ENG vs SL: ડ્રેસિંગ રૂમમાં આગ લાગતા શ્રીલંકાની ટીમને તણાવપૂર્ણ માહોલમાંથી બહાર કાઢવામાં આવી! જાણો સમગ્ર મામલો

ઈંગ્લેન્ડ અને શ્રીલંકા વચ્ચેની ટેસ્ટ સીરિઝ હજુ શરૂ પણ થઈ ન હતી, પરંતુ આ સીરિઝ તેના પહેલા જ સમાચારોમાં છે. વાસ્તવમાં, આ સીરિઝની પહેલી મેચ 21મી ઓગસ્ટે એટલે કે આજે ઓલ્ડ ટ્રેફર્ડ સ્ટેડિયમમાં રમાવાની છે, પરંતુ તે પહેલા પ્રેક્ટિસ સેશન દરમિયાન એક વિચિત્ર ઘટના બની. એક મીડિયા રિપોર્ટ અનુસાર, ડ્રેસિંગ રૂમમાં ફાયર એલાર્મ વાગવાને કારણે શ્રીલંકાની ટીમને ડ્રેસિંગ રૂમની બહાર કાઢવામાં આવી હતી.

ફાયર એલાર્મ ત્યારે વાગે જ્યારે નજીકમાં આગ લાગી હોય. સારી વાત એ છે કે, શ્રીલંકન ટીમના ડ્રેસિંગ રૂમમાં આગ લાગવાના સમાચાર ખોટા નીકળ્યા. વાસ્તવમાં આ એક ફોલ્સ એલાર્મ હતો તેથી ટીમ 15 મિનિટ બાદ ડ્રેસિંગ રૂમમાં પરત ફરી હતી, પરંતુ એલાર્મ વાગવાને કારણે થોડી વાર માટે તણાવનું વાતાવરણ સર્જાયું હતું.

શ્રીલંકા પાસે છે સુવર્ણ તક

ઉલ્લેખનીય છે કે, બેન સ્ટોક્સ અને જેક ક્રોલી શ્રીલંકા સામેની ત્રણ ટેસ્ટ મેચની સીરિઝમાં નથી રમી રહ્યા. આવી સ્થિતિમાં, મુલાકાતી ટીમ પાસે 2014 પછી ઇંગ્લેન્ડમાં રમી રહેલી તેની માત્ર બીજી ટેસ્ટ સીરિઝ જીતવાની તક છે. 2014માં શ્રીલંકાએ ટેસ્ટ સીરિઝમાં ઈંગ્લેન્ડની ટીમને 1-0થી હરાવ્યું હતું અને હાલમાં ધનંજય ડી. સિલ્વાની કપ્તાનીમાં આ એશિયન ટીમ ખૂબ જ સારા ફોર્મમાં જોવા મળી રહી છે.

ઉલ્લેખનીય છે કે, ઈંગ્લેન્ડ વિરુદ્ધ 21 ઓગસ્ટથી શરૂ થઈ રહેલી ટેસ્ટ સીરિઝ પહેલા શ્રીલંકાએ ઈંગ્લેન્ડ લાયન્સ વિરુદ્ધ 4 દિવસની પ્રેક્ટિસ મેચ રમી હતી, જેમાં શ્રીલંકાને 7 વિકેટથી કારમી હારનો સામનો કરવો પડ્યો હતો. તે હારનું કારણ જણાવતા કેપ્ટન ડી સિલ્વાએ કહ્યું કે, તેને અંગ્રેજી વાતાવરણમાં એડજસ્ટ થવા માટે વધુ એક પ્રેક્ટિસ મેચની જરૂર હતી, પરંતુ તેની માગને ફગાવી દેવામાં આવી હતી. વેલ, હવે બંને ટીમો વચ્ચે 21 ઓગસ્ટ એટલે કે આજથી ટેસ્ટ સીરિઝ શરૂ થવા જઈ રહી છે.