US Open 2024માં સર્જાયો મોટો અપસેટ, વર્લ્ડ રેન્કિંગમાં નંબર 74ના ખેલાડી સામે હાર્યો વિમ્બલ્ડન ચેમ્પિયન કાર્લોસ અલ્કારાઝ

અમેરિકામાં ચાલી રહેલા યુએસ ઓપનના મેન્સ સિંગલ રાઉન્ડમાં 30 ઓગસ્ટની સવારે મોટો અપસેટ સર્જાયો હતો. હાલમાં જ પેરિસ ઓલિમ્પિકમાં સિલ્વર મેડલ જીતનાર અને આ વર્ષે વિમ્બલ્ડન ટાઈટલ જીતનાર વિશ્વનો નંબર 3 ખેલાડી કાર્લોસ અલ્કારાઝ બીજા રાઉન્ડમાં બહાર થઈ ગયો હતો. તેને વર્લ્ડ રેન્કિંગમાં 74મા નંબરના ખેલાડી નેધરલેન્ડના બોટિક વાન ડી ઝેન્ડસ્કેલ્પ સામે સીધા ત્રણ સેટમાં હારનો સામનો કરવો પડ્યો હતો. કાર્લોસને એક પણ વખત મેચમાં કમબેક કરવાની તક ન મળી. આ સાથે ગ્રાન્ડ સ્લેમમાં છેલ્લી 15 મેચોથી ચાલી રહેલી તેમની જીતનો સિલસિલો પણ આ મેચમાં હાર સાથે તૂટી ગયો હતો.

2 કલાક 19 મિનિટ સુધી ચાલી મેચ

યુએસ ઓપનમાં કાર્લોસ અલ્કારાઝ અને વાન ડી ઝેન્ડસ્કલ્પ વચ્ચે રમાયેલી બીજા રાઉન્ડની મેચની વાત કરીએ તો તે 2 કલાક 19 મિનિટ સુધી ચાલી હતી. આ મેચના પ્રથમ સેટમાં ઝેન્ડસ્કલ્પે અલ્કારાઝને 6-1થી હરાવ્યો હતો જ્યારે બીજા સેટમાં વર્લ્ડ નંબર 3 ખેલાડીએ વાપસી કરવાનો પ્રયાસ કર્યો હતો પરંતુ તેમાં પણ તે 7-5થી હારી ગયો હતો. હવે, સતત બે સેટ ગુમાવ્યા બાદ, અલકારાઝ પર હારનો ખતરો તોળાઈ રહ્યો હતો અને તેનું પ્રેશર તેના પર પણ દેખાઈ રહ્યું હતું, જેમાં તે ત્રીજા સેટમાં સારું રમ્યો હતો પરંતુ આમાં પણ તેને 6-4થી હારનો સામનો કરવો પડ્યો હતો.

1991માં યુએસ ઓપનમાં પ્રથમ વખત આવું બન્યું હતું

યુએસ ઓપનના ઈતિહાસમાં વાન ડી ઝેન્ડસ્કલ્પ 1991 પછી નેધરલેન્ડનો પ્રથમ ખેલાડી બન્યો છે જેણે વર્લ્ડ ટોપ-3માં સ્થાન મેળવનાર ખેલાડીને હરાવ્યો છે. પોતાની ઐતિહાસિક જીત બાદ વેન ડી ઝંડસ્કલ્પે ATPને આપેલા નિવેદનમાં કહ્યું કે, "હું આ જીતને શબ્દોમાં સમજાવી શકતો નથી. તે એક અદ્ભુત સાંજ હતી. ડેનિસ શાપોવાલોવ સામેની મારી છેલ્લી મેચમાં મારી જીતથી મને ઘણો આત્મવિશ્વાસ મળ્યો હતો. હું ખરેખર સારી રીતે રમ્યો હતો અને મને પહેલેથી જ વિશ્વાસ હતો કે આજે મને જીતવાની તક મળી શકે છે અને તમે જોઈ શકો છો કે તે ક્યારેક આવું પણ થાય છે."