિરાટ કોહલી અને રોહિત શર્માના ભવિષ્ય પર ગંભીર

વિરાટ કોહલી અને રોહિત શર્માના ભવિષ્ય વિશે વાત કરતા ગૌતમ ગંભીરે કહ્યું, "તેઓએ બતાવ્યું છે કે તેઓ મોટા મંચ પર શું કરી શકે છે. હજુ પણ બંનેમાં ઘણું ક્રિકેટ બાકી છે. ચેમ્પિયન્સ ટ્રોફી તો શું જો તેઓ પોતાની ફિટનેસ જાળવી રાખે તો તેઓ 2027નો વર્લ્ડ કપ પણ જીતી શકે છે. તેઓ શું કરી શકે છે તે જોતાં, તેઓ હજુ પણ વર્લ્ડ ક્લાસ પ્લેયર છે અને કોઈપણ ટીમ આ બંનેને રાખવા માંગે છે."

ગંભીરે રવિન્દ્ર જાડેજા વિશે શું કહ્યું?

ગૌતમ ગંભીરે કહ્યું, "આ નાની સિરીઝ માટે તેને અને અક્ષરને લેવાનું નકામું હતું. તેમાંથી કોઈ પણ ત્રણેય મેચ રમવા માટે સક્ષમ નથી. ટેસ્ટની મોટી સિઝન આવી રહી હોવાથી તે ઘણી બધી મેચોમાં રમવા માટે તૈયાર છે. તેને બહાર નથી કરવામાં આવ્યો, તે ખૂબ જ મહત્ત્વપૂર્ણ છે."

સૂર્યકુમારની ODI ટીમમાંથી છૂટી?

બીજી તરફ, સૂર્યકુમાર યાદવને આ પ્રવાસ પર ODI ટીમનો ભાગ બનાવવામાં આવ્યો નથી. આ પાછળનું કારણ જણાવતા અજીત અગરકરે કહ્યું કે, અમે ODIમાં સૂર્યા વિશે ચર્ચા કરી નથી. શ્રેયસ અય્યર અને કેએલ રાહુલ વનડે ટીમમાં પાછા ફર્યા છે. આ બંને ખેલાડીઓએ વર્લ્ડ કપમાં શાનદાર પ્રદર્શન કર્યું હતું. રિષભ પંત પણ ટીમમાં આવ્યો છે. તેથી સૂર્યકુમાર યાદવ હાલમાં T20માં રહેશે."

અજિત અગરકરે વધુમાં કહ્યું કે, "રિષભ લાંબા સમયથી બહાર હતો. તેથી, અમે તેમના પર કોઈ બોજ નાખ્યા વિના તેમને પાછો લાવવા માંગીએ છીએ. જે વ્યક્તિ લાંબા સમય પછી પાછો આવ્યો છે, તમારે તેને ધીમે ધીમે પાછા લાવવાની જરૂર છે." શુભમન ગિલ તમામ ફોર્મેટનો ખેલાડી છે, અમે તેને તે રીતે જોઈએ છીએ. અજીત અગરકરે પોતાના નિવેદન સાથે સ્પષ્ટ કર્યું છે કે શુભમન ગિલ હવે ત્રણેય ફોર્મેટમાં સતત રમતો જોવા મળી શકે છે. તેને ઝિમ્બાબ્વે પ્રવાસ પર T20 ટીમનો કેપ્ટન પણ બનાવવામાં આવ્યો હતો. તે જ સમયે, હવે તે ODI અને T20 ટીમનો વાઈસ કેપ્ટન પણ છે.

યુવા ખેલાડીઓને સ્થાન ન મળવા પર અગરકરે કહ્યું

અજિત અગરકરે કહ્યું, "તમારે જોવું પડશે કે તેમની આગળ કોની પસંદગી કરવામાં આવી છે. આ તબક્કે અમને ઝિમ્બાબ્વેમાં કેટલાક ખેલાડીઓને રમાડવાની તક મળી હતી. અમારી પાસે ડેપ્થ છે. રિંકુ T20 વર્લ્ડ કપમાં કોઈ ભૂલ વગર ચૂકી ગયો, ક્યારેક એવું પણ બને છે. તે બધાને 15માં ફિટ કરવા મુશ્કેલ છે. આવું દરેક ખેલાડી સાથે થાય છે. તે મુશ્કેલ છે પરંતુ આ વાસ્તવિકતા છે."

ગૌતમ ગંભીરે સપોર્ટ સ્ટાફ પરથી પડદો ઉઠાવ્યો

ગંભીરે સહાયક કોચ તરીકે અભિષેક નાયર અને રેયાન ટેન ડોશેટની નિમણૂકની પુષ્ટિ કરી છે. તેણે એ પણ માહિતી આપી કે સાઈરાજ બહુતુલે અને ટી દિલીપ સપોર્ટ સ્ટાફ તરીકે ટીમ સાથે શ્રીલંકા જશે.

શું ભારત ભવિષ્યમાં ત્રણ અલગ-અલગ ટીમો સાથે રમશે?

ગૌતમ ગંભીરે કહ્યું, "આ વસ્તુઓ ભવિષ્યમાં બનતી રહેશે. અત્યારે એવું કહી શકાય નહીં કે ત્રણ અલગ-અલગ ટીમ હશે. રોહિત શર્મા, વિરાટ કોહલી અને રવિન્દ્ર જાડેજા જેવા વર્લ્ડ ક્લાસ ખેલાડીઓની નિવૃત્તિ સાથે T20માં ફેરફાર થશે. જેટલા વધુ ખેલાડીઓ તમામ ફોર્મેટમાં રમી શકે તેટલા વધુ સારા."

અજિત અગરકરે કહ્યું, "તે જ રીતે, જો તમારી પાસે એવા ખેલાડીઓ હોય જે તમામ ફોર્મેટમાં રમી શકે, તો તે ખૂબ સારું છે."

ગંભીરને ટીમનો સાથ જોઈએ છે

ગૌતમ ગંભીરે કહ્યું, "સૌથી મહત્ત્વની વાત એ છે કે ટીમ હંમેશા મને સપોર્ટ કરે. મારો ઉદ્દેશ્ય ડ્રેસિંગ રૂમને સુખદ અને સુરક્ષિત બનાવવાનો છે. હું ખૂબ જ સફળ ટીમની જવાબદારી સંભાળવા જઈ રહ્યો છું. જેઓ T20 વર્લ્ડ કપમાં વિજેતા તેમજ વર્લ્ડ ટેસ્ટ ચેમ્પિયનશિપ અને 50 ઓવરનો વર્લ્ડ કપમાં રનર-અપ રહ્યા છે. આ મોટા પદની જવાબદારી નિભાવવા માટે ઉત્સુક છું."

મોહમ્મદ શમીના કમબેક પર અજીત અગરકર

અજીત અગરકરે કહ્યું, "મોહમ્મદ શમીએ બોલિંગ શરૂ કરી છે જે એક સારો સંકેત છે. પ્રથમ ટેસ્ટ 19 સપ્ટેમ્બરના રોજ છે. મને ખબર નથી કે તેની રિકવરી ટાઈમલાઈન શું છે, તે વિશે NCAના લોકોને પૂછવું પડશે."

ગૌતમ ગંભીરે તેના કોચિંગ અભિગમ પર શું કહ્યું?

ગૌતમ ગંભીરે કહ્યું, "તમે જીતવા માટે રમો છો. અમે નિષ્પક્ષ રમવાની કોશિશ કરીએ છીએ, સખત મહેનત કરીએ છીએ અને જીત સાથે ડ્રેસિંગ રૂમમાં પાછા ફરીએ છીએ. વસ્તુઓને જટિલ નહીં બનાવીએ. આ ખેલાડીઓની ટીમ છે, સપોર્ટ સ્ટાફ એટલું જ કરી શકે છે. માત્ર 15 ખેલાડીઓ જ રમી શકશે. સપોર્ટ સ્ટાફનું કામ ખેલાડીઓને ખુશ રાખવાનું છે અને અમે તેના માટે કામ કરીશું."

વિરાટ કોહલી સાથેના સંબંધો પર ગંભીર

ગૌતમ ગંભીરે કહ્યું, "તે ટીઆરપી માટે શાનદાર છે, પરંતુ તેની સાથે મારો સંબંધ સાર્વજનિક નથી. મેદાન પર દરેક જણ તેની ટીમ માટે લડશે. અત્યારે અમે ભારતનું પ્રતિનિધિત્વ કરી રહ્યા છીએ. મારી અને તેની વચ્ચે ઘણો સારો સંબંધ છે. મને તેની સાથે વાત કરવાની ઘણી તક મળી છે. તે મહત્ત્વનું નથી કે અમે શું ચર્ચા કરીએ છીએ. સૌથી મહત્ત્વની વાત એ છે કે અમે બંનેએ ભારતને ગૌરવ અપાવવા માટે સખત મહેનત કરવી પડશે. તે એકદમ પ્રોફેશનલ અને વર્લ્ડ ક્લાસ પ્લેયર છે."