Recipe : મહેમાન આવે કે બાળકોનું લંચ બોક્સ, 5 મિનિટમાં બનાવો બ્રેડ-દહીંની આ ખાટી-મીઠી વાનગી
છેલ્લું અપડેટ : 15 Feb 2026
ઘરમાં મહેમાન અચાનક આવી જાય કે બાળકોના લંચ બોક્સ માટે મૂંઝવણ હોય, બ્રેડ અને દહીંથી બનતી આ રેસીપી તમારી મુશ્કેલી મિનિટોમાં હલ કરી દેશે. તો ચાલો બનાવીએ બ્રેડ-દહીંની ખાટી-મીઠી રેસીપી.
સામગ્રી
- બ્રેડ સ્લાઈસ 5 નંગ
- દહીં 1 કપ
- લાલ મરચું પાવડર 1 ચમચી
- હળદર ¼ ચમચી
- મીઠું સ્વાદ મુજબ
- આંબલીની ચટણી સ્વાદ મુજબ (ચટાકેદાર)
- હિંગ ચપટીભર
- છીણેલું આદુ ½ ચમચી
- ડુંગળી થોડી સ્લાઈસ
- કોથમીર ગાર્નિશિંગ માટે
- તેલ 2 ચમચી
બનાવવાની રીત
સૌ પ્રથમ એક બાઉલમાં દહીં લો અને તેમાં બધા મસાલા ઉમેરીને બરાબર ફેંટી લો. જો દહીં વધુ પડતું ઘટ્ટ લાગે, તો તેની ઘટ્ટ સરખી કરવા માટે તમે થોડું પાણી પણ ઉમેરી શકો છો.
હવે બ્રેડની સ્લાઈસને નાના-નાના ટુકડામાં કાપી લો. આ ટુકડાઓને દહીંના મિશ્રણમાં બોળીને (ડિપ કરીને) એક અલગ પ્લેટમાં કાઢી લો.
ત્યારબાદ એક મોટા નોન-સ્ટિક પેનમાં થોડું તેલ ગરમ કરો. તેમાં હિંગ અને આદુ ઉમેરીને થોડી સેકન્ડ માટે સાંતળો.
હવે પેનમાં ડુંગળીની સ્લાઈસ ઉમેરો અને તે હળવી ગુલાબી (ગોલ્ડન બ્રાઉન) થાય ત્યાં સુધી સાંતળો.
ડુંગળી સંતળાઈ જાય એટલે તેમાં બ્રેડનું મિશ્રણ ઉમેરો અને 1-2 મિનિટ માટે ધીમા તાપે હળવું સોનેરી થાય ત્યાં સુધી શેકો. વચ્ચે-વચ્ચે તેને હલાવતા રહો જેથી તે ચોંટી ન જાય.
છેલ્લે તેની ઉપર આંબલીની ચટપટી ચટણી અને ઝીણી સમારેલી કોથમીર ભભરાવીને ગાર્નિશ કરો.
કુકિંગ ટિપ્સ
ચટાકેદાર દહીંવાળી બ્રેડ બનાવવા માટે તમે વ્હાઈટ બ્રેડ અથવા હોલ ગ્રેન (બ્રાઉન) બ્રેડનો ઉપયોગ કરી શકો છો.
ખાસ ધ્યાન રાખવું કે દહીં બહુ વધારે ખાટું અથવા વાસી ન હોવું જોઈએ. તાજું દહીં લેવાથી સ્વાદ વધુ સારો આવશે.
તમે તમારા સ્વાદ મુજબ મસાલાનું પ્રમાણ ઓછું કે વધારે કરી શકો છો.
ડુંગળીની સાથે તમે આમાં તમારી પસંદગીના અન્ય શાકભાજી (જેમ કે કેપ્સિકમ કે ગાજર) પણ ઉમેરી શકો છો.
આ વાનગીનો અસલી સ્વાદ ગરમાગરમ પીરસવામાં જ આવે છે, તેથી તેને બનાવીને તરત જ સર્વ કરો.
ચટણી અને કોથમીરની સાથે તમે ઉપરથી ઝીણી સેવ અથવા ચાટ મસાલો પણ છાંટી શકો છો. આનાથી તમને એકદમ 'ચાટ' જેવો ચટાકેદાર સ્વાદ મળશે.