Recipe : હેલ્ધી અને ટેસ્ટી નાસ્તો: ફણગાવેલા મગ અને લીલી ડુંગળીની ટિક્કી, ડાયેટિંગ કરનારાઓ માટે બેસ્ટ રેસીપી
છેલ્લું અપડેટ : 26 Apr 2026
જો તમે ડાયેટિંગ પર હોવ અથવા સવારના નાસ્તામાં કંઈક પૌષ્ટિક ખાવા માંગતા હોવ, તો ફણગાવેલા મગની ટિક્કી એક ઉત્તમ પસંદગી છે. આ ટિક્કી ઓછા તેલમાં બને છે અને લાંબા સમય સુધી પેટ ભરેલું રાખે છે. તેનો સ્વાદ કટલેટ જેવો લાગે છે અને તે ડાયાબિટીસના દર્દીઓ માટે પણ ખૂબ જ ફાયદાકારક છે.
ફણગાવેલા મગ અને લીલી ડુંગળીની ટિક્કીની રેસીપી:
સામગ્રી:
- ફણગાવેલા મગ: 1.5 કપ
- લીલી ડુંગળી (સમારેલી): 1/2 કપ
- લીલા મરચાં (સમારેલા): 2 ચમચી
- લસણ (ઝીણું સમારેલું): થોડું
- ઓટ્સનો લોટ: 1/4 કપ (બાઈન્ડિંગ માટે)
- મીઠું: સ્વાદ મુજબ
- તેલ: શેકવા માટે (ખૂબ ઓછું)
બનાવવાની રીત
સ્ટેપ 1 : મગને પીસી લો
સૌ પ્રથમ 1.5 કપ ફણગાવેલા આખા મગ લો. તેને મિક્સરમાં નાખી થોડું પાણી ઉમેરીને અધકચરું પીસી લો. આ પેસ્ટને એક ઊંડા બાઉલમાં કાઢી લો.
સ્ટેપ 2: બધી સામગ્રી મિક્સ કરો
હવે આ પેસ્ટમાં અડધો કપ ઝીણી સમારેલી લીલી ડુંગળી, 2 ચમચી લીલા મરચાં, સમારેલું લસણ, 1/4 કપ ઓટ્સનો લોટ અને સ્વાદ મુજબ મીઠું નાખીને બધી વસ્તુઓ બરાબર મિક્સ કરી લો. ઓટ્સનો લોટ ટિક્કીને યોગ્ય આકાર આપવામાં મદદ કરશે.
સ્ટેપ 3: ટિક્કી તૈયાર કરો
તૈયાર મિશ્રણમાંથી તમને ગમતા આકારની નાની-નાની ટિક્કી અથવા કટલેટ બનાવી લો. હવે એક નોન-સ્ટિક તવા પર થોડું તેલ લગાવો અને ટિક્કીને બંને બાજુથી સુવર્ણ બદામી (ગોલ્ડન બ્રાઉન) રંગની થાય ત્યાં સુધી શેકી લો.
સ્ટેપ 4: સર્વ કરવાની રીત
જો ટિક્કીને વધુ ક્રિસ્પી બનાવવી હોય તો ગેસની ફ્લેમ મધ્યમ રાખવી, જેથી તે અંદર સુધી બરાબર શેકાઈ જાય. ગરમાગરમ ટિક્કીને લીલી ચટણી કે સોસ સાથે પીરસો.
