શા માટે ઉજવવામાં આવે છે Valentine's Day? જાણો આ ઉજવણી પાછળ છુપાયેલું રોમન કનેક્શન

વેલેન્ટાઈન વીકનો છેલ્લો અને સૌથી ખાસ દિવસ - પ્રેમી પંખીડાઓની પ્રતીક્ષા હવે પૂરી થવા જઈ રહી છે! જેમ જેમ વેલેન્ટાઈન વીક પૂર્ણ થાય છે, તેમ તેમ વિશ્વભરના લોકો 14 ફેબ્રુઆરીએ વેલેન્ટાઈન ડે 2026 ઉજવવાની તૈયારીઓમાં લાગી જાય છે. આ વેલેન્ટાઈન વીકનો અંતિમ અને સૌથી યાદગાર દિવસ હોય છે.

પોતાની જાતને પ્રેમ કરવો પણ છે જરૂરી

માત્ર કપલ્સ જ નહીં, પરંતુ ઘણા લોકો વલેન્ટાઈન ડેને 'સેલ્ફ-લવ' ડે તરીકે પણ ઉજવે છે. આ દિવસે તેઓ પોતાનું ધ્યાન રાખે છે, પોતાની મનપસંદ વસ્તુઓ ખરીદે છે અથવા એવા કામ કરે છે જે તેમને ખુશી આપે છે. તમે સિંગલ હોવ કે રિલેશનશિપમાં, વેલેન્ટાઈન ડેનો અસલી અર્થ પ્રેમનો અહેસાસ કરવો અને તેને સેલિબ્રેટ કરવાનો છે. આ દિવસ સંપૂર્ણપણે પ્રેમના નામે છે.

વેલેન્ટાઈન ડેની શરૂઆત ક્યાંથી થઈ?

વેલેન્ટાઈન ડેના મૂળ પ્રાચીન રોમન તહેવાર ‘લૂપરકાલિયા’ સાથે જોડાયેલા છે. આ તહેવાર ફેબ્રુઆરીના મધ્યમાં મનાવવામાં આવતો અને તે વસંતના આગમનનું પ્રતીક હતો. પાછળથી પોપ ગેલેસિયસ ફર્સ્ટએ આ તહેવારને સમાપ્ત કરી તેને 'સેન્ટ વેલેન્ટાઈન ડે' તરીકે ઉજવવાની શરૂઆત કરી. આશરે 14મી સદીથી આ દિવસ રોમાંસ અને પ્રેમ સાથે જોડાઈ ગયો.

વેલેન્ટાઈન ડે સાથે જોડાયેલી વાર્તાઓ

 વેલેન્ટાઈન ડેને લઈને ઘણી વાર્તાઓ પ્રચલિત છે. એક માન્યતા અનુસાર, સેન્ટ વેલેન્ટાઈન એક પાદરી હતા, જેમણે રાજાના આદેશ વિરુદ્ધ જઈને છૂપી રીતે પ્રેમી યુગલોના લગ્ન કરાવ્યા હતા. રાજા નહોતા ઈચ્છતા કે યુવાન પુરુષો લગ્ન કરે, જેથી તેઓ યુદ્ધમાં ન જઈ શકે. આ જ કારણસર સેન્ટ વેલેન્ટાઈનને સજા આપવામાં આવી હતી. એવું માનવામાં આવે છે કે તેમણે જેલમાંથી તેમના મિત્રને એક પત્ર લખ્યો હતો, જેના પર લખ્યું હતું – **“From your Valentine.”**

કાર્ડ, ગુલાબ અને ચોકલેટની પરંપરા કેવી રીતે શરૂ થઈ?

1500ના દાયકામાં લોકો આ દિવસે પોતાના ખાસ વ્યક્તિઓને હાથથી લખેલા સંદેશા મોકલવા લાગ્યા હતા. ધીરે ધીરે હાથથી બનાવેલા કાર્ડ્સની જગ્યા કોમર્શિયલ કાર્ડ્સે લઈ લીધી. સમય જતાં લાલ ગુલાબ, ચોકલેટ અને હૃદયના આકારે પોતાની આગવી ઓળખ બનાવી લીધી.

પોતાના પ્રિયજનો માટે કંઈક ખાસ કરવાની તક ઝડપીને, આ દિવસે લોકો તેમના પાર્ટનર, ક્રશ અથવા જેને તેઓ પસંદ કરે છે, તેમના પ્રત્યે પ્રેમ વ્યક્ત કરવામાં કોઈ કસર છોડતા નથી. ગિફ્ટ આપવી, રોમેન્ટિક ડેટ્સ પર જવું અને મોટા સરપ્રાઈઝ પ્લાન કરવા - આ જ તો આ દિવસની વિશેષતા છે. હેતુ માત્ર એક જ હોય છે: પોતાના દિલની વાત કહેવી.

સંપૂર્ણ વેલેન્ટાઈન વીક

વેલેન્ટાઈન ડે પહેલા આખું અઠવાડિયું પ્રેમને સમર્પિત હોય છે, જેને વેલેન્ટાઈન વીક કહેવામાં આવે છે:

* રોઝ ડે
* પ્રપોઝ ડે
* ચોકલેટ ડે
* ટેડી ડે
* પ્રોમિસ ડે
* હગ ડે
* કિસ ડે
* 14 ફેબ્રુઆરી: વલેન્ટાઈન ડે 

આજના સમયમાં વેલેન્ટાઈન ડેનો અર્થ

આજે વલેન્ટાઈન ડે માત્ર કપલ્સ સુધી સીમિત નથી. મિત્રો, પરિવાર અને પોતાના ખાસ લોકો માટે પ્રેમ વ્યક્ત કરવાની આ એક સુંદર તક બની ગઈ છે. આ દિવસ યાદ અપાવે છે કે સંબંધોમાં પ્રેમની સાથે સન્માન પણ એટલું જ જરૂરી છે.