VIDEO: ન્યૂ સીમાપુરીમાં ઈમારત ધરાશાયી
છેલ્લું અપડેટ : 08 Oct 2026
દિલ્હીના સીમાપુરી વિસ્તારમાં બુધવારે મોડી રાત્રે મોટી દુર્ઘટના સર્જાઈ હતી. માત્ર 25 વારના પ્લોટ પર બનેલી ચાર માળની જર્જરિત ઈમારત અચાનક ધરાશાયી થઈને કાટમાળમાં ફેરવાઈ ગઈ હતી. આ અકસ્માતમાં સગર્ભા મહિલા અને બે બાળકો સહિત કુલ ત્રણ લોકોનાં કરુણ મોત થયા છે. જ્યારે કાટમાળ નીચે ફસાયેલા 11 લોકોને રેસ્ક્યૂ કરીને હોસ્પિટલમાં સારવાર માટે ખસેડવામાં આવ્યા છે.
ઈમારત ધરાશાયી થતાં અફરાતફરી, તાત્કાલિક રેસ્ક્યૂ ઓપરેશન શરૂ
ઘટનાની જાણ થતાં જ ફાયર બ્રિગેડની ચાર ગાડીઓ અને સ્થાનિક પોલીસની ટીમ તાત્કાલિક ઘટનાસ્થળે પહોંચી ગઈ હતી. ઈમારતના કાટમાળમાં અનેક લોકો દટાયા હોવાની માહિતી મળતાં જ બચાવ કામગીરી શરૂ કરવામાં આવી હતી. ફાયર બ્રિગેડ અને પોલીસે સંયુક્ત રીતે કાટમાળ હટાવીને લોકોને બહાર કાઢવાનું શરૂ કર્યું હતું.
ડીસીપી આર. મીણાના જણાવ્યા અનુસાર, કાટમાળ નીચે ફસાયેલા લોકોને બહાર કાઢવા માટે તાત્કાલિક મોટા પાયે રેસ્ક્યૂ ઓપરેશન હાથ ધરવામાં આવ્યું હતું. બચાવ કામગીરી દરમિયાન કુલ 11 ઈજાગ્રસ્તોને બહાર કાઢવામાં આવ્યા હતા. તમામને સારવાર માટે રાજીવ ગાંધી હોસ્પિટલમાં ખસેડવામાં આવ્યા છે.
રેસ્ક્યૂ કરાયેલા લોકોમાં 3 વર્ષના બાળકના માતા-પિતા ઉપરાંત 56 વર્ષીય મોમિન મિર્ઝા, 28 વર્ષીય અબ્દુલ રહેમાન, 50 વર્ષીય સલમા સહિત અન્ય લોકોનો સમાવેશ થાય છે. ઈજાગ્રસ્તોની હોસ્પિટલમાં સારવાર ચાલી રહી છે.
સગર્ભા મહિલા અને બે બાળકોનાં મોતથી સીમાપુરીમાં શોક
આ ભયાનક દુર્ઘટનામાં ત્રણ લોકોએ જીવ ગુમાવ્યા છે. મૃતકોમાં 21 વર્ષીય ગુલફસાનો સમાવેશ થાય છે, જે ચાર મહિનાની સગર્ભા હતી. આ ઉપરાંત 12 વર્ષની બાળકી અને એક અન્ય બાળકનું પણ મોત થયું છે. એક જ પરિવાર અને વિસ્તારમાં બનેલી આ ઘટનાથી સ્થાનિકોમાં શોકની લાગણી ફેલાઈ ગઈ છે.
ઈમારત ધરાશાયી થતાં સીમાપુરી ગોળ ચક્કર અને ડીએલએફ ભોપુરા રોડ પર ભારે ટ્રાફિક જામ સર્જાયો હતો. બચાવ કામગીરીને ધ્યાનમાં રાખીને ટ્રાફિક પોલીસે લોકોને આ રસ્તા પર જવાનું ટાળવા અને એમ્બ્યુલન્સ તથા રેસ્ક્યૂ વાહનો માટે રસ્તો ખુલ્લો રાખવાની અપીલ કરી હતી.
ફરી સવાલોના ઘેરામાં જૂની ઈમારતો અને ગેરકાયદે બાંધકામ
દિલ્હીમાં ઈમારતો ધરાશાયી થવાની ઘટનાઓ વચ્ચે હવે જૂની અને જર્જરિત ઈમારતો તેમજ અનધિકૃત બાંધકામ સામે તંત્રની કામગીરી પર ફરી સવાલો ઊભા થયા છે. નોંધનીય છે કે ગયા મહિને 17 સપ્ટેમ્બર 2026ના રોજ દક્ષિણ દિલ્હીના સત્ય નિકેતન વિસ્તારમાં પાંચ માળની પીજી ઈમારત ધરાશાયી થઈ હતી. આ ઘટનામાં પાંચ વિદ્યાર્થીઓ સહિત સાત લોકોનાં મોત થયા હતા.
સત્ય નિકેતનની દુર્ઘટના બાદ એમસીડીના પાંચ અધિકારીઓને સસ્પેન્ડ કરવામાં આવ્યા હતા. ત્યારબાદ દિલ્હી સરકારે જૂની ઈમારતોનું સ્ટ્રક્ચરલ ઓડિટ કરવા તેમજ અનધિકૃત પાંચ માળની ઈમારતોને સીલ કરવાની સૂચના આપી હતી.
પરંતુ હવે સીમાપુરીમાં ચાર માળની ઈમારત ધરાશાયી થતાં દિલ્હીમાં જર્જરિત ઈમારતો અને અનધિકૃત બાંધકામ સામે તંત્રની દેખરેખ તથા કાર્યવાહી પર ફરી ગંભીર પ્રશ્નો ઊભા થયા છે. ત્રણ લોકોનાં મોત અને 11 લોકો ઘાયલ થવાની આ ઘટના બાદ વિસ્તારમાં સુરક્ષા વ્યવસ્થાને લઈને પણ ચિંતા વધી છે.
