LSGની જીત બાદ પોઈન્ટ્સ ટેબલમાં થયો મોટો ફેરફાર, RCB બીજી મેચ પહેલા ટોપ પર પહોંચી, SRHને થયું નુકસાન

ગઈકાલે IPL 2025ની 7મી મેચમાં લખનૌ સુપર જાયન્ટ્સે સનરાઈઝર્સ હૈદરાબાદને સરળતાથી હરાવ્યું હતું. રિષભ પંતની કેપ્ટનશિપ હેઠળની LSGએ સિઝનની પહેલી જીત મેળવી હતી. અગાઉ LSGને દિલ્હી કેપિટલ્સ સામે હારનો સામનો કરવો પડ્યો હતો. જોકે, LSGની જીત પછી પોઈન્ટ્સ ટેબલમાં મોટો ફેરફાર થયો છે. સનરાઈઝર્સ હૈદરાબાદ જે પહેલી મેચ જીતીને પોઈન્ટ્સ ટેબલમાં પહેલા સ્થાને હતી. તે હવે ટોપ 4માં પણ નથી.

SRHને મોટો ઝટકો લાગ્યો

આ કારમી હાર બાદ, પેટ કમિન્સની કેપ્ટનશિપ હેઠળની સનરાઈઝર્સ હૈદરાબાદને મોટો ઝટકો લાગ્યો છે. હકીકતમાં, હવે સનરાઈઝર્સ હૈદરાબાદ પોઈન્ટ્સ ટેબલમાં છઠ્ઠા સ્થાને સરકી ગયું છે. આ પહેલા સનરાઈઝર્સ હૈદરાબાદ ટોપ પર હતું. હવે સનરાઇઝર્સ હૈદરાબાદની હારનો ફાયદો રોયલ ચેલેન્જર્સ બેંગલુરુને મળ્યો છે. રોયલ ચેલેન્જર્સ બેંગલુરુ જે પહેલી મેચ પછી બીજા નંબર પર હતી, તે હવે ટોપ પર પહોંચી ગઈ છે. જ્યારે રિષભ પંતની કેપ્ટનશિપ હેઠળની લખનૌ સુપર જાયન્ટ્સ સારી નેટ રન રેટને કારણે બીજા સ્થાને પહોંચી ગઈ છે. આ પછી, પંજાબ કિંગ્સ ત્રીજા નંબરે છે.

પોઈન્ટ ટેબલમાં બાકીની ટીમો ક્યાં છે?

ચેન્નાઈ સુપર કિંગ્સ પોઈન્ટ્સ ટેબલમાં ચોથા સ્થાને છે. જ્યારે અક્ષર પટેલની કેપ્ટનશિપ હેઠળની દિલ્હી કેપિટલ્સ પાંચમા સ્થાને છે. ઉપરાંત, કોલકાતા નાઈટ રાઈડર્સ સાતમા સ્થાને છે. જોકે, હાલમાં, ટોપ પર રહેલી રોયલ ચેલેન્જર્સ બેંગલુરુથી લઈને સાતમા નંબર પરની કોલકાતા નાઈટ રાઈડર્સ સુધીની બધી ટીમ પાસે 2-2 પોઈન્ટ છે, પરંતુ નેટ રન રેટના આધારે ટીમો આગળ અને પાછળ છે. આ ઉપરાંત, મુંબઈ ઈન્ડિયન્સ, ગુજરાત ટાઇટન્સ અને રાજસ્થાન રોયલ્સ સિઝનની તેમની પ્રથમ જીતની રાહ જોઈ રહ્યા છે.