Recipe : સ્વાદમાં બેસ્ટ, હેલ્થમાં સુપર! ઘરે બનાવો ઢાબા સ્ટાઈલ લસણીયા પાલક
છેલ્લું અપડેટ : 19 Apr 2026
જો તમે દરરોજની સાદી પાલકની સબ્જી ખાઈને કંટાળી ગયા હોવ અને કંઈક નવું ટ્રાય કરવા માંગતા હોવ, તો લસણીયા પાલક તમારા માટે એકદમ પરફેક્ટ રેસીપી છે. આ વાનગી જેટલી સરળ છે, તેટલી જ સ્વાદમાં દમદાર છે. પાલકની તાજગી અને લસણની તેજ સુગંધ મળીને એવો સ્વાદ આપે છે કે તમે વારંવાર બનાવવાનું મન કરશો.
જરૂરી સામગ્રી
- પાલક: 1 મોટો બાઉલ (બાફીને ઝીણી સમારેલી)
- લસણ: 2 ચમચી (ઝીણું સમારેલું)
- ઘી: 1 થી 2 ચમચી
- ડુંગળી: 1 નંગ (ઝીણી સમારેલી)
- મસાલા: જીરું, હળદર, લાલ મરચું પાવડર અને મીઠું (સ્વાદ મુજબ)
- અન્ય: લીલા મરચાં, આખા લાલ મરચાં
બનાવવાની રીત
પાલક તૈયાર કરવાની રીત
સૌ પ્રથમ પાલકને બરાબર ધોઈ લો. ત્યારબાદ તેને હળવી બાફી લો (બ્લાન્ચ કરો) જેથી તેનો કાચો સ્વાદ નીકળી જાય. ધ્યાન રાખવું કે પાલકને વધુ પડતી ન ઉકાળવી, નહીંતર તેનો લીલો રંગ ઝાંખો પડી શકે છે. બાફ્યા પછી તેને ઠંડી કરી ઝીણી સમારી લો.
લસણ અને મસાલાનો વઘાર
એક કડાઈમાં ઘી ગરમ કરો અને તેમાં જીરું નાખો. જીરું તતડે એટલે તેમાં પુષ્કળ ઝીણું સમારેલું લસણ અને આખા લાલ મરચાં ઉમેરો. લસણને હળવું ગુલાબી કે સોનેરી થાય ત્યાં સુધી સાંતળો. આ સ્ટેપ આ વાનગીનો સૌથી મહત્વનો ભાગ છે, કારણ કે અહીંથી જ અસલી સુગંધ આવશે.
ડુંગળી અને મસાલા
હવે તેમાં સમારેલી ડુંગળી ઉમેરો અને તેને આછી ગુલાબી થાય ત્યાં સુધી સાંતળો. ત્યારબાદ લીલા મરચાં, હળદર અને લાલ મરચું પાવડર ઉમેરી થોડી સેકન્ડ માટે હલાવો. મસાલા બળી ન જાય તેનું ધ્યાન રાખવું.
પાલક ઉમેરીને પકાવો
તૈયાર કરેલી પાલક અને સ્વાદ મુજબ મીઠું ઉમેરો. તેને મધ્યમ આંચ પર થોડી મિનિટો સુધી પકાવો જેથી પાલક અને મસાલા એકરસ થઈ જાય.
સ્પેશિયલ ફાઈનલ વઘાર (તડકો)
સબ્જીનો સ્વાદ અને દેખાવ વધારવા માટે છેલ્લે એક નાના પેનમાં થોડું ઘી ગરમ કરો. તેમાં જીરું અને લસણની કળીઓ નાખી સોનેરી થાય ત્યાં સુધી સાંતળો. આ ગરમાગરમ વઘારને તૈયાર થયેલી સબ્જી ઉપર રેડો. આનાથી લસણની અદભૂત સુગંધ આખા ઘરમાં ફેલાઈ જશે.
કેવી રીતે સર્વ કરશો?
આ લસણીયા પાલકને ગરમાગરમ રોટલી, પરાઠા કે બાજરીના રોટલા સાથે સર્વ કરો. તેની ઉપર જો ઈચ્છો તો થોડું માખણ કે ક્રીમ પણ નાખી શકાય છે.
