ચંદ્રગ્રહણ બાદ શુદ્ધિકરણ કેમ છે અનિવાર્ય? મંદિરથી રસોડા સુધી ઘરને શુદ્ધ કરવાના આ નિયમો ખાસ જાણો

પંચાંગ અનુસાર, વર્ષ 2026નું પ્રથમ ચંદ્રગ્રહણ 3 માર્ચ, 2026ના રોજ ફાગણ મહિનાની પૂર્ણિમાએ (હોળીના દિવસે) થશે. હિન્દુ ધર્મમાં ચંદ્રગ્રહણને ધાર્મિક દ્રષ્ટિએ અત્યંત સંવેદનશીલ સમય માનવામાં આવે છે. શાસ્ત્રોક્ત માન્યતા મુજબ ગ્રહણના સમયમાં નકારાત્મક ઉર્જાનો પ્રભાવ વધતો હોવાથી ગ્રહણ બાદ ઘર અને મંદિરનું શુદ્ધિકરણ અનિવાર્ય છે.

ચંદ્રગ્રહણ પાછળનું ધાર્મિક કારણ

હિન્દુ પૌરાણિક કથાઓ અનુસાર,ગ્રહણનો સંબંધ રાહુ અને કેતુ સાથે છે. સમુદ્ર મંથન દરમિયાન જ્યારે રાહુ અને કેતુએ કપટથી અમૃતપાન કર્યું ત્યારે ભગવાન વિષ્ણુએ તેમનું મસ્તક ધડથી અલગ કરી દીધું હતું. માનવામાં આવે છે કે આ જ રાહુ-કેતુ વેરભાવ રાખી સમયાંતરે સૂર્ય અને ચંદ્ર પર ગ્રહણ લગાડે છે. આ કાળ દરમિયાન મંદિરોના દ્વાર બંધ કરી દેવામાં આવે છે અને ભોજનનો ત્યાગ કરવામાં આવે છે.

ગ્રહણ બાદ મંદિરનું શુદ્ધિકરણ કેવી રીતે કરવું?

ગ્રહણ પૂર્ણ થયા પછી દેવસ્થાનને પવિત્ર કરવું અત્યંત મહત્વનું છે:

ગંગાજળથી સ્નાન: ગ્રહણ સમાપ્ત થતા જ ઘરના સભ્યોએ સૌપ્રથમ ગંગાજળ મિશ્રિત પાણીથી સ્નાન કરવું જોઈએ.

મૂર્તિ શુદ્ધિ: ઘરના મંદિરની મૂર્તિઓને ગંગાજળ અથવા શુદ્ધ પાણીથી સ્નાન કરાવી નવા વસ્ત્રો પહેરાવવા જોઈએ.

ગંગાજળનો છંટકાવ: આખા મંદિરમાં અને મૂર્તિઓ પર ગંગાજળ છાંટી તેને શુદ્ધ કરો.

આરતી અને મંત્રોચ્ચાર: શુદ્ધિકરણ બાદ તાજા ફૂલો ચઢાવી દીવો-ધૂપ કરવો અને મંત્રોનો જાપ કરી આરતી કરવી જોઈએ.

રસોડાની શુદ્ધિ અને ભોજનના નિયમો

ગ્રહણની અસર રસોડા અને ખાદ્યપદાર્થો પર પણ થતી હોય છે:

તાજું ભોજન: ગ્રહણ દરમિયાન રાંધેલું ભોજન ન ખાવું જોઈએ. ગ્રહણ બાદ રસોડાને સાફ કરી નવું અને સાત્વિક ભોજન બનાવવું જોઈએ.

તુલસીના પાનનો ઉપયોગ: ગ્રહણ શરૂ થતા પહેલા દૂધ, દહીં અને અન્ય ખાદ્યપદાર્થોમાં તુલસીના પાન રાખવાથી તેની નકારાત્મક અસર થતી નથી.

વાસણોની સફાઈ: રસોડાના વપરાશમાં લેવાતા વાસણો અને ગેસના ચૂલાને યોગ્ય રીતે સાફ કરવા જોઈએ.

આખા ઘરનું શુદ્ધિકરણ અને દાનનું મહત્વ

ઘરની સફાઈ: આખા ઘરમાં ગંગાજળ અથવા ગૌમૂત્રનો છંટકાવ કરવો. પાણીમાં મીઠું નાખીને પોતું કરવાથી નકારાત્મક ઉર્જા દૂર થાય છે.

ધૂપ અને હવન: ઘરમાં ધૂપ અથવા નાનો હવન કરવાથી વાતાવરણ શુદ્ધ થાય છે.

દાન-પુણ્ય: ગ્રહણ બાદ ગરીબોને અનાજ, વસ્ત્ર કે શક્તિ મુજબ નાણાંનું દાન કરવું ખૂબ જ પુણ્યશાળી માનવામાં આવે છે.

નોંધ:-   આ લેખમાં આપવામાં આવેલી તમામ માહિતી વિવિધ સ્રોતો જેવા કે - પંચાંગો/ ઉપદેશો/ ધાર્મિક માન્યતાઓ/જ્યોતિષીઓ/ શાસ્ત્રોમાંથી સંકલિત કરવામાં આવી છે અને તમને પ્રસારિત કરવામાં આવી છે. અમારો હેતુ માત્ર માહિતી પૂરી પાડવાનો છે. GSTV આની પુષ્ટિ નથી કરતું. તેના માટે કોઈ નિષ્ણાતનું માર્ગદર્શન લેવું.