Paris Olympics 2024માં આ 5 રમતોમાં મેડલ નિશ્ચિત! એફિલ ટાવર કરતા પણ ઉંચું છે ભારતીય ખેલાડીઓનું મનોબળ

પેરિસ ઓલિમ્પિક 2024ની શરૂઆતનો દિવસ આવી ગયો છે. આ વખતે 33મી ઓલિમ્પિક ગેમ્સનું આયોજન કરવામાં આવ્યું છે. ભારતીય ટીમ પેરિસ ઓલિમ્પિકમાં 117 એથ્લેટ્સનો સમાવેશ કરશે, જેઓ વિવિધ રમતોમાં ભાગ લેશે. અગાઉ, 2020 ટોક્યો ઓલિમ્પિક ભારત માટે ઐતિહાસિક રહી હતી. ટોક્યો ઓલિમ્પિકમાં ભારતે કુલ 7 મેડલ જીત્યા હતા. આ વખતે ભારતીય ખેલાડીઓ ચોક્કસપણે આ આંકડો પાર કરવા માંગશે. આ દરમિયાન અમે તમને એવી પાંચ રમતો વિશે જણાવીશું જેમાં ભારત મેડલ જીતશે તે લગભગ નિશ્ચિત છે.

જેવલિન 

આ પહેલા ટોકિયોમાં યોજાયેલી ઓલિમ્પિકમાં ભારતે એકમાત્ર ગોલ્ડ મેડલ જેવલિન થ્રોમાં જીત્યો હતો. સ્ટાર જેવલિન થ્રોઅર નીરજ ચોપરાએ ભારત માટે આ ગોલ્ડ મેડલ જીત્યો હતો. ગત વખતની જેમ આ વખતે પણ નીરજ પાસેથી ગોલ્ડ મેડલની આશા રાખવામાં આવી રહી છે. આવી સ્થિતિમાં નીરજ આ ઓલિમ્પિકમાં કેવું પ્રદર્શન કરે છે તે જોવું રસપ્રદ રહેશે.

બેડમિન્ટન

ભારતીય બેડમિન્ટન સ્ટાર પીવી સિંધુએ અત્યાર સુધીમાં 2 ઓલિમ્પિક મેડલ જીત્યા છે. તે ભારત માટે બે ઓલિમ્પિક મેડલ જીતનારી પ્રથમ મહિલા બની હતી. સિંધુએ 2016 રિયો ઓલિમ્પિકમાં સિલ્વર અને 2020 ટોક્યો ઓલિમ્પિકમાં બ્રોન્ઝ મેડલ જીત્યો હતો. હવે ફરી એકવાર પીવી સિંધુ બેડમિન્ટનમાં મેડલ લાવે તેવી અપેક્ષા રહેશે. આ વખતે ભારતીય સ્ટાર પાસેથી ગોલ્ડ મેડલની આશા રાખવામાં આવી રહી છે.

ગોલ્ફ

આ વખતે ભારતને ગોલ્ફમાં પણ મેડલ મળવાની આશા છે. ભારતની સ્ટાર ગોલ્ફર અદિતિ અશોક આ વખતે મેડલ જીતે તેવી આશા છે. અદિતિ ટોક્યો ઓલિમ્પિકમાં ગોલ્ડ જીતવાનું ચૂકી ગઈ હતી. તે ચોથા સ્થાને રહી હતી. હવે આ વખતે પેરિસ ઓલિમ્પિકમાં પૂર્વ ભારતીય ક્રિકેટર અને પ્રોફેશનલ ગોલ્ફ ટુર ઓફ ઈન્ડિયાના નવા નિયુક્ત પ્રમુખ કપિલ દેવે પણ અદિતિ અશોકના મેડલ જીતવાની વાત કરી છે.

બોક્સિંગ

બોક્સિંગમાં ભારતને બે મેડલ મળી શકે છે. સ્ટાર બોક્સર લવલિના બોરગોહેને ટોક્યો ઓલિમ્પિકમાં ભારત માટે બ્રોન્ઝ મેડલ જીત્યો હતો. પેરિસ ઓલિમ્પિકમાં 75 કિગ્રા વજન વર્ગમાં ભાગ લેનાર લવલિના આ વખતે ગોલ્ડ મેડલ જીતે તેવી આશા છે. આ સિવાય પહેલીવાર ઓલિમ્પિક માટે ક્વોલિફાય કરનાર સ્ટાર નિખત ઝરીન પણ ભારતને ગોલ્ડ અપાવી શકે છે. નિખતે 50 કિગ્રા વજન વર્ગ માટે ક્વોલીફાઈ કર્યું છે.

વેઈટ લિફ્ટિંગ

ટોક્યો ઓલિમ્પિકમાં ભારતે વેઈટ લિફ્ટિંગમાં પણ મેડલ જીત્યો હતો. મીરાબાઈ ચાનુએ 2020 ટોક્યો ઓલિમ્પિકમાં ભારત માટે સિલ્વર મેડલ જીત્યો હતો. આ વખતે પણ મીરાબાઈ ચાનુ પાસેથી મેડલની અપેક્ષા રાખવામાં આવી રહી છે.