મંગળવારે જ કેમ કરવામાં આવે છે બજરંગબલીની પૂજા? જાણો તેની પાછળનું કારણ

મંગળવારને ભગવાન શ્રી રામના પરમ ભક્ત પવન પુત્ર હનુમાનજીનો દિવસ માનવામાં આવે છે. માન્યતાઓ અનુસાર, બજરંગબલીને મહાદેવના અગિયારમા અવતાર માનવામાં આવે છે. તેમને કળિયુગના દેવતા પણ કહેવામાં આવે છે.

આ પણ વાંચો: મંગળવારની પૂજામાં ભૂલથી પણ ન કરો આ 6 કામ, 'મહાબલી હનુમાન' ગુસ્સે થતાં ઊભી થશે આ સમસ્યા

મંગળવારે ભગવાન હનુમાનજીની પૂજા કરવાથી મનોકામનાઓ પૂર્ણ થાય છે અને શુભ ફળ પ્રાપ્ત થાય છે. જે પણ મંગળવારના દિવસે વિધિ પ્રમાણે બજરંગબલીની પૂજા કરે છે, તેના જીવનની તમામ પરેશાનીઓ દૂર થઈ જાય છે.

આ સિવાય જો કોઈ વ્યક્તિની કુંડળીમાં મંગળ, શનિ અથવા રાહુ-કેતુનો કોઈ અશુભ પ્રભાવ હોય તો તે મંગળવારના દિવસે ભગવાન હનુમાનજીની પૂજા કરવાથી રાહત મેળવી શકે છે. પરંતુ, શું તમે ક્યારેય વિચાર્યું છે કે હનુમાનજીની પૂજા માત્ર મંગળવારે જ શા માટે કરવામાં આવે છે? આ પાછળનું કારણ અને મહત્ત્વ શું છે? હનુમાનજીને સંકટ મોચન કેમ કહેવામાં આવે છે? મંગળવારની પૂજાના નિયમો શું છે?  

આ કારણે મંગળવારે કરવામાં આવે છે હનુમાનજીની પૂજા

જ્યોતિષ કહે છે કે, સ્કંદ પુરાણ અનુસાર, હનુમાનજીનો જન્મ મંગળવારે થયો હતો. આ કારણથી આ દિવસ તેમની પૂજા માટે સમર્પિત છે. આ સિવાય હનુમાનજીને મંગળ ગ્રહના નિયંત્રક માનવામાં આવે છે, તેથી મંગળવારે તેમની પૂજા કરવાની પરંપરા છે. માન્યતાઓ અનુસાર, નિયમો સાથે બજરંગબલીની પૂજા કરવાથી તે ઝડપથી પ્રસન્ન થઈ જાય છે અને ભક્તોની મનોકામના પૂર્ણ કરે છે.

હનુમાનજીને સંકટ મોચન કેમ કહેવામાં આવે છે?

જ્યોતિષ અનુસાર, જે ભક્તો યોગ્ય રીતે પૂજા કરે છે તેમના જીવનમાં આવનારી તમામ પરેશાનીઓ હનુમાનજી દૂર કરી દે છે. આ જ કારણ છે કે હનુમાનજીને સંકટમોચન નામ પણ પડ્યું. આ દિવસે હનુમાન ચાલીસા અને સુંદરકાંડના પાઠ કરવાથી ભક્તોને વિશેષ લાભ મળે છે.

હનુમાનજીની પૂજા કરતી વખતે આ વાતોનું ધ્યાન રાખો

બજરંગબલીની પૂજા કરતી વખતે કડક નિયમોનું પાલન કરવું જરૂરી છે. આમાંનો પહેલો અને મુખ્ય નિયમ શુદ્ધતાની વિશેષ કાળજી લેવાનો છે. હનુમાનજીની પૂજા કરતી વખતે તમારા શરીર અને મનને શુદ્ધ રાખો. પૂજા દરમિયાન તમારા મનને ભટકવા ન દો. મનને શાંત રાખી પૂજા કરો.

'ઓમ શ્રી હનુમંતે નમઃ' મંત્રનો જાપ કરવાથી વિશેષ ફળ મળે છે. આ સિવાય હનુમાનજીને લાલ રંગ પસંદ છે તેથી લાલ રંગ પહેરવો શુભ છે. કાળા અને સફેદ કપડા પહેરવાનું ટાળો.

નોંધ:- આ લેખમાં આપવામાં આવેલી તમામ માહિતી વિવિધ સ્રોતો જેવા કે - પંચાંગો/ ઉપદેશો/ ધાર્મિક માન્યતાઓ/જ્યોતિષીઓ/ શાસ્ત્રોમાંથી સંકલિત કરવામાં આવી છે અને તમને પ્રસારિત કરવામાં આવી છે. અમારો હેતુ માત્ર માહિતી પૂરી પાડવાનો છે. GSTV આની પુષ્ટિ નથી કરતું. તેના માટે કોઈ નિષ્ણાતનું માર્ગદર્શન લેવું.