ઓલિમ્પિકમાં ગોલ્ડ જીતવાથી એક મેચ દૂર જોકોવિચ, ફાઈનલમાં વિમ્બલ્ડન ચેમ્પિયન સામે ટકરાશે

ટેનિસ કિંગ નોવાક જોકોવિચ ઓલિમ્પિકમાં ગોલ્ડ મેડલ જીતવાથી એક મેચ દૂર છે. રવિવારે (4 ઓગસ્ટ) મેન્સ ટેનિસ સિંગલ્સમાં અલ્કારાઝ તેને પડકાર આપશે. બંને વચ્ચેની આ મેચ વિમ્બલ્ડનની ફાઈનલની યાદોને તાજી કરશે. જોકોવિચ ઓલિમ્પિક ટેનિસ ફાઈનલમાં સ્થાન મેળવનાર સૌથી મોટી ઉંમરનો ખેલાડી છે જ્યારે અલ્કારાઝ સૌથી યુવા ખેલાડી છે. બંને દિગ્ગજો વચ્ચે જોરદાર સ્પર્ધા થશે.

જોકોવિચે તેની શાનદાર કારકિર્દીમાં રેકોર્ડ 24 ગ્રાન્ડ સ્લેમ જીત્યા છે. જોકે, તેણે અત્યાર સુધી ઓલિમ્પિકમાં ગોલ્ડ મેડલ નથી જીત્યો. તે જ સમયે, સ્પેનના અલ્કારાઝે હાલમાં જ વિમ્બલ્ડનની ફાઈનલમાં જોકોવિચને સતત બીજી વખત હરાવ્યો હતો. તાજેતરના સમયમાં અલ્કારાઝ સર્બિયન સ્ટાર જોકોવિચનો સૌથી મોટા હરીફ બની ગયો છે.

જૂનમાં ફ્રેન્ચ ઓપન ચેમ્પિયન બન્યા બાદ વિમ્બલ્ડનની ફાઈનલમાં જોકોવિચ સામે સીધા સેટમાં જીત મેળવીને અલ્કારાઝે તેના ટાઈટલને ડીફેન્ડ કર્યું હતું. તેણે 2023ની વિમ્બલ્ડનની ફાઈનલમાં પણ આ અનુભવી ખેલાડીને હરાવ્યો હતો. શાનદાર ફોર્મમાં ચાલી રહેલા અલ્કારાઝે ઓલિમ્પિક સેમીફાઈનલમાં કેનેડાના ફેલિક્સ ઓગર એલિઆસીમને 6-1, 6-1થી આસાનીથી હરાવ્યો હતો. જ્યારે જોકોવિચે લોરેન્ઝો મુસેટ્ટીને 6-4, 6-2થી હરાવ્યો હતો.

જોકોવિચને બેઈજિંગ (2008) માં રાફેલ નડાલે, લંડન (2012) માં એન્ડી મરે, ટોક્યોમાં (2021) એલેક્ઝાન્ડર ઝવેરેવે ઓલિમ્પિક સેમીફાઈનલમાં હરાવ્યો હતો. તેણે 2008 ઓલિમ્પિકમાં બ્રોન્ઝ મેડલ જીત્યો હતો. ઓલિમ્પિક મેચો રોલેન્ડ ગેરોસ કોર્ટ પર રમાઈ રહી છે, જ્યાં અલ્કારાઝે આ વર્ષે ફ્રેન્ચ ઓપન ટાઈટલ જીત્યું છે. આવી સ્થિતિમાં જોકોવિચને આકરા પડકારનો સામનો કરવો પડી શકે છે.