Recipe : ઘરે બનાવો બજાર જેવી કુરકુરી ચોખાની પાપડી, જાણો બનાવવાની રીત
છેલ્લું અપડેટ : 22 Feb 2026
હોળીના તહેવાર માટે લોકો અગાઉથી જ ચિપ્સ અને પાપડ બનાવવાનું શરૂ કરી દેતા હોય છે. પહેલાના સમયમાં લોકો ઘરે ચોખાની પાપડી પણ બનાવતા હતા, જે સ્વાદમાં બિલકુલ 'કુરકુરે' જેવી જ લાગે છે. બસ તફાવત એટલો છે કે કુરકુરે થોડા ચટાકેદાર હોય છે અને પાપડી થોડી સાદી હોય છે, પરંતુ ચા સાથે તે ખૂબ જ ટેસ્ટી લાગે છે. જો તમે પણ આ વખતે હોળી પર મહેમાનોને ચા સાથે કંઈક નવું અને ખાસ ખવડાવવા માંગતા હોવ, તો ઝટપટ આ પાપડી બનાવી શકો છો. આ પાપડી બનાવવામાં બહુ મહેનત પડતી નથી અને તે બાળકોથી લઈને વડીલો સુધી દરેકને પસંદ આવે છે. ચાલો જાણીએ આ મજેદાર ચોખાની પાપડી બનાવવાની રેસીપી.
ચોખાની પાપડી સામગ્રી
- ચોખા: અડધો કપ
- તેલ: 2 ચમચી
- જીરું: 1 ચમચી
- મીઠું: સ્વાદ મુજબ
- લાલ મરચું: અડધી ચમચી
- પાણી: જરૂર મુજબ
- ચોખાની પાપડી બનાવવાની રીત
1. ચોખા તૈયાર કરવાની રીત:
સૌથી પહેલા ચોખાને બરાબર ધોઈ લો અને તેનું વધારાનું પાણી નિતારી લો.
હવે કુકરમાં ચોખા લો અને તેમાં ચોખા ડૂબે તેનાથી થોડું વધારે પાણી ઉમેરો, જેથી ચોખા એકદમ ગળી જાય.
હવે તેમાં તેલ, 1 ચમચી જીરું, સ્વાદ મુજબ મીઠું અને લાલ મરચું નાખીને કુકરનું ઢાંકણ બંધ કરી દો.
કુકરમાં ૩-4 સીટી વગાડીને તેને બરાબર ચઢવા દો. જ્યારે પ્રેશર નીકળી જાય, ત્યારે કુકર ખોલીને કડછીની મદદથી ચોખાને બરાબર ઘૂંટી લો. ચોખા એકદમ માવા જેવા થઈ જવા જોઈએ.
હવે 3 મિશ્રણને થોડું ઠંડું થવા દો.
2. પાપડી કેવી રીતે બનાવવી:
હવે એક પ્લાસ્ટિકની પારદર્શક થેલી અથવા તેલનું ખાલી પેકેટ લો અને તેમાં તૈયાર કરેલો ભાતનો માવો ભરો.
પેકેટના એક ખૂણાને કાતરથી સહેજ કાપી લો. કાણું એટલું જ રાખવું કે જેથી પાપડી સહેલાઈથી બહાર નીકળી શકે.
તમારા ઘરમાં જ્યાં પણ સારો તડકો આવતો હોય ત્યાં એક પ્લાસ્ટિકની સીટ (પન્ની) પાથરો અને તેના પર પાપડી પાડવાનું શરૂ કરો. તમે તેને નાની જલેબી જેવી અથવા લાંબી લાઈનમાં બનાવી શકો છો. (લાંબી પાપડી સુકાઈ ગયા પછી તેને તોડીને નાની કરી શકાય છે).
આ પાપડીને તડકામાં 3-4 દિવસ સુધી બરાબર સૂકવવાની છે, જેથી તે એકદમ કડક અને કુરકુરી થઈ જાય.
3. તેલમાં તળવાની રીત:
જ્યારે પાપડી બરાબર સુકાઈ જાય, ત્યારે તેને ગરમ તેલમાં તળી લો. તળતી વખતે પાપડી એકદમ ફૂલી જશે અને કુરકુરે જેવી ક્રિસ્પી બનશે.
તળ્યા પછી તેના પર ઉપરથી થોડો ચાટ મસાલો ભભરાવો. જો તમે મિશ્રણમાં લાલ મરચું નાખ્યું ન હોય, તો ઉપરથી થોડું લાલ મરચું નાખીને ખાઈ શકાય છે.