Asia Cup 2025ની મેચના ટાઈમિંગમાં થયો બદલાવ, હવે આ સમયે શરૂ થશે મુકાબલા
છેલ્લું અપડેટ : 31 Aug 2025
એશિયા કપ 2025 આવતા મહિનાથી શરૂ થવાનો છે. દરમિયાન, ટુર્નામેન્ટને લઈને મોટા સમાચાર સામે આવ્યા છે. એશિયા કપ 2025ની મેચના શેડ્યુલમાં મોટો ફેરફાર કરવામાં આવ્યો છે. ટુર્નામેન્ટની 19માંથી 18 મેચ, જેમાં ફાઈનલનો પણ સમાવેશ થાય છે, હવે સાંજે 6:30 વાગ્યે (ગલ્ફ સ્ટાન્ડર્ડ ટાઇમ) એટલે કે ભારતીય સમય મુજબ રાત્રે 8 વાગ્યે શરૂ થશે. આ ફેરફાર મુજબ મેચ અગાઉના નિર્ધારિત સમય કરતાં અડધો કલાક મોડી શરૂ થશે.
મેચના સમયમાં મોટો ફેરફાર
સપ્ટેમ્બર મહિનામાં, ગલ્ફ દેશોમાં દિવસ દરમિયાન તાપમાન 40 ડિગ્રી સેલ્સિયસ સુધી પહોંચી જાય છે અને મોડી સાંજ સુધી આટલું ગરમ રહે છે. ખેલાડીઓને આટલી તીવ્ર ગરમીમાં રમવાથી બચાવવા માટે, ક્રિકેટ બોર્ડે મેચનો સમય થોડો વધારવાની વિનંતી કરી હતી. આ દરખાસ્ત બ્રોડકાસ્ટર્સને મોકલવામાં આવી હતી અને તેણે તેને સ્વીકારી લીધી હતી.
આ ફેરફારથી બધી ડે-નાઈટ મેચો પર અસર થશે, પરંતુ ટુર્નામેન્ટની એકમાત્ર ડે મેચ તેના જૂના શેડ્યૂલ મુજબ રમાશે. આ મેચ 15 સપ્ટેમ્બરે અબુ ધાબીના શેખ ઝાયેદ ક્રિકેટ સ્ટેડિયમ ખાતે સંયુક્ત આરબ અમીરાત (UAE) અને ઓમાન વચ્ચે રમાશે.
8 ટીમો વચ્ચે જંગ થશે
એશિયા કપ 9 સપ્ટેમ્બરે અબુ ધાબીમાં શરૂ થશે, પહેલી મેચમાં અફઘાનિસ્તાન અને હોંગકોંગની ટીમો એકબીજા સામે ટકરાશે. આ વખતે 8 ટીમો ટાઈટલ માટે સ્પર્ધા કરશે અને ફાઈનલ સુધી રોમાંચક મેચ જોવા મળશે. ફેન્સ હવે રાત્રે 8 વાગ્યાથી ક્રિકેટનો આનંદ માણી શકશે અને ખેલાડીઓને પણ ગરમીથી થોડી રાહત મળશે.
આ વખતે એશિયા કપ T20 ફોર્મેટમાં રમાશે. ભારત અને પાકિસ્તાનને એક જ ગ્રુપમાં રાખવામાં આવ્યા છે. બંને ટીમો રવિવાર, 14 સપ્ટેમ્બરે એકબીજા સામે ટકરાશે. આ પછી, બંને ટીમો સુપર-4માં ટકરાય તેવી શક્યતા છે. ભારત અને પાકિસ્તાન ઉપરાંત, ઓમાન અને UAE પણ ગ્રુપ-Aમાં સામેલ છે. શ્રીલંકા, બાંગ્લાદેશ, હોંગકોંગ અને અફઘાનિસ્તાનને ગ્રુપ-Bમાં સામેલ કરવામાં આવ્યા છે. ટુર્નામેન્ટની ફાઈનલ મેચ 28 સપ્ટેમ્બરે દુબઈ ઈન્ટરનેશનલ ક્રિકેટ સ્ટેડિયમ ખાતે રમાશે.
