VIDEO: Recipe/ રોજના એ જ પરોઠાથી થઈ ગયા છો બોર? ટ્રાય કરો ગરમા-ગરમ મસાલેદાર 'ચણાની દાળના પરોઠા'!
છેલ્લું અપડેટ : 05 Jun 2026
આપણા દેશમાં બટાકા, ફ્લાવર, પનીર જેવા અનેક પ્રકારના પરોઠા બનાવવામાં આવે છે. આ પરોઠા તો તમે ખાધા જ હશે, પરંતુ શું તમે ક્યારેય દાળના પરોઠા ખાધા છે? ચણાની દાળના સ્ટફિંગવાળા આ પરોઠા 'દાળ પૂરી' ના નામે પણ ઓળખાય છે અને સ્વાદમાં તે અદ્ભુત હોય છે. તો ચાલો જાણીએ સવારના નાસ્તા માટે એકદમ ક્રિસ્પી (ખસ્તા) અને મસાલેદાર ચણાની દાળના પરોઠા બનાવવાની રેસીપી.
દાળના પરોઠા બનાવવા માટેની સામગ્રી:
ચણાની દાળ: ૧ કપ (૪-૫ કલાક પલાળેલી)
જીરું: ૧ નાની ચમચી
હિંગ: ૨ ચપટી
લીલા મરચાં: ૨-૩ (ઝીણા સમારેલા)
આદુ-લસણની પેસ્ટ: ૧ નાની ચમચી
હળદર પાવડર: ૧/૨ નાની ચમચી
લાલ મરચું પાવડર: ૧ નાની ચમચી
ગરમ મસાલો: ૧/૨ નાની ચમચી
ધણાજીરું પાવડર: ૧ નાની ચમચી
લીલા ધાણા: ઝીણા સમારેલા
મીઠું: સ્વાદાનુસાર
તેલ: ૨ નાની ચમચી
ઘઉંનો લોટ: ૨ કપ
મીઠું (લોટ માટે): ૧/૨ નાની ચમચી
ઘી અથવા તેલ: પરોઠા શેકવા અને મોણ માટે
દાળના પરોઠા બનાવવાની રીત:
૧. સૌથી પહેલા પલાળેલી ચણાની દાળને કુકરમાં થોડું પાણી, અડધી હળદર અને થોડું મીઠું નાખીને ૧ થી ૨ સીટી વાગે ત્યાં સુધી બાફી લો. ધ્યાન રાખવું કે દાળ એકદમ ઓગળી ન જવી જોઈએ; દાળ આખી રહેવી જોઈએ પણ હાથથી દબાવતા મેશ (નરમ) થઈ જવી જોઈએ. દાળ બફાઈ જાય એટલે તેનું વધારાનું પાણી નિતારી લો અને દાળને એક વાસણમાં કાઢી લો.
૨. હવે એક કડાઈમાં ૨ ચમચી તેલ ગરમ કરો. તેમાં જીરું અને હિંગનો વઘાર કરો. ત્યારબાદ આદુ-લસણની પેસ્ટ અને લીલા મરચાં નાખીને થોડી સેકન્ડ માટે સાંતળો. હવે તેમાં બાફેલી દાળ, લાલ મરચું પાવડર, ધાણાજીરું પાવડર, ગરમ મસાલો અને સ્વાદાનુસાર મીઠું ઉમેરો.
૩. દાળને મધ્યમ આંચ પર ૪-૫ મિનિટ સુધી સાંતળો (શેકો), જેથી તેનું બધું જ મોઇશ્ચર (ભેજ) ખતમ થઈ જાય. ત્યારબાદ ગેસ બંધ કરી દો અને ઉપરથી ઝીણા સમારેલા લીલા ધાણા ઉમેરો. આ મિશ્રણ ઠંડુ થાય એટલે તેને મિક્સર અથવા ખાંડણીમાં પાણી નાખ્યા વગર અધકચરી (દરદરી) પીસી લો. તમારું સ્વાદિષ્ટ દાળનું સ્ટફિંગ તૈયાર છે.
૪. સ્ટફિંગ તૈયાર કર્યા પછી એક કથરોટમાં ઘઉંનો લોટ લો. તેમાં અડધી ચમચી મીઠું અને એક ચમચી તેલ નાખીને બરાબર મિક્સ કરો. હવે નવશેકા (હૂંફાળા) પાણીની મદદથી એક નરમ લોટ બાંધી લો અને તેને ઢાંકીને ૧૫-૨૦ મિનિટ માટે સેટ થવા દો.
૫. હવે લોટમાંથી મધ્યમ સાઇઝનો લુવો લો અને તેને વાટકી જેવો આકાર આપો. તેની વચ્ચે ૨ ચમચી ચણાની દાળનું સ્ટફિંગ મૂકો અને કિનારીઓને ભેગી કરીને લુવાને ઉપરથી બંધ કરી દો. લુવા પર સૂકો લોટ લગાવો અને હળવા હાથે વેલણ ચલાવીને ગોળ પરોઠો વણી લો.
૬. તવાને ગેસ પર ગરમ કરો. પરોઠાને તવા પર મૂકો અને બંને બાજુથી થોડો શેકાવા દો. ત્યારબાદ બંને બાજુ ઘી કે તેલ લગાવીને, તવેથાથી દબાવીને પરોઠો એકદમ ક્રિસ્પી (કુરકુરો) થાય ત્યાં સુધી શેકી લો.
૭. તમારો ગરમા-ગરમ ચણાની દાળનો પરોઠો તૈયાર છે. તમે તેને કેરીના અથાણાં, તીખી લીલી ચટણી, બુંદીના રાયતા અથવા બટાકા-ટામેટાના રસાવાળા શાક સાથે પીરસી શકો છો.
