વિરાટ કોહલીએ તોડ્યો સચિન તેંડુલકરનો વર્લ્ડ રેકોર્ડ, આવી સિદ્ધિ હાંસલ કરનાર પહેલો ખેલાડી બન્યો
છેલ્લું અપડેટ : 07 Dec 2025
વિરાટ કોહલી જબરદસ્ત ફોર્મમાં છે અને સતત રન બનાવી રહ્યો છે. સાઉથ આફ્રિકા સામેની ODI સિરીઝમાં તેણે બેટિંગમાં એવું પ્રદર્શન કર્યું જેણે ફેન્સને યુવા વિરાટની યાદ અપાવી દીધી હતી. આફ્રિકન બોલર્સ તેની સામે સંપૂર્ણપણે લાચાર દેખાતા હતા. આ સિરીઝમાં તેના ઉત્તમ પ્રદર્શન માટે કોહલીને 'પ્લેયર ઓફ ધ સિરીઝ' નો એવોર્ડ આપવામાં આવ્યો હતો.
વિરાટ કોહલીએ સચિનને પાછળ છોડી દીધો
વિરાટ કોહલીએ 'પ્લેયર ઓફ ધ સિરીઝ' નો એવોર્ડ જીતીને ઈતિહાસ રચ્યો છે. આંતરરાષ્ટ્રીય ક્રિકેટમાં આ તેનો 21મો 'પ્લેયર ઓફ ધ સિરીઝ' નો એવોર્ડ છે. આ સાથે તેણે સચિન તેંડુલકરનો વર્લ્ડ રેકોર્ડ તોડી નાખ્યો છે. સચિને તેની આંતરરાષ્ટ્રીય કારકિર્દીમાં 20 વખત 'પ્લેયર ઓફ ધ સિરીઝ' નો એવોર્ડ જીત્યો હતો. હવે કોહલી તેણે પાછળ છોડી દીધો છે અને આંતરરાષ્ટ્રીય ક્રિકેટમાં 20થી વધુ 'પ્લેયર ઓફ ધ સિરીઝ' એવોર્ડ જીતનાર એકમાત્ર બેટ્સમેન બની ગયો છે.
આંતરરાષ્ટ્રીય ક્રિકેટમાં સૌથી વધુ વખત POTS જીતનારા ખેલાડીઓ
- વિરાટ કોહલી - 21 વખત
- સચિન તેંડુલકર - 20 વખત
- શાકિબ અલ હસન - 17 વખત
- જેક કાલિસ - 15 વખત
- ડેવિડ વોર્નર - 13 વખત
- સનથ જયસૂર્યા - 13 વખત
સાઉથ આફ્રિકા સામેની ODI સિરીઝમાં 302 રન બનાવ્યા
સાઉથ આફ્રિકા સામેની ODI સિરીઝમાં વિરાટ કોહલીએ ત્રણ મેચમાં કુલ 302 રન બનાવ્યા, જેમાં બે સદી અને એક અડધી સદીનો સમાવેશ થાય છે. તેણે રાંચીમાં રમાયેલી પ્રથમ ODIમાં 135 રન બનાવ્યા હતા. ત્યારબાદ તેણે બીજી ODIમાં 102 રન બનાવ્યા અને ત્રીજી ODIમાં પણ તેનું મજબૂત ફોર્મ ચાલુ રહ્યું, જેમાં તેણે 65 રન બનાવ્યા હતા. તે આ સિરીઝમાં સૌથી વધુ રન બનાવનાર ખેલાડી હતો.
યશસ્વી જયસ્વાલે શક્તિશાળી સદી ફટકારી
ટીમ ઈન્ડિયાએ ત્રીજી ODIમાં સાઉથ આફ્રિકાને 9 વિકેટથી હરાવ્યું હતું. આ મેચમાં ભારતના બોલર્સ અને બેટ્સમેન બંનેએ સારું પ્રદર્શન કર્યું હતું. પ્રથમ બેટિંગ કરતા આફ્રિકન ટીમ ફક્ત 270 રનમાં ઓલઆઉટ થઈ ગઈ. ત્યારબાદ ભારતે રોહિત શર્મા, યશસ્વી જયસ્વાલ અને વિરાટ કોહલીના શાનદાર પ્રદર્શનને કારણે ટાર્ગેટ સરળતાથી ચેઝ કરી લીધો. આ દરમિયાન જયસ્વાલે 116 રનની ઈનિંગ રમી, જેમાં 12 ચોગ્ગા અને 2 છગ્ગાનો સમાવેશ થાય છે. રોહિત અને વિરાટે પણ અડધી સદી ફટકારી. રોહિતે 75 રન બનાવ્યા, જ્યારે વિરાટ કોહલીએ 65 રન બનાવ્યા હતા.
