આ તહેવારે થાક નહીં, ખુશીઓ અનુભવો: તણાવથી બચવાના શ્રેષ્ઠ ઉપાય

તહેવારોનું નામ પડતાં જ મનમાં રંગબેરંગી શણગાર, પકવાનની સુગંધ, પૂજાની તૈયારીઓ અને અપનો સાથે વિતાવેલી સુંદર ક્ષણોની તસવીર ઊભરી આવે છે. પરંતુ આ ખુશીઓ વચ્ચે ઓફિસની ડેડલાઇન, ઘરની જવાબદારીઓ, ખરીદી અને મહેમાનોની તૈયારીઓ ક્યારે તણાવનું કારણ બની જાય છે, તેની ખબર જ નથી રહેતી. ઘણીવાર બધાને ખુશ રાખવાના પ્રયત્નમાં આપણે આપણી ખુશી જ ભૂલી જઈએ છીએ. નેહા સાથે પણ આવું જ થયું.

ગયા વર્ષે તહેવારોની ભાગદોડે તેને એટલી થકવી દીધી કે તે તેનો આનંદ ન માણી શકી. આ વખતે તેણે નક્કી કર્યું કે તહેવારોને બોજ નહીં, ખુશીઓનો અવસર બનાવશે. આ માટે તેણે પોતાની દિનચર્યામાં કેટલાક સરળ ફેરફારો કર્યા, જે તહેવારોની રોનક વચ્ચે મનને ટાઢક આપવામાં મદદરૂપ થઈ શકે છે.

પ્રાથમિકતાઓ નક્કી કરો, ભાગદોડ ઓછી કરો

જ્યારે એકસાથે અનેક કામ સામે હોય, ત્યારે સૌથી પહેલાં જરૂરી અને ઓછા જરૂરી કામોને અલગ કરો. દિવસના કેટલાક મુખ્ય કામો પહેલેથી નક્કી કરી લો અને પ્રયત્ન કરો કે એક સમયે એક જ કામ કરો. તમારી યોજનામાં થોડો વધારાનો સમય પણ રાખો, જેથી અચાનક આવતી જવાબદારીઓ આખા દિવસનો કાર્યક્રમ ન બગાડે. દરેક કામને તરત પૂરું કરવાના પ્રયાસ કરવાને બદલે જરૂરી કામોને પહેલાં કરવાથી તણાવ ઓછો કરવામાં મદદ મળી શકે છે.

જવાબદારીઓ વહેંચો, ખુશીઓ વધારો

તહેવારો દરમિયાન ખરીદી, મહેમાનોની તૈયારી, ફોન કૉલ્સ અને ઘરના કામોની સતત ચિંતા માનસિક થાક વધારે છે. અને આનાથી બચવાનો રસ્તો પણ પ્રાથમિકતાઓ નક્કી કરવાનો છે. સાથે જ, દરેક કામ જાતે કરવું જરૂરી નથી, પરંતુ ઘરના સભ્યો સાથે જવાબદારીઓ વહેંચો અને બાળકો કે પરિવારના અન્ય લોકોને તેની ક્ષમતા મુજબ કામ સોંપો. જવાબદારીઓ વહેંચવી એ સમય બચાવવા, તણાવ ઘટાડવા અને ઊર્જાનો વધુ સારો ઉપયોગ કરવાનો પ્રભાવશાળી રસ્તો છે.

ઓફિસનો તણાવ ઘરના દરવાજા પર છોડો

તહેવારોની લાંબી યાદી અને કામની વધતી જવાબદારીઓ વચ્ચે સતત તણાવ અનુભવાય છે. એટલા માટે ઓફિસ પૂરું થયા પછી ત્યાંના કામથી માનસિક અંતર બનાવવાની કોશિશ કરો. પૂરતી ઊંઘ, સમયસર પોષણયુક્ત ભોજન, પૂરતું પાણી પીવું અને હળવી કસરત જેવી આદતો તણાવ ઓછો કરવાની સાથે ઊર્જા અને એકાગ્રતા જાળવી રાખવામાં મદદ કરે છે.

પરફેક્શન નહીં, પોતાના સાથેની પળોને પસંદ કરો

તહેવારો પર દરેક તૈયારી બિલકુલ પરફેક્ટ હોય, તેનો બોજ ન લો. બીજાના શણગાર, ખરીદી કે તૈયારીઓ સાથે તમારી સરખામણી બિલકુલ ન કરો. પરિવાર સાથે બેસીને શાંતિની પળો વિતાવો, મનપસંદ કામ કરો અથવા થોડીવાર એકાંતમાં આરામ કરો. યાદ રાખો, તહેવારો પોતાના સાથે સમય વિતાવવાનો અને તે પળોનો આનંદ લેવાનો પણ મોકો છે.

વિશેષરાની સલાહ : શિડ્યુલમાં બફર ટાઈમ

સાયકોલોજિસ્ટ જણાવે છે કે તહેવારોમાં ઓફિસની ડેડલાઇન, ઘરની તૈયારીઓ અને પારિવારિક જવાબદારીઓ તણાવ વધારે છે. એટલા માટે કામોની પ્રાથમિકતા નક્કી કરો અને શિડ્યુલમાં બફર ટાઈમ રાખો. દરેક કામ પરફેક્ટ કરવાને બદલે તમારી અપેક્ષાઓ વ્યવસ્થિત રાખો. ઓફિસ અને ઘર વચ્ચે ટ્રાન્ઝિશન ટાઈમ રાખો. પૂરતી ઊંઘ, પોષણયુક્ત ભોજન, વ્યાયામ અને મેડિટેશનને પ્રાથમિકતા આપો. જરૂર પડે 'ના' કહો. સૌથી જરૂરી, જો તમને સતત ચિડિયાપણું, બેચેની, થાક કે ઊંઘમાં ફેરફાર જણાય, તો માનસિક સ્વાસ્થ્ય વિશેષજ્ઞની સલાહ લો.

નોંધ : આ આર્ટિકલ તમને જાગૃત કરવાના હેતુથી લખવામાં આવ્યો છે.