હોળીમાં બાળકોની આંખો અને ત્વચાને સુરક્ષિત રાખવા માટે અપનાવો આ ખાસ ટિપ્સ

રંગોનો તહેવાર હોળી-ધૂળેટી હવે ગણતરીના દિવસોમાં જ આવી રહ્યો છે. આ તહેવારમાં સૌથી વધુ ઉત્સાહ બાળકોમાં જોવા મળે છે, પરંતુ કેમિકલયુક્ત રંગો અને લાંબા સમય સુધી પાણીમાં રહેવાને કારણે બાળકોની નાજુક ત્વચા અને આંખોને નુકસાન થવાનું જોખમ રહેલું છે. જો તમે પણ ઈચ્છતા હોવ કે તમારા બાળકો સુરક્ષિત રીતે હોળીનો આનંદ માણે, તો આ સાવચેતી રાખવી અત્યંત જરૂરી છે.

ત્વચાની સુરક્ષા માટે શું કરવું?

બાળકોની ત્વચા ખૂબ જ સંવેદનશીલ હોય છે, તેથી રંગોના સંપર્કમાં આવતા પહેલા નીચેની બાબતોનું ધ્યાન રાખો:

તેલ અથવા મોઇશ્ચરાઇઝરનો ઉપયોગ: હોળી રમવા મોકલતા પહેલા બાળકના આખા શરીર પર સરસવનું તેલ, નાળિયેરનું તેલ અથવા સારું લોશન લગાવો. આનાથી ત્વચા પર એક સુરક્ષાત્મક પડ બનશે અને રંગો ત્વચાની અંદર ઉતરશે નહીં.

સંપૂર્ણ કપડાં પહેરાવો: બાળકોને ફુલ સ્લીવના ટી-શર્ટ અને આખી પેન્ટ પહેરાવવાનો આગ્રહ રાખો. જેટલી ત્વચા ઢંકાયેલી હશે, તેટલું જ નુકસાન ઓછું થશે.

નખની સંભાળ: બાળકોના નખ પર નેઈલ પેઈન્ટ લગાવી શકાય છે, જેથી નખની અંદર રંગ ભરાય નહીં.

આંખોને કેવી રીતે બચાવવી?

હોળીમાં સૌથી વધુ જોખમ આંખોને હોય છે. કેમિકલવાળા રંગો આંખોમાં જવાથી બળતરા અથવા ગંભીર ઇન્ફેક્શન થઈ શકે છે.

ચશ્મા પહેરાવો: બાળકને હોળી રમતી વખતે સનગ્લાસ અથવા ઝીરો પાવરના ચશ્મા પહેરાવો. આનાથી સીધો રંગ આંખમાં જતો અટકશે.

રંગ ઉડાડવાની મનાઈ: બાળકોને સમજાવો કે કોઈના ચહેરા પર અથવા આંખોમાં સીધો રંગ કે પાણી નાખવું જોઈએ નહીં.

પાણીથી સફાઈ: જો ભૂલથી આંખમાં રંગ જાય, તો તેને ઘસવાને બદલે તરત જ ઠંડા અને ચોખ્ખા પાણીથી આંખો ધોવી જોઈએ.

રંગોની પસંદગીમાં સાવધાની

કુદરતી રંગોનો આગ્રહ: બજારમાં મળતા સસ્તા અને પાકા રંગોને બદલે હર્બલ ગુલાલ અથવા ફૂલોથી બનેલા રંગોનો જ ઉપયોગ કરો.

પાણીના ફુગ્ગાથી બચો: બાળકોને પાણીના ફુગ્ગા મારતા રોકો, કારણ કે તે વાગવાથી ગંભીર ઈજા થઈ શકે છે.

હોળી રમ્યા પછી શું કરવું?

રંગ કાઢવા માટે ત્વચાને જોરથી ઘસશો નહીં. હળવા સાબુ કે ઉબટનનો ઉપયોગ કરો.

સ્નાન કર્યા પછી ત્વચા પર ફરીથી તેલ કે મોઇશ્ચરાઇઝર લગાવો જેથી શુષ્કતા દૂર થાય.

નિષ્ણાતોની સલાહ: જો હોળી રમ્યા પછી બાળકની ત્વચા પર રેશિઝ (ફોડલીઓ), વધુ પડતી ખંજવાળ કે આંખોમાં લાલાશ દેખાય, તો ઘરગથ્થુ ઉપચાર કરવાને બદલે તાત્કાલિક ડોક્ટરનો સંપર્ક કરવો જોઈએ.