માત્ર ભારતમાં જ નહીં પરંતુ વિશ્વભરમાં આવેલા છે ભગવાન ગણેશના ઘણા પ્રસિદ્ધ મંદિરો

ભગવાન ગણેશ, જે અવરોધો દૂર કરનાર અને સમૃદ્ધિના દેવ તરીકે પૂજવામાં આવે છે. દરેક શુભ કાર્ય, નવી શરૂઆત અને યાત્રા પહેલા ભગવાન ગણેશની પૂજા કરવામાં આવે છે. દર વર્ષે ગણેશ ચતુર્થીનો તહેવાર દેશના ઘણા ભાગોમાં ખૂબ જ ધામધૂમ, ઉત્સાહ અને ભક્તિ સાથે ઉજવવામાં આવે છે, ગણેશ ચતુર્થીના દિવસે, લોકો તેમના ઘરો, પંડાલો અથવા જાહેર સ્થળોએ બાપ્પાની મૂર્તિ લાવે છે અને 10 દિવસ સુધી પૂજા કરે છે. પ્રસાદ માટે વિવિધ પ્રકારની વાનગીઓ અને મીઠાઈઓ તૈયાર કરવામાં આવે છે.

આ 10 દિવસો દરમિયાન બાપ્પાની મૂર્તિની સ્થાપના માટે ભવ્ય પંડાલો સજાવવામાં આવે છે અને વિવિધ ધાર્મિક અને સાંસ્કૃતિક કાર્યક્રમોનું આયોજન કરવામાં આવે છે. 10મા દિવસે ગણેશ મૂર્તિનું નદી અથવા તળાવમાં વિસર્જન કરવામાં આવે છે. ભારતમાં ભગવાન ગણેશના ઘણા મંદિરો ખૂબ જ પ્રખ્યાત છે જેમાં સિદ્ધિવિનાયક મંદિર મુંબઈ, અષ્ટવિનાયક મંદિર મહારાષ્ટ્ર, મધુર મહાગણપતિ મંદિર કેરળ, ત્રિનેત્ર ગણેશ રણથંભોર, ગણેશ ટોક મંદિર ગંગટોક અને ઉચી પિલ્લયાર મંદિર તમિલનાડુ જેવા ઘણા મંદિરોનો સમાવેશ થાય છે. પરંતુ ભારત સિવાય વિદેશોમાં પણ ભગવાન ગણેશના મંદિરો આવેલા છે. આવો જાણીએ વિદેશમાં ભગવાન ગણેશના કયા કયા મંદિરો પ્રખ્યાત છે.

સૂર્યવિનાયક મંદિર, નેપાળ

સૂર્યવિનાયક મંદિર નેપાળના ભક્તપુર જિલ્લામાં સ્થિત એક હિન્દુ મંદિર છે. આ મંદિર ભગવાન ગણેશને સમર્પિત છે. આ મંદિર કાઠમંડુથી લગભગ બે કિલોમીટરના અંતરે જંગલમાં આવેલું છે અને ત્યાં પહોંચવા માટે ચાલવાનો રસ્તો છે. આ સાથે અહીં દૂર-દૂરથી લોકો દર્શન માટે આવે છે. તે કાઠમંડુ ખીણમાં ભગવાન ગણેશના ચાર લોકપ્રિય મંદિરોમાંનું એક છે. આ મંદિરને સૂર્ય મંદિર તરીકે પણ ઓળખવામાં આવે છે.

શ્રી સિથી વિનયગર મંદિર, મલેશિયા

શ્રી સિથી વિનયગર મંદિર મલેશિયાના સેલંગોરના પેટલિંગ જયામાં જલન સેલંગોર પાસે આવેલું છે. તેને પીજે પિલ્લૈયાર મંદિર તરીકે પણ ઓળખવામાં આવે છે. અહીં હાજર દેવતા શ્રી સિથી વિનયગરના રૂપમાં ભગવાન ગણેશ છે. એવું કહેવાય છે કે આ મંદિર મલેશિયામાં ભગવાન ગણેશને સમર્પિત સૌથી મોટું અને પ્રખ્યાત મંદિર છે.

શ્રીલંકામાં પ્રખ્યાત ગણેશ મંદિર

શ્રીલંકામાં ભગવાન ગણેશને પિલ્લયાર તરીકે પૂજવામાં આવે છે. અહીં ભગવાન ગણેશના ઘણા પ્રખ્યાત મંદિરો આવેલા છે. અરિયાલાઈ સિદ્ધિવિનાયકર મંદિર અને કટારાગામા મંદિર ભગવાન ગણેશના સૌથી પ્રસિદ્ધ મંદિરોમાંના એક છે.

થાઈલેન્ડ

હુઈ ક્વાંગ સ્ક્વેર થાઈલેન્ડમાં ભગવાન ગણેશનું મંદિર આવેલ છે. આ મંદિરમાં રોજ પૂજા કરવામાં આવે છે. થાઈલેન્ડમાં ભગવાન ગણેશના અનેક મંદિરો આવેલા છે. થાઈલેન્ડના ચિયાંગ માઈમાં સિલ્વર ટેમ્પલ તરીકે ઓળખાતા મંદિરની બહાર ભગવાન ગણેશની ચાંદીની પ્રતિમા છે.

શ્રી વરથરાજા સેલ્વાવિનયગર મંદિર, નેધરલેન્ડ

ડેન હેલ્ડરમાં આવેલ શ્રી વરથરાજા સેલ્વાવિનયગર મંદિર નેધરલેન્ડનું સૌથી જૂનું ગણેશ મંદિર છે. આ મંદિર 1991માં શ્રીલંકાથી આવેલા તમિલ લોકોએ બનાવ્યું હતું.