Recipe : ઘરે બનાવો શુદ્ધ અને ચટપટો આમચૂર પાવડર: જાણો બનાવવાની સરળ રીત
છેલ્લું અપડેટ : 08 Apr 2026
આમચૂર પાવડર તમારી રસોઈને ચટપટો સ્વાદ તો આપે જ છે, સાથે તે વિટામિન-C સહિત અનેક એન્ટીઓક્સિડન્ટ્સથી પણ ભરપૂર હોય છે. બજારમાં મળતા પાવડરમાં ઘણીવાર સાઇટ્રિક એસિડ, સ્ટાર્ચ અને આર્ટિફિશિયલ કલરની ભેળસેળ હોય છે. તેથી કેરીની સીઝનમાં તમે ઘરે જ શુદ્ધ આમચૂર પાવડર બનાવીને આખું વર્ષ તેનો આનંદ માણી શકો છો.
માત્ર એક જ સામગ્રીની જરૂર
ઘરે આમચૂર પાવડર બનાવવા માટે તમારે માત્ર મોટા કદની કાચી કેરીની જરૂર પડશે. તમારે જેટલા પાવડરની જરૂર હોય તેટલી કેરી લો, તેને બરાબર ધોઈ લો અને કપડાથી લૂછીને કોરી કરી લો.
આમચૂર પાવડર બનાવવાની રીત
કેરીની છાલ ઉતારો: બધી કેરીની છાલ ઉતારી લો અને ત્યારબાદ તેની પાતળી સ્લાઈસ (ચીરીઓ) કરો.
સ્લાઈસરનો ઉપયોગ: કેરી કાપવા માટે તમે ચિપ્સ પાડવાના સ્લાઈસરનો ઉપયોગ પણ કરી શકો છો. આનાથી કામ ઝડપથી થશે અને બધી સ્લાઈસ એકસરખી જાડાઈની કપાશે, જેથી તે જલ્દી સુકાઈ જશે.
તડકામાં સુકવવી: બધી સ્લાઈસને એક મોટી થાળી કે પરાતમાં ફેલાવી દો. તેને તેજ તડકામાં સુકવો. ખાસ ધ્યાન રાખો કે કેરી પર સીધો તડકો ન આવે તે રીતે સુકવવી જોઈએ જેથી તેનો રંગ કાળો ન પડે.
ઢાંકીને સુકવો: સૌથી શ્રેષ્ઠ રીત એ છે કે તમે જે વાસણમાં કેરી સુકવી રહ્યા હોવ તેને કોઈ પાતળા સુતરાઉ કપડાથી ઢાંકી દો. 3 થી 4 દિવસના તડકામાં કેરી બરાબર સુકાઈ જશે અને તે હાથેથી તોડતા જ તૂટી જાય તેવી 'ક્રંચી' થઈ જશે.
પીસી લો: જ્યારે કેરી પૂરેપૂરી સુકાઈ જાય ત્યારે તેને ગ્રાઇન્ડરમાં નાખીને પાવડર બનાવી લો. આ પાવડરને ઝીણી છણીથી ચાળી લો. જે ટુકડા બચી જાય તેને ફરીથી પીસી લો. આ રીતે તમારો ઘરનો શુદ્ધ આમચૂર પાવડર તૈયાર થઈ જશે.
સ્ટોર કરવાની રીત
આ અમચૂર પાવડરને કાચની બરણીમાં ભરીને રાખો.
બરણી એવી જગ્યાએ રાખો જ્યાં ભેજ ન હોય. એરટાઈટ કન્ટેનર સૌથી શ્રેષ્ઠ રહેશે.
રોજિંદા વપરાશ માટે થોડો પાવડર નાની ડબ્બીમાં અલગ કાઢી લો, જેથી મોટી બરણી વારંવાર ખોલવી ન પડે. બરણી વારંવાર ખોલવાથી હવામાં રહેલા ભેજને કારણે પાવડર બગડી શકે છે.
