VIDEO: હવલદાર બનવાના સપનાથી સિલ્વર મેડલ સુધી: કોમનવેલ્થ ગેમ્સમાં ખેડૂત પુત્રએ રચ્યો અકલ્પનીય ઈતિહાસ
છેલ્લું અપડેટ : 29 Jul 2026
ગ્લાસગો કોમનવેલ્થ ગેમ્સ 2026માં ભારતના સ્ટાર એથલીટ ગુલવીર સિંહે પુરુષોની 10,000 મીટર રેસમાં શાનદાર પ્રદર્શન કરતા સિલ્વર મેડલ પોતાના નામે કરી લીધો. એશિયન ગેમ્સના બ્રોન્ઝ મેડલ વિજેતા ગુલવીરની આ સફર કોઈ ફિલ્મી સ્ક્રિપ્ટથી ઓછી નથી, જ્યાં ક્યારેક તેમનું સ્વપ્ન માત્ર ભારતીય સેનામાં પ્રમોશન મેળવવાનું હતું અને આજે તેઓ ઇન્ટરનેશનલ લેવલ પર દેશનો ત્રિરંગો લહેરાવી રહ્યા છે. તેમણે 27:49.78 નો શાનદાર સમય કાઢીને સિલ્વર મેડલ જીત્યો છે, જે કોમનવેલ્થ ગેમ્સની 10,000 મીટર રેસમાં ભારતનો પહેલો મેડલ પણ છે.
અલીગઢના ખેડૂત પરિવારમાંથી નીકળેલો સિતારો
ગુલવીર સિંહનો જન્મ 1 જૂન 1998ના રોજ ઉત્તર પ્રદેશના અલીગઢ જિલ્લાના સિરસા ગામમાં એક સામાન્ય ખેડૂત પરિવારમાં થયો હતો. દેશસેવાની સમૃદ્ધ પરંપરા ધરાવતા ગામમાં ઉછરેલા ગુલવીરે શરૂઆતમાં ક્યારેય એથ્લેટિક્સને વ્યાવસાયિક કરિયર બનાવવા વિશે વિચાર્યું નહોતું. તેઓ ગામના કાચા રસ્તાઓ અને સડકો પર માત્ર એટલા માટે દોડતા હતા જેથી ભારતીય સેનાની ભરતી પરીક્ષા પાસ કરી શકે. તેમની આ મહેનત વર્ષ 2018માં રંગ લાવી અને તેઓ ભારતીય સેનાની 23 ગ્રેનેડિયર્સ યુનિટમાં સિપાઈ તરીકે ભરતી થઈ ગયા.
સેનામાં સામેલ થતી વખતે ગુલવીરનો ઈરાદો બસ એટલો જ હતો કે તેઓ ટ્રેક એન્ડ ફીલ્ડ દ્વારા હવાલદારના પદ સુધી પ્રમોશન મેળવી શકે. જોકે, વર્ષ 2019માં અરુણાચલ પ્રદેશમાં તેમની તૈનાતી દરમિયાન તેમણે પહેલીવાર ઇન્ટર-યુનિટ ક્રોસ-કંટ્રી રેસમાં ભાગ લીધો અને તેને જીતી લીધી. આ રેસમાં તેમના પ્રદર્શને પુણે સ્થિત આર્મી સ્પોર્ટ્સ ઇન્સ્ટિટ્યૂટ (ASI)ના લોંગ-ડિસ્ટન્સ રનિંગ પ્રોગ્રામના કોચ યુનુસ ખાનનું ધ્યાન ખેંચ્યું.
આર્મી સ્પોર્ટ્સ ઇન્સ્ટિટ્યૂટ અને ટ્રેક રનિંગની સફર
કોચ યુનુસ ખાન તે જ વર્ષે ગુલવીરને પુણે લઈ આવ્યા, જ્યાં તેમને પહેલીવાર પ્રોફેશનલ અને ઔપચારિક કોચિંગ મળ્યું. આ પછી વર્ષ 2021માં અન્ય એક ઇન્ટર-યુનિટ રેસ જીત્યા બાદ ગુલવીર ટ્રેક રનિંગ માટે સંપૂર્ણ રીતે તૈયાર થઈ ગયા. છેલ્લા 7 વર્ષની સખત મહેનતના દમ પર ગુલવીરે નેશનલ અને ઇન્ટરનેશનલ સ્તર પર ઘણા મેડલ પોતાના નામે કર્યા છે. હવે કોમનવેલ્થ ગેમ્સમાં પણ તેમણે ભારતનું નામ રોશન કરી દીધું છે.
