18 વર્ષીય આયુષ મ્હાત્રેએ રચ્યો ઈતિહાસ, સદી ફટકારતા જ તોડ્યો રોહિત શર્માનો મોટો રેકોર્ડ

સૈયદ મુશ્તાક અલી ટ્રોફી 2025માં 18 વર્ષના બેટ્સમેન આયુષ મ્હાત્રેએ વિસ્ફોટક બેટિંગ પ્રદર્શન કર્યું હતું. મુંબઈ માટે રમતા વિદર્ભ સામે તેણે શાનદાર સદી ફટકારી હતી. તે ટીમ માટે ઓપનિંગ કરવા આવ્યો હતો અને ઈનિંગની શરૂઆતથી જ આક્રમક બેટિંગ કરી રહ્યો હતો. મુંબઈને મેચ જીતાડીને તે ટીમનો સૌથી મોટો મેચ વિનર બન્યો હતો. વિદર્ભે પહેલા બેટિંગ કરતા 192 રન બનાવ્યા હતા. આયુષના પ્રદર્શનથી મુંબઈએ સરળતાથી ટાર્ગેટ ચેઝ કરી લીધો.

રોહિત શર્માનો રેકોર્ડ તૂટી ગયો

વિદર્ભ સામેની મેચમાં આયુષે 53 બોલમાં કુલ 110 રન બનાવ્યા, જેમાં 8 ચોગ્ગા અને 8 છગ્ગાનો સમાવેશ થાય છે. વિદર્ભના બોલર્સ તેની સામે સંપૂર્ણપણે ફ્લોપ રહ્યા હતા. આયુષ ત્રણેય ફોર્મેટ (ફર્સ્ટ-ક્લાસ, લિસ્ટ A અને T20) માં સદી ફટકારનાર સૌથી યુવા ખેલાડી બની ગયો છે. આ સાથે તેણે રોહિત શર્માનો રેકોર્ડ તોડી નાખ્યો. આયુષ હાલમાં 18 વર્ષ અને 135 દિવસનો છે. રોહિત 19 વર્ષ અને 339 દિવસનો હતો, જ્યારે તેણે ત્રણેય ફોર્મેટમાં સદી ફટકારી હતી.

ફર્સ્ટ-ક્લાસ, લિસ્ટ A અને T20 ક્રિકેટમાં સદી ફટકારનાર સૌથી યુવા બેટ્સમેન

• આયુષ મ્હાત્રે - 18 વર્ષ 135 દિવસ
• રોહિત શર્મા - 19 વર્ષ 339 દિવસ
• ઉન્મુક્ત ચંદ - 20 વર્ષ 0 દિવસ
• ક્વિન્ટન ડી કોક - 20 વર્ષ 62 દિવસ
• અહમદ શહેઝાદ - 20 વર્ષ 97 દિવસ

આયુષ મ્હાત્રેની કારકિર્દી

આયુષ મ્હાત્રેએ અત્યાર સુધી 13 ફર્સ્ટ-ક્લાસ મેચોમાં કુલ 660 રન બનાવ્યા છે, જેમાં 2 સદી અને 2 અડધી સદીનો સમાવેશ થાય છે. તેણે 7 લિસ્ટ A મેચોમાં 458 રન બનાવ્યા છે. લિસ્ટ Aમાં, તેણે 2 સદી અને 1 અડધી સદી ફટકારી છે. આ ઉપરાંત, તેણે T20 ક્રિકેટમાં 368 રન બનાવ્યા છે, જેમાં પણ હવે 1 સદીનો સમાવેશ થાય છે.

CSK માટે પોતાની પ્રતિભા બતાવી ચૂક્યો છે

આયુષ મ્હાત્રે IPLમાં ચેન્નાઈ સુપર કિંગ્સ (CSK) માટે રમે છે અને IPL 2025માં તેણે બધાને પ્રભાવિત કર્યા હતા. તેણે CSK માટે 7 મેચોમાં કુલ 240 રન બનાવ્યા છે, જેમાં 94 રનની ઈનિંગનો પણ સમાવેશ થાય છે.