Olympics 2024 / ટેનિસમાં ભારતની સફર એક જ દિવસમાં સમાપ્ત, મેડલની કોઈ આશા બાકી નથી

પેરિસ ઓલિમ્પિકના બીજા દિવસે ભારતે મેડલ જીત્યો અને મનુ ભાકરે દેશને ગૌરવ અપાવ્યું. આ વખતે ભારતમાંથી કુલ 117 એથ્લેટ ભાગ લઈ રહ્યા છે. એવી અપેક્ષા રાખવામાં આવે છે કે ભારત 10 કે તેથી વધુ મેડલ જીતી શકે છે. દરમિયાન ટેનિસ ઈવેન્ટમાં ભારતને નિરાશાનો સામનો કરવો પડ્યો છે.

આ ઈવેન્ટમાં ભારતની આશાઓ એક જ દિવસમાં ધરાશાયી થઈ ગઈ હતી અને ભારતીય ટેનિસ ખેલાડીઓને હારનો સામનો કરવો પડ્યો હતો. પેરિસ ઓલિમ્પિકમાં ભારતનું ટેનિસ અભિયાન માત્ર એક દિવસ ચાલ્યું હતું કારણ કે સુમિત નાગલને મેન્સ સિંગલ્સમાં અને રોહન બોપન્ના/એન શ્રીરામ બાલાજીની જોડીને મેન્સ ડબલ્સમાં હારનો સામનો કરવો પડ્યો છે.

સુમિત નાગલની મેચ

ઓલિમ્પિક 2024ના બીજા દિવસે કોર્ટ પર ઉતરનાર નાગલ પ્રથમ હતો, પરંતુ તેની મજબૂત બેઝલાઇન રમત કોરેન્ટિન મૌટેટ સામે પૂરતી ન હતી, જેણે ત્રણ સેટમાં પ્રભાવશાળી જીત મેળવી હતી. નાગલ બીજી વખત ઓલિમ્પિકમાં ભાગ લઈ રહ્યો હતો. નાગલે પ્રથમ સેટ ગુમાવ્યા બાદ કમબેક કર્યું હતું, પરંતુ તે 2-6, 6-4 અને 5-7થી હારી ગયો હતો. ટોક્યો ગેમ્સમાં, નાગલ બીજા રાઉન્ડમાં રશિયન ડેનિલ મેદવેદેવ સામે હારી ગયો હતો, પરંતુ આ વખતે તે પ્રથમ રાઉન્ડમાંથી બહાર થઈ ગયો હતો.

બોપન્ના અને બાલાજી પણ હારી ગયા

નાગલની મેચ બાદ બોપન્ના અને બાલાજી કોર્ટ પર ઉતર્યા હતા. જ્યાં તેમનો સામનો ફ્રેન્ચ જોડી એડૌર્ડ રોજર વેસલિન અને ગેલ મોનફિલ્સ સામે થયો હતો. બોપન્ના અને બાલાજીને ફ્રેન્ચ જોડી સામે 5-7, 2-6થી હારનો સામનો કરવો પડ્યો હતો.

ભારતે ટેનિસમાં માત્ર એક જ ઓલિમ્પિક મેડલ જીત્યો છે, જ્યારે લિએન્ડર પેસે 1996ની એટલાન્ટા ગેમ્સમાં બ્રોન્ઝ મેડલ જીત્યો હતો. આ કદાચ છેલ્લીવાર હતું જ્યારે બોપન્નાએ મલ્ટિ-સ્પોર્ટ ઈવેન્ટમાં ભારતનું પ્રતિનિધિત્વ કર્યું હોય. 44 વર્ષીય ખેલાડી ડેવિસ કપમાંથી નિવૃત્તિ જાહેર કરી ચૂક્યો છે.

ડબલ્સ મેચમાં, બોપન્ના અને ફ્રાન્સના બંને ખેલાડીઓ વચ્ચે ઘણી ઉગ્ર બોલાચાલી થઈ હતી, પરંતુ અંતે તેઓ નિરાશ થયા હતા. આ વખતે ભારત ટેનિસમાં માત્ર મેન્સ સિંગલ્સ અને મેન્સ ડબલ્સમાં જ ભાગ લઈ રહ્યું હતું. જેની સફર હવે સમાપ્ત થઈ ગઈ છે. આ સાથે જ આ ઈવેન્ટમાં ભારતની મેડલની આશા પણ સમાપ્ત થઈ ગઈ છે.