Recipe : ટામેટાનો પુલાવ એકવાર આ રીતે બનાવશો તો આંગળા ચાટતા રહી જશો!
છેલ્લું અપડેટ : 10 Feb 2026
ઘણીવાર જ્યારે ઘરે શાકભાજીની અછત હોય અથવા તમને કંઈક મસાલેદાર અને હળવું ખાવાની ઈચ્છા હોય, ત્યારે ટામેટા પુલાવ એક શ્રેષ્ઠ વિકલ્પ છે. આ દક્ષિણ ભારતીય વાનગી ફક્ત દેખાવમાં જ આકર્ષક નથી, પરંતુ ટામેટાં અને મસાલાઓની સુગંધ તેને બાળકોથી લઈને પુખ્ત વયના લોકો સુધી દરેકમાં પ્રિય બનાવે છે. ટામેટાનો પુલાવ (Tomato Pulao) એક ઝડપી, સ્વાદિષ્ટ અને સુગંધિત વાનગી છે. તે લંચ બોક્સ કે ડિનર માટે ઉત્તમ વિકલ્પ છે.
જરૂરી સામગ્રી:
ચોખા: 1 કપ બાસમતી ( અડધો કલાક પલાળેલા)
ટામેટા: 1 નંગ (ઝીણા સમારેલા)
ડુંગળી: 1 નંગ (લાંબી સમારેલી)
આદુ-લસણની પેસ્ટ: 1 ચમચી
લીલા મરચાં: 1
વઘાર માટે: 2 ચમચી તેલ અથવા ઘી, 1 ચમચી જીરું, 1 તજની લાકડી, 2 લવિંગ, 1 તમાલપત્ર.
મસાલા: 1/4 ચમચી હળદર, 1 ચમચી લાલ મરચું, 1 ચમચી ધાણાજીરું, 1/2 ચમચી ગરમ મસાલો અને મીઠું (સ્વાદ મુજબ).
પાણી: 1.5 થી 2 કપ.
બનાવવાની રીત:
વઘાર કરો: એક કુકરમાં તેલ અથવા ઘી ગરમ કરો. તેમાં જીરું, તજ, લવિંગ અને તમાલપત્ર ઉમેરીને સાંતળો.
શાકભાજી સાંતળો: હવે તેમાં સમારેલી ડુંગળી અને લીલા મરચાં ઉમેરો. ડુંગળી ગુલાબી થાય ત્યાં સુધી સાંતળો. ત્યારબાદ આદુ-લસણની પેસ્ટ ઉમેરી 1 મિનિટ હલાવો.
ટામેટા અને મસાલા: હવે તેમાં સમારેલા ટામેટા ઉમેરો. ટામેટા થોડા નરમ થાય એટલે હળદર, લાલ મરચું, ધાણાજીરું અને મીઠું ઉમેરીને બરાબર મિક્સ કરો. ટામેટામાંથી તેલ છૂટું પડે ત્યાં સુધી ચડવા દો.
ચોખા ઉમેરો: હવે પલાળેલા ચોખા (પાણી નિતારીને) ઉમેરો અને હળવા હાથે મસાલા સાથે 1 મિનિટ મિક્સ કરો.
પાણી અને ગરમ મસાલો: 1.5 થી 2 કપ પાણી ઉમેરો (ચોખાના પ્રકાર મુજબ). ઉપરથી ગરમ મસાલો અને થોડી સમારેલી કોથમીર ઉમેરો.
કુકર બંધ કરો: કુકરનું ઢાંકણ બંધ કરી મધ્યમ આંચ પર 2 સીટી વગાડો.
સર્વ કરો: કુકરની હવા આપમેળે નીકળી જાય પછી જ ખોલો. ગરમાગરમ ટામેટાનો પુલાવ રાયતા, પાપડ કે દહીં સાથે સર્વ કરો.
ખાસ ટિપ્સ:
જો તમારે પુલાવ વધુ હેલ્ધી બનાવવો હોય તો તેમાં વટાણા કે પનીરના ટુકડા પણ ઉમેરી શકો છો.
ટામેટા સાથે થોડો પુદીનો ઉમેરવાથી પુલાવની સુગંધ ખૂબ જ સરસ આવે છે.
