ગણેશ ચતુર્થીનો તહેવાર આવી રહ્યો છે, તમે બનાવી શકો છો ભારતના પ્રસિદ્ધ ગણપતી મંદિરના દર્શન કરવાનો પ્લાન

હિંદુ ધર્મમાં જ્યારે પણ કોઈ કાર્ય શરૂ થાય છે ત્યારે તેની પહેલા ભગવાન ગણેશને આમંત્રિત કરવામાં આવે છે. કહેવાય છે કે ભગવાન ગણેશના આશીર્વાદથી કોઈપણ કાર્યની શરૂઆત કરવામાં આવે તો તે કાર્ય સરળતાથી પૂર્ણ થાય છે.

ભાદરવા મહિનામાં શુક્લ પક્ષની ચોથને ગણેશ ચતુર્થી કહેવાય છે. આ વર્ષે આ તિથી 7 સપ્ટેમ્બરે આવી રહી છે. દર વર્ષે, આ દિવસથી 10 દિવસનો ગણેશ ઉત્સવ શરૂ થાય છે. ગણેશ ચતુર્થીના દિવસે લોકો બાપ્પાને ખૂબ જ ધામધૂમથી ઘરે લાવે છે અને ઢોલ વગાડીને તેમની સ્થાપના કરે છે. ગણેશ ચતુર્થીની ઉજવણી દેશભરમાં જોવા મળે છે.

જો તમે ગણેશોત્સવ નિમિત્તે ક્યાંક ફરવા જવાનું વિચારી રહ્યા છો, તો તમે દેશના સૌથી મોટા અને સૌથી જૂના ગણપતિ મંદિરોની મુલાકાત લઈ શકો છો.

સિદ્ધિવિનાયક મંદિર, મુંબઈ

મહારાષ્ટ્રના મુંબઈમાં સ્થિત સિદ્ધિવિનાયક મંદિરના દર્શન કરવા લોકો દૂર-દૂરથી આવે છે. આ મંદિરની સ્થાપના 1801માં કરવામાં આવી હતી. એવું માનવામાં આવે છે કે જે લોકો સિદ્ધિવિનાયક મંદિરમાં નિષ્ઠાપૂર્વક પ્રાર્થના કરે છે તેમની મનોકામનાઓ પૂર્ણ થાય છે. આ જ કારણ છે કે દેશ વિદેશથી પણ લોકો બાપ્પાના દર્શન કરવા આવે છે.

ચિંતામણ ગણેશ મંદિર, ઉજ્જૈન

જો કે ઉજ્જૈનને મહાકાલની નગરી કહેવામાં આવે છે, પરંતુ અહીં પણ મહાકાલના પુત્ર ભગવાન શ્રી ગણેશનું પ્રાચીન મંદિર છે. મંદિરના ગર્ભગૃહમાં ભગવાન ગણેશની ત્રણ મૂર્તિઓ સ્થાપિત છે. આમાંથી પ્રથમ ચિંતામણ, બીજી ઇચ્છામન અને ત્રીજી સિદ્ધિવિનાયક ગણેશ મૂર્તિ છે. જો તમે મહાકાલના દર્શન કરવા જઈ રહ્યા છો તો ચિંતામણ ગણેશ મંદિરની પણ મુલાકાત લો.

ગણપતિપુલે મંદિર, રત્નાગીરી

મહારાષ્ટ્રના કોંકણમાં રત્નાગીરી જિલ્લામાં આવેલું ભગવાન ગણેશનું આ મંદિર ઘણું પ્રખ્યાત છે. એવું માનવામાં આવે છે કે અહીં સ્થાપિત બાપ્પાની મૂર્તિની કુદરતી રીતે સ્થાપના થઈ છે. આ મૂર્તિ લગભગ 400 વર્ષ જૂની છે. આવી સ્થિતિમાં લોકો આખા વર્ષ દરમિયાન આ મંદિરમાં બાપ્પાના દર્શન કરવા આવે છે. જો તમે પણ ઈચ્છો છો તો આ ગણેશોત્સવમાં બાપ્પાના દર્શન કરવાનો પ્લાન બનાવો.

ત્રિનેત્ર મંદિર, રણથંભોર

રાજસ્થાનના રણથંભોરમાં સ્થિત ત્રિનેત્ર મંદિર દેશનું સૌથી જૂનું ગણપતિ મંદિર કહેવાય છે. આ સાથે, સમગ્ર વિશ્વમાં આ એકમાત્ર ગણેશ મંદિર છે, જ્યાં શ્રી ગણેશની ત્રણ આંખોવાળી મૂર્તિ છે. આ સાથે જ આ મંદિરમાં ગણપતિ બાપ્પા તેમના સમગ્ર પરિવાર સાથે બિરાજમાન છે.

દગડુશેઠ હલવાઈ ગણપતિ, પુણે

જો તમે પુણેમાં અથવા તેની આસપાસ રહો છો, તો તમારે શ્રીમંત દગડુશેઠ હલવાઈ ગણપતિ મંદિરની મુલાકાત અવશ્ય લેવી જોઈએ. આ પ્રસિદ્ધ મંદિરમાં 7.5 ફૂટ ઉંચી અને 4 ફૂટ પહોળી ગણપતિની વિશાળ મૂર્તિ સ્થાપિત છે, જેને કિંમતી સોનાના આભૂષણોથી શણગારવામાં આવી છે.