Recipe : ગુલાબના ફૂલોનો આ રીતે કરો શ્રેષ્ઠ ઉપયોગ: ઘરે જ બનાવો બજાર જેવું શુદ્ધ ગુલકંદ
છેલ્લું અપડેટ : 16 Feb 2026
ઘરમાં પુષ્કળ ગુલાબના ફૂલો ભેગા થઈ ગયા છે અને તમે આ સુંદર ફૂલોનો ઉપયોગ કરવા માંગો છો? તો તેમાંથી ગુલકંદ તૈયાર કરીને રાખી લો. જે આવનારા ઉનાળામાં તમારા શરબત અને ડેઝર્ટની સુગંધ અને સ્વાદમાં વધારો કરશે. એટલું જ નહીં, હોળીના અવસરે તમે આ ગુલકંદમાંથી સ્વાદિષ્ટ લાડુ પણ તૈયાર કરી શકો છો. તો બસ, આ રીતે બનાવીને રાખી લો હોમમેડ ગુલકંદ.
ગુલકંદ બનાવવાની રીત
- જરૂરી સામગ્રી:
- ગુલાબની પાંખડીઓ
- સાકર (ખડી સાકર)
- 2 ચમચી વરિયાળી
- 1 ચમચી એલચી પાવડર
- કાચની બરણી (જાર)
1. ફૂલની સફાઈ: સૌથી પહેલા ગુલાબની પાંખડીઓમાંથી પાંદડા અને ડીંટડા કાઢીને તેને બિલકુલ અલગ કરી લો.
2. ધોવાની રીત: પાંખડીઓને ધોવા માટે એક મોટા વાસણમાં પાણી લો અને તેમાં પાંખડીઓ નાખીને હળવા હાથે ધોઈ લો. ત્યારબાદ તેને કાઢીને એક સાફ કપડા પર ફેલાવી દો.
3. સુકવવી: પાંખડીઓને સારી રીતે સુકાવા દો જેથી તેમાં પાણી ન રહે. જો પાણી રહી જશે તો ગુલકંદ બગડી શકે છે.
4. સાકરનો પાવડર: સાકરને મિક્સર જારમાં પીસીને પાવડર બનાવી લો.
5. સ્તર (Layering) બનાવવું: હવે એક કાચની બરણી લો. તેમાં સૌથી પહેલા ગુલાબની પાંખડીઓનું એક સ્તર પાથરો.
6. તેની ઉપર પીસેલી સાકરનું એક સ્તર પાથરો.
7. મસાલા ઉમેરવા: ફરીથી ગુલાબની પાંખડીઓ અને સાકરનું સ્તર બનાવો. આ સ્તરોની વચ્ચે થોડી વરિયાળી અને બીજી લેયરમાં એલચી પાવડર ઉમેરતા રહો. આ જ રીતે બધી પાંખડીઓ અને સાકર પૂરી થાય ત્યાં સુધી સ્તર બનાવો.
8. તડકામાં રાખવું: બરણીને એક સાફ અને કોરા સુતરાઉ કાપડથી ઢાંકી દો. તેને લગભગ 8 દિવસ સુધી તડકામાં રાખો.
9. તૈયાર: આટલા દિવસોમાં ગુલકંદ સારી રીતે બનીને તૈયાર થઈ જશે. ત્યારબાદ કાપડ હટાવી બરણીનું ઢાંકણું બંધ કરીને રાખી દો.
