IND vs ENG / T20 સિરીઝ માટે ઈંગ્લેન્ડે જાહેર કરી સ્કવોડ, આ ખેલાડીને પહેલી વખત મળ્યું સ્થાન
છેલ્લું અપડેટ : 23 Jun 2026
ભારત અને ઈંગ્લેન્ડ વચ્ચે રમાનારી આગામી મર્યાદિત ઓવર્સની સિરીઝ માટે ઈંગ્લેન્ડ ક્રિકેટ બોર્ડે પોતાની 17 સભ્યોની મજબૂત ટીમની જાહેરાત કરી દીધી છે. બંને દેશો વચ્ચે 5 મેચોની રોમાંચક T20 સિરીઝનો પ્રારંભ 1 જુલાઈથી થવા જઈ રહ્યો છે. સિરીઝનો પ્રથમ મુકાબલો ચેસ્ટર-લે-સ્ટ્રીટમાં રમાશે, જ્યારે અંતિમ મેચ 11 જુલાઈએ સાઉથહેમ્પ્ટનમાં યોજાશે. ક્રિકેટ ફેન્સ માટે આ સિરીઝ એટલા માટે પણ ખાસ રહેશે કારણ કે આમાં ભારતના 15 વર્ષીય યુવા સેન્સેશન બેટર વૈભવ સૂર્યવંશી પર સૌની નજર ટકેલી રહેશે.
હેરી બ્રૂકના હાથમાં કમાન, જેમ્સ કોલ્સ નવું આકર્ષણ
ભારત સામેની આ મહત્ત્વપૂર્ણ T20 સિરીઝમાં ઈંગ્લેન્ડ ટીમની કપ્તાની સ્ટાર બેટર હેરી બ્રૂકને સોંપવામાં આવી છે. જોકે બ્રૂકને ન્યુઝીલેન્ડ સામેની ટેસ્ટ સિરીઝ માટે કેપ્ટન નહતો બનાવવામાં આવ્યો, પરંતુ વાઇટ-બોલ ક્રિકેટમાં પસંદગીકારોએ તેના નેતૃત્વ પર ફરી એકવાર ભરોસો મૂક્યો છે.
આ સ્ક્વોડમાં સૌથી મોટું અને ચોંકાવનારું નામ 22 વર્ષીય ઓલરાઉન્ડર જેમ્સ કોલ્સનું છે, જેને પ્રથમ વખત રાષ્ટ્રીય ટીમમાં સ્થાન મળ્યું છે. સસેક્સ વતી રમતા આ યુવા ખેલાડીએ ઘરેલું ક્રિકેટમાં સળંગ શાનદાર પ્રદર્શન કરીને સિલેક્ટર્સનું ધ્યાન ખેંચ્યું હતું. કોલ્સ તાજેતરમાં ત્યારે ભારે ચર્ચામાં આવ્યો હતો જ્યારે તેણે કાઉન્ટી ચેમ્પિયનશિપમાં ગ્લેમોર્ગન સામે અણનમ 224 રનની આક્રમક ઈનિંગ રમી હતી, જે તેના ફર્સ્ટ-ક્લાસ કરિયરનો સર્વોચ્ચ સ્કોર છે. આ ઉપરાંત ગત સિઝનની T20 બ્લાસ્ટ ટુર્નામેન્ટમાં પણ તેણે બેટ અને બોલ બંને વડે ઓલરાઉન્ડ કમાલ કરી બતાવી હતી. ઇન્ટરનેશનલ ક્રિકેટ કાઉન્સિલ (ICC) એ પણ સોશિયલ મીડિયા પર પોસ્ટ શેર કરીને ઈંગ્લેન્ડના આ અનકેપ્ડ યુવા સ્ટારના સિલેક્શનને બિરદાવ્યું છે.
મોટા ખેલાડીઓ ઈજાગ્રસ્ત, આ સ્ટાર્સની થઈ વાપસી
ICC મેન્સ T20 વર્લ્ડ કપ 2026ની સેમીફાઈનલમાં ભારત સામે શાનદાર રમત રમનાર ઓપનર બેન ડકેટને આ સિરીઝમાંથી આરામ આપવામાં આવ્યો છે અથવા ડ્રોપ કરાયો છે. બીજી તરફ, જોર્ડન કોક્સ, સોની બેકર અને ફાસ્ટ બોલર સાકિબ મહમૂદની ટીમમાં વાપસી થઈ છે.
હાલમાં ઈંગ્લેન્ડની ટીમ ઈજાઓની ગંભીર સમસ્યા સામે ઝઝૂમી રહી છે. ફાસ્ટ બોલર બ્રાયડન કાર્સ અને પ્રભાવશાળી ઓલરાઉન્ડર જેમી ઓવર્ટન ફિટનેસના કારણે પસંદગી માટે ઉપલબ્ધ નહતા. આ જ કારણસર પસંદગીકારોએ સાવચેતીના ભાગરૂપે અપેક્ષા કરતાં થોડી મોટી સ્ક્વોડ જાહેર કરી છે. ઈંગ્લેન્ડના મુખ્ય પસંદગીકાર માર્કસ નોર્થે જણાવ્યું હતું કે, "ન્યુઝીલેન્ડ સામેની ટેસ્ટ સિરીઝ પૂરી થતાં જ ભારત સામેની સિરીઝ શરૂ થઈ રહી હોવાથી ખેલાડીઓનો વર્કલોડ મેનેજ કરવો જરૂરી હતો. જેમ્સ કોલ્સે પોતાની મહેનતથી આ સ્થાન મેળવ્યું છે અને ટીમમાં વધારાના વિકલ્પો હોવા અત્યંત અનિવાર્ય છે."
ઈંગ્લેન્ડની 17 સભ્યોની સત્તાવાર T20 ટીમ
હેરી બ્રૂક (કપ્તાન), રેહાન અહમદ, જોફ્રા આર્ચર, સોની બેકર, ટોમ બેન્ટન, જેકબ બેથેલ, જોશ બટલર, જેમ્સ કોલ્સ, જોર્ડન કોક્સ, સેમ કરન, લિયમ ડોસન, વિલ જેક્સ, સાકિબ મહમૂદ, આદિલ રશીદ, ફિલ સોલ્ટ, જોશ ટંગ, લ્યુક વુડ
ભારત vs ઈંગ્લેન્ડ: સંપૂર્ણ શિડ્યુઅલ (T20I & ODI)
- 1 July - પ્રથમ T20 મેચ - ચેસ્ટર-લે-સ્ટ્રીટ
- 4 July - બીજી T20 મેચ - માન્ચેસ્ટર
- 7 July - ત્રીજી T20 મેચ - નોટિંગહામ
- 9 July - ચોથી T20 મેચ - બ્રિસ્ટલ
- 11 July - પાંચમી T20 મેચ - સાઉથહેમ્પ્ટન
- 14 July - પ્રથમ વનડે (ODI) - બર્મિંગહામ
- 16 July - બીજી વનડે (ODI) - કાર્ડિફ
- 19 July - ત્રીજી વનડે (ODI) - લોર્ડ્સ
