AUS vs ENG / પર્થ બાદ ગાબામાં પણ ઈંગ્લેન્ડનું સરેન્ડર, ઓસ્ટ્રેલિયાએ 8 વિકેટે જીતી બીજી ટેસ્ટ
છેલ્લું અપડેટ : 07 Dec 2025
પર્થ પછી ઓસ્ટ્રેલિયાએ ગાબામાં પણ શાનદાર જીત મેળવી છે. કાંગારૂઓએ બીજી ઈનિંગમાં ઈંગ્લેન્ડના 65 રનનો ટાર્ગેટ ચેઝ કર્યો, જેમાં ટીમે ફક્ત બે વિકેટ ગુમાવી હતી. ટ્રેવિસ હેડ અને માર્નસ લાબુશેનના સસ્તા આઉટ થવા છતાં, તેઓ આઠ વિકેટથી જીત મેળવવામાં સફળ રહ્યા.
આ જીત સાથે ઓસ્ટ્રેલિયાએ એશિઝ સિરીઝમાં 2-0ની લીડ મેળવી લીધી છે. મિશેલ સ્ટાર્કનું પ્રદર્શન આ મેચમાં પણ પ્રભાવશાળી રહ્યું હતું. તેણે મેચમાં કુલ આઠ વિકેટ લીધી અને 77 રનની મજબૂત ઈનિંગ રમી હતી. માઈકલ નેસરે પણ બીજી ઈનિંગમાં પંજો ખોલ્યો હતો.
ઓસ્ટ્રેલિયા 2-0થી આગળ
ટેસ્ટના ચોથા દિવસે બેન સ્ટોક્સ અને વિલ જેક્સે મજબૂત પાર્ટનરશિપ કરી અને એક સમયે એવું લાગતું હતું કે આ બે બેટ્સમેનના દમ પર ઈંગ્લેન્ડ ઓસ્ટ્રેલિયાને લડાયક ટાર્ગેટ આપી શકશે. જોકે, જેક્સ 41 રન બનાવીને આઉટ થયા બાદ મેચ કાંગારુઓના પક્ષમાં પાછી ફરી. કેપ્ટન બેન સ્ટોક્સ પણ 50 રન બનાવીને નેસરનો શિકાર બન્યો. ત્યારબાદ આખી ઈંગ્લિશ ટીમ 241 રનમાં ઓલઆઉટ થઈ ગઈ, જેના કારણે ઓસ્ટ્રેલિયાને 65 રનનો ટાર્ગેટ મળ્યો.
બીજી ઈનિંગમાં કાંગારુઓની શરૂઆત સારી નહતી. ટ્રેવિસ હેડ 22 રન બનાવીને આઉટ થયો. આ પછી માર્નસ લાબુશેનને ગસ એટકિન્સન દ્વારા 3 રનમાં આઉટ કરવામાં આવ્યો. જોકે, કેપ્ટન સ્ટીવ સ્મિથ અને જેક વેધરાલ્ડે વધુ કોઈ વિકેટ ન પડવા દીધી. વેધરાલ્ડ 17 અને સ્મિથ 9 બોલમાં 23 રન બનાવીને અણનમ રહ્યા.
નેસર અને સ્ટાર્ક જીતના હીરો બન્યા
મિચેલ સ્ટાર્કે ગાબ્બા ટેસ્ટના પ્રથમ ઈનિંગમાં ફરી એકવાર તબાહી મચાવી હતી. સ્ટાર્કે છ વિકેટ લઈને ઈંગ્લિશ બેટિંગ ઓર્ડરને પત્તાના ઢગલાની જેમ પાડી દીધો. આ સિવાય તેણે પહેલી ઈનિંગ બેટથી 77 રનની મજબૂત ઈનિંગ પણ રમી. માઈકલ નેસરે બીજી ઈનિંગમાં પોતાની બોલિંગથી પ્રભાવિત કર્યા. તેણે 16.2 ઓવરમાં 42 રન આપીને પાંચ વિકેટ લીધી. સ્ટાર્કે બીજી ઈનિંગમાં પણ બે વિકેટ લીધી હતી.
