Recipe : કેસરી નંદન માટે કેસરી પ્રસાદ: ઘરે જ બનાવો શુદ્ધ દેશી ઘીના મોતીચૂરના લાડુ
છેલ્લું અપડેટ : 02 Apr 2026
હનુમાન જન્મોત્સવ દેશભરમાં ૨ એપ્રિલના રોજ ખૂબ જ ઉત્સાહ અને શ્રદ્ધા સાથે ઉજવવામાં આવી રહ્યો છે. આ દિવસે હનુમાનજીના મંદિરોમાં ભક્તોની ભીડ ઉમટી પડે છે. હનુમાનજીના પ્રિય ભોગમાં મોતીચૂરના લાડુનો પણ સમાવેશ થાય છે. કેસરી રંગના આ નાના-નાના દાણાવાળા લાડુ માત્ર દેખાવમાં જ આકર્ષક નથી હોતા, પણ સ્વાદમાં પણ લાજવાબ હોય છે. જો તમે આ શુભ પ્રસંગે ઘરે જ શુદ્ધ રીતે મોતીચૂરના લાડુ બનાવવા માંગતા હોવ, તો અહીં જાણો સરળ રેસીપી.
સામગ્રી
- ચણાનો લોટ (બેસન): 2 કપ
- ખાંડ: 1.5 કપ (ચાશણી માટે)
- દેશી ઘી: તળવા માટે
- તરબૂચના બી (મગજતરી): 2 મોટી ચમચી
- એલચી પાવડર: 1 નાની ચમચી
- કેસરી ફૂડ કલર: એક ચપટી
- કેસરના તાંતણા: 7-8
બનાવવાની રીત
1. ખીરું તૈયાર કરવું
સૌ પ્રથમ એક મોટા વાસણમાં ચણાના લોટને ચાળી લો જેથી તેમાં ગાંગડા ન રહે. હવે તેમાં થોડું-થોડું પાણી ઉમેરીને પાતળું અને લીસું ખીરું તૈયાર કરો. ધ્યાન રહે કે ખીરું બહુ ઘટ્ટ કે બહુ પાણી જેવું ન હોવું જોઈએ. તેમાં એક ચપટી કેસરી રંગ ઉમેરો જેથી બુંદીનો રંગ સુંદર આવે.
2. બુંદી પાડવી
હવે એક ઊંડી કડાઈમાં દેશી ઘી ગરમ કરો. મોતીચૂરના લાડુ માટે ખૂબ જ ઝીણા કાણાવાળા ઝારાની જરૂર પડે છે. જ્યારે ઘી બરાબર ગરમ થઈ જાય, ત્યારે ઝારાને કડાઈથી થોડો ઉપર રાખો અને તેના પર લોટનું ખીરું નાખો. ઝારાને હળવેથી ઠપકારો જેથી નાની-નાની મોતી જેવી બુંદી ઘીમાં પડે. તેને માત્ર થોડી સેકન્ડ માટે જ તળો અને તરત જ કાઢી લો. ધ્યાન રાખવું કે બુંદી બહુ કડક ન થઈ જાય.
3. ચાશણી તૈયાર કરવી
ત્યારબાદ એક બીજા પેનમાં ખાંડ અને એક કપ પાણી નાખીને ગરમ કરો. તેમાં એલચી પાવડર અને કેસરના તાંતણા ઉમેરો. આપણે એક તારની ચાશણી નથી બનાવવાની બસ એટલી જ કે તે થોડી ચીકણી થઈ જાય. તેમાં થોડો કેસરી રંગ પણ ઉમેરી દો.
4. મિશ્રણ તૈયાર કરવું
હવે તૈયાર કરેલી બુંદીને ચાશણીમાં નાખો. તેમાં મગજતરીના બી પણ ઉમેરો. ધીમી આંચ પર 2-3 મિનિટ સુધી પકાવો જેથી બુંદી ચાશણીને સારી રીતે શોષી લે અને નરમ થઈ જાય. ત્યારબાદ ગેસ બંધ કરી દો અને મિશ્રણને ઢાંકીને 10-15 મિનિટ માટે રહેવા દો.
5. લાડુ વાળવા
જ્યારે મિશ્રણ હળવું ગરમ હોય, ત્યારે હાથ પર થોડું ઘી લગાવો અને હથેળીમાં રાખીને ગોળ-ગોળ લાડુ બનાવી લો. શુદ્ધ અને સ્વાદિષ્ટ મોતીચૂરના લાડુ તૈયાર છે!
