Recipe: શું તમે ક્યારેય વધેલી રોટલીના ગુલાબજાંબુ ટ્રાય કર્યા છે? આ રહી સ્ટેપ-બાય-સ્ટેપ રેસીપી

સામાન્ય રીતે મોટાભાગના ઘરમાં જ્યારે રોટલી વધે છે, ત્યારે આપણે તેને ગાયને ખવડાવી દઈએ છીએ અથવા કચરાપેટીમાં ફેંકી દઈએ છીએ. પરંતુ શું તમે ક્યારેય વિચાર્યું છે કે, આ જ વાસી રોટલીમાંથી તમે બજારમાં મળતા મોંઘા ગુલાબજાંબુ જેવી સ્વાદિષ્ટ મીઠાઈ બનાવી શકો છો? વધેલી રોટલીના ઉપયોગનો આ આઈડિયા સાંભળીને તમે પણ ચોંકી જશો. આ ગુલાબજાંબુ એટલા નરમ અને મીઠા બને છે કે, કોઈ કહી પણ નહીં શકે કે તે રોટલીમાંથી બન્યા છે.
આ અનોખી રેસીપી માટે તમારે નીચે મુજબની સામગ્રીની જરૂર પડશે

વધેલી રોટલીઓ

• 1/2 કપ દૂધ
• 2 ચમચી સુજી (રવો)
• 1 ચપટી બેકિંગ સોડા
• 1/2 ચમચી ઈલાયચી પાવડર
• 1 કપ ખાંડ
• 1 કપ પાણી
• 1 ચમચી ગુલાબજળ (ખાવા યોગ્ય)
• કેસર અને તળવા માટે ઘી અથવા તેલ

આ રીતે તૈયાર કરો ગુલાબજાંબુ

રોટલી તૈયાર કરો: સૌ પ્રથમ વધેલી રોટલીઓને તવા પર એકદમ કડક (કરારી) થાય ત્યાં સુધી શેકી લો. ત્યારબાદ આ રોટલીઓના ટુકડા કરી મિક્સર ગ્રાઈન્ડરમાં તેનો ઝીણો પાવડર બનાવી લો.

લોટ બાંધવાની પ્રક્રિયા: હવે રોટલીના પાવડર જેટલું જ દૂધ લો અને તેને પાવડરમાં મિક્સ કરો. તેને 10 મિનિટ માટે ઢાંકીને રાખી દો જેથી તે સોફ્ટ થઈ જાય. ત્યારબાદ આ મિશ્રણમાં સુજી, બેકિંગ સોડા અને ઈલાયચી પાવડર ઉમેરીને સારી રીતે લોટ બાંધો. જો જરૂર જણાય તો થોડું વધુ દૂધ ઉમેરી શકાય છે. ધ્યાન રાખવું કે લોટ બહુ કઠણ કે બહુ નરમ ન હોવો જોઈએ.

ચાસણીની તૈયારી: એક પેનમાં ખાંડ અને પાણી નાખીને મધ્યમ આંચ પર પકાવો. જ્યારે ખાંડ સંપૂર્ણ ઓગળી જાય ત્યારે તેમાં ઈલાયચી, ગુલાબજળ અને કેસર ઉમેરો. ચાસણી થોડી ઘટ્ટ થાય ત્યાં સુધી તેને ઉકાળો. તૈયાર કરેલા લોટમાંથી નાના-નાના ગોળા બનાવો. ધ્યાન રાખવું કે તેમાં ક્યાંય તિરાડ ન રહે, જેથી તળતી વખતે તે ફાટી ન જાય. કડાઈમાં ઘી ગરમ કરી મધ્યમ આંચ પર ગુલાબજાંબુને ગોલ્ડન બ્રાઉન થાય ત્યાં સુધી તળો. તળેલા ગરમ ગુલાબજાંબુને સીધા જ ગરમ ચાસણીમાં નાખો. ઠંડા થયા પછી તેને પીરસો.