ઓસ્ટ્રેલિયાના દિગ્ગજે વસીમ અકરમ સાથે કરી બુમરાહની સરખામણી, કહ્યું- 'તે જમણાં હાથે બોલિંગ...'

ઓસ્ટ્રેલિયાના પૂર્વ બેટર અને કોચ જસ્ટિન લેંગરે જસપ્રીત બુમરાહની સરખામણી વસીમ અકરમ સાથે કરી છે. ભારત અને ઓસ્ટ્રેલિયાના બોક્સિંગ ડે ટેસ્ટ મેચ પહેલા લેંગરે બુમરાહની પ્રશંસા કરતા કહ્યું હતું કે આ ભારતીય ફાસ્ટ બોલરનો સામનો કરવો બેટ્સમેન માટે દુઃસ્વપ્ન બની રહેશે.

આ પણ વાંચો: શું ભારતીય ટીમમાં થયું હતું અશ્વિનનું અપમાન? સ્પિનરે તોડ્યું મૌન, પિતાના નિવેદન પર આપી સ્પષ્ટતા

સૌથી વધુ વિકેટ લેનારા બોલરોમાં બુમરાહ ટોપ પર 

બોર્ડર-ગાવસ્કર ટ્રોફીમાં બુમરાહનું શાનદાર પ્રદર્શન રહ્યું છે. 21 વિકેટ સાથે બુમરાહ સૌથી વધુ વિકેટ લેનારા બોલરોની યાદીમાં ટોપ પર છે. તેણે પેટ કમિન્સ અને મિચેલ સ્ટાર્ક કરતાં 7 વિકેટ વધુ લીધી છે. 

જસ્ટિન લેંગરે કર્યા બુમરાહના વખાણ

જસ્ટિન લેંગરે કહ્યું, 'મને બુમરાહનો સામનો કરવો બિલકુલ પસંદ નથી. તે વસીમ અકરમ જેવો છે. મારા માટે, તે જમણાં હાથે બોલિંગ કરતો વસીમ અકરમ છે અને જ્યારે પણ મને પૂછવામાં આવે છે કે મારી અત્યાર સુધી ગેમમાં મેં ક્યાં સૌથી સારા બોલરનો સામનો કર્યો છે, તો હું કહું છું, વસીમ અકરમ.'

જસપ્રીત બુમરાહ તો જમણાં હાથે બોલિંગ કરતો વસીમ અકરમ છે: લેંગર

જસ્ટિન લેંગરે વધુમાં કહ્યું કે, 'વસીમ અકરમની બોલિંગ સ્પીડ સારી છે. તેના જેવા મહાન બોલરોની એક ખાસિયત હોય છે એક જ લાઈન લેન્થ પર બોલિંગ કરે છે. તેમજ તે બોલ બાઉન્સ કરવામાં માહેર છે. અકરમ જે રીતે બોલિંગ કરતો હતો, તે બોલ પર આંગળીઓનો અદ્ભુત રીતે ઉપયોગ કરતો હતો અને આવું જ કંઈક બુમરાહ કરે છે. તેનો બોલ પણ અકરમની જેમ જ કોઈ પણ દિશામાં જઈ શકે છે. મારા માટે અકરમની બોલિંગનો સામનો કરવો એક દુઃસ્વપ્ન સમાન બાબત હતી અને આવું જ કંઈક બુમરાહ સાથે પણ થાય છે.'

જો બુમરાહ ફિટ રહેશે ઓસ્ટ્રેલિયન બેટર્સની મુશ્કેલી વધશે

લેંગરે બુમરાહ વિષે વાત કરતા કહ્યું કે, 'મને બુમરાહનો સામનો કરવો પસંદ નથી. તે એક સારો હરીફ છે. તે ફાસ્ટ બોલિંગ કરે છે અને તે અદ્ભુત છે. મેં સિરીઝની શરૂઆતમાં કહ્યું હતું કે જો બુમરાહ ફિટ રહેશે તો ઓસ્ટ્રેલિયન બેટર્સ માટે તે ખૂબ જ મુશ્કેલ રહેશે, જો તે ફિટ નહીં રહે તો મને લાગે છે કે ઓસ્ટ્રેલિયા આસાનીથી સિરીઝ જીતી લેશે.'