6 કરોડથી 201 કરોડ સુધીની ઐતિહાસિક સફર: 5 ટ્રોફીની બાદશાહત બાદ આખરે પૂરો થયો 'થાલા' યુગ

ઈન્ડિયન પ્રીમિયર લીગ (IPL) ના ઈતિહાસમાં એક સુવર્ણ અધ્યાયનો અંત આવ્યો છે. ચેન્નાઈ સુપર કિંગ્સ (CSK) ના દિગ્ગજ પૂર્વ કેપ્ટન અને 'થાલા' તરીકે જાણીતા મહેન્દ્ર સિંહ ધોની હવે IPL માં ખેલાડી તરીકે રમતા જોવા નહીં મળે. 18 વર્ષની શાનદાર સફર બાદ ધોનીએ ક્રિકેટના મેદાનને અલવિદા કહી દીધું છે, જોકે CSK સાથેનો તેમનો નાતો અતૂટ રહેશે અને હવે તેઓ ફ્રેન્ચાઈઝીમાં એક નવી ભૂમિકામાં જોવા મળશે.
2008 થી શરૂ થયેલી ઐતિહાસિક સફર
વર્ષ 2008 માં IPL ની પ્રથમ સિઝનની હરાજીમાં ચેન્નાઈ સુપર કિંગ્સે એમએસ ધોનીને 6 કરોડ રૂપિયામાં ખરીદીને ટીમની કમાન સોંપી હતી. ત્યારથી લઈને આજ સુધી ધોની અને CSK એકબીજાના પર્યાય બની ગયા હતા. તેમની શાનદાર કેપ્ટનશીપ અને અદ્ભુત રણનીતિના દમ પર ચેન્નાઈ સુપર કિંગ્સે 5 વખત (2010, 2011, 2018, 2021 અને 2023) IPL નો ખિતાબ જીતીને ઈતિહાસ રચ્યો હતો. આ ઉપરાંત, ટીમ 10 વખત ફાઈનલમાં પહોંચી હતી, જે એક અનોખો રેકોર્ડ છે.
18 વર્ષમાં IPL સેલેરીથી કરી કરોડોની કમાણી
ધોની માત્ર મેદાન પર જ નહીં, પરંતુ કમાણીની બાબતમાં પણ IPL ના સૌથી મોટા સ્ટાર રહ્યા છે. 2008 માં 6 કરોડ રૂપિયાથી શરૂ થયેલી તેમની સેલેરી 2018 થી 2021 દરમિયાન 15 કરોડ રૂપિયા સુધી પહોંચી હતી. ત્યારબાદ 2022 થી 2024 સુધી તેમને 12 કરોડ રૂપિયા મળ્યા હતા, જ્યારે 2025 અને 2026 ની સિઝનમાં 'અનકેપ્ડ પ્લેયર' નિયમ હેઠળ CSK એ તેમને 4 કરોડ રૂપિયામાં રિટેન કર્યા હતા. આમ, 18 વર્ષની IPL કારકિર્દીમાં ધોનીએ પગાર પેટે કુલ 196.84 કરોડ રૂપિયાની કમાણી કરી છે.
CSK માં હવે સંભાળશે નવી જવાબદારી
ખેલાડી તરીકે નિવૃત્તિ લીધા બાદ પણ ધોની ચેન્નાઈ સુપર કિંગ્સના ડ્રેસિંગ રૂમનો ભાગ બની રહેશે. ફ્રેન્ચાઈઝીએ તેમને ટીમના મેન્ટર (Mentor) તરીકેની નવી જવાબદારી સોંપી છે, જ્યાં તેઓ પોતાના બહોળા અનુભવથી યુવા ખેલાડીઓને માર્ગદર્શન આપશે.
ચેપોકના મેદાન પર 7 નંબરની જર્સીમાં ધોનીની એન્ટ્રી અને હેલિકોપ્ટર શોટ્સની યાદો ચાહકોના દિલમાં હંમેશા જીવંત રહેશે. મેદાન પરથી તેમની વિદાય ક્રિકેટ પ્રેમીઓ માટે ચોક્કસપણે એક ભાવુક ક્ષણ છે, પરંતુ 'થાલા'નો જાદુ હવે ડગઆઉટમાંથી ટીમ માટે કામ કરતો જોવા મળશે.










