દેવઉઠી એકાદશીએ બની રહ્યો છે મહાસંયોગ: આખો દિવસ રહેશે રવિ યોગ, આ મુહૂર્તમાં પૂજા કરવાથી મળશે બમણું ફળ
કાર્તક સુદ એકાદશીના પવિત્ર દિવસે દેવઉઠી એકાદશી મનાવવામાં આવે છે. આ શુભ દિવસે ભગવાન શ્રીહરિ વિષ્ણુ 4 મહિનાની લાંબી યોગનિદ્રામાંથી જાગૃત થાય છે અને તેની સાથે જ ચાતુર્માસની પૂર્ણાહુતિ થાય છે. ચાતુર્માસ પૂર્ણ થતાંની સાથે જ લગ્ન, ગૃહપ્રવેશ, જનોઈ જેવા તમામ શુભ અને માંગલિક કાર્યોનો ધમધમાટ ફરી શરૂ થઈ જાય છે.
ધાર્મિક માન્યતા અનુસાર, આ દિવસે ભગવાન વિષ્ણુ અને માતા લક્ષ્મીજીની વિધિવિધાનપૂર્વક પૂજા-અર્ચના કરવાથી સાધકને વિશેષ શુભ ફળની પ્રાપ્તિ થાય છે તેમજ ઘરમાં સુખ-શાંતિ અને સમૃદ્ધિ જળવાઈ રહે છે. આ વ્રતનું પારણું બીજા દિવસે એટલે કે બારસ તિથિએ કરવામાં આવે છે.
દેવઉઠી એકાદશી 2026 તારીખ અને શુભ મુહૂર્ત
કાર્તક સુદ એકાદશી તિથિની શરૂઆત: 20 નવેમ્બરના રોજ સવારે 07:15 વાગ્યે
કાર્તક સુદ એકાદશી તિથિની પૂર્ણાહુતિ: 21 નવેમ્બરના રોજ સવારે 06:31 વાગ્યે
વૈદિક પંચાંગ મુજબ, દેવઉઠી એકાદશીનું વ્રત 20 નવેમ્બર 2026ના રોજ રાખવામાં આવશે.
દેવઉઠી એકાદશી વ્રત પારણા સમય
ધાર્મિક માન્યતાઓ મુજબ, એકાદશી વ્રતના પારણા શુભ મુહૂર્તમાં કરવાથી જ વ્રતનું પૂર્ણ ફળ મળે છે અને પ્રભુની કૃપા પ્રાપ્ત થાય છે. તારીખ 21 નવેમ્બરના રોજ એકાદશી વ્રતનું પારણું કરવાનો સમય બપોરે 01:10 વાગ્યાથી 03:18 વાગ્યા સુધી રહેશે. આ શુભ સમયગાળા દરમિયાન વ્રતના પારણા કરી શકાય છે.
દિવસના અન્ય મહત્ત્વપૂર્ણ શુભ મુહૂર્ત
બ્રહ્મ મુહૂર્ત: સવારે 05:01 વાગ્યાથી 05:44 વાગ્યા સુધી
વિજય મુહૂર્ત: બપોરે 01:53 વાગ્યાથી 02:35 વાગ્યા સુધી
ગોધૂલિ મુહૂર્ત: સાંજે 05:26 વાગ્યાથી 05:52 વાગ્યા સુધી
નિશિતા મુહૂર્ત: રાત્રે 11:40 વાગ્યાથી 12:34 વાગ્યા સુધી
રવિ યોગ: આખો દિવસ રહેશે (અત્યંત શુભ યોગ)
નવેમ્બર 2026માં લગ્નના શુભ મુહૂર્ત
જ્યોતિષીય ગણતરી મુજબ, દેવઉઠી એકાદશી બાદ નવેમ્બર મહિનામાં લગ્ન માટે શ્રેષ્ઠ તારીખો નીચે મુજબ છે. તારીખ 21, 24, 25 અને 26 નવેમ્બરના રોજ લગ્ન માટે અતિ શુભ સંયોગ બની રહ્યો છે. શાસ્ત્રોક્ત માન્યતા છે કે શુભ મુહૂર્તમાં લગ્ન કરવાથી દામ્પત્ય જીવનમાં આજીવન પ્રેમ અને સુખ-શાંતિ જળવાઈ રહે છે.કેલેન્ડર જુઓ
ક્યારથી ક્યાં સુધી રહે છે ચાતુર્માસ?
હિન્દુ પંચાંગ મુજબ, અષાઢ સુદ દેવશયની એકાદશીથી ચાતુર્માસનો પ્રારંભ થાય છે, જે દિવસે ભગવાન વિષ્ણુ ક્ષીરસાગરમાં 4 મહિના માટે યોગનિદ્રામાં પોઢી જાય છે. ત્યારબાદ કાર્તક સુદ દેવઉઠી એકાદશીએ ભગવાન જાગ્રત થતાં જ ચાતુર્માસ સંપન્ન થાય છે અને તમામ માંગલિક કાર્યો ખુલી જાય છે.
