VIDEO:ANDARNI VAAT/બીકાનેરમાં ઓપરેશન નીલકંડનો પ્રચંડ પ્રહાર
છેલ્લું અપડેટ : 18 Jun 2026
રાજસ્થાનના બીકાનેરમાં નશાના કાળા કારોબાર અને અપરાધીઓ વિરુદ્ધ પોલીસ પ્રશાસન દ્વારા ઓપરેશન નીલકંઠ હેઠળ એક બહુ મોટી અને કડક કાનૂની કાર્યવાહી કરવામાં આવી છે. આ વિશેષ અભિયાન અંતર્ગત કુખ્યાત ડ્રગ સ્મગલર મોહમ્મદ શકીલ ઉર્ફે જગ્ગુ દ્વારા સરકારી જમીન પર કરવામાં આવેલા ગેરકાયદેસર અતિક્રમણને તોડી પાડવામાં આવ્યું છે. જગ્ગુ વિરુદ્ધ એનડીપીએસ એક્ટ હેઠળ નશીલા પદાર્થોની તસ્કરીના ૭ જેટલા ગંભીર ગુનાઓ નોંધાયેલા છે. સદર પોલીસ સ્ટેશનના સ્ટેશન હાઉસ ઓફિસર સુરેન્દ્ર પચારના નેતૃત્વમાં બીકાનેર ડેવલપમેન્ટ ઓથોરિટી અને જિલ્લા વહીવટી તંત્રના સંયુક્ત સહયોગથી ડ્રગ માફિયા દ્વારા ગેરકાયદેસર રીતે બનાવાયેલી દુકાન અને મુખ્ય દરવાજાના માળખાને બુલડોઝરની મદદથી સંપૂર્ણપણે જમીનદોસ્ત કરી દેવામાં આવ્યું છે.
આ ગુનાહિત નેટવર્ક માત્ર જગ્ગુ પૂરતું સીમિત નથી, પરંતુ તેના સમગ્ર પરિવારનો મોટો ગુનાહિત ઇતિહાસ રહ્યો છે. તેના ચાર પુત્રો વિરુદ્ધ અલગ-અલગ પોલીસ સ્ટેશનોમાં કુલ ૩૫ જેટલા ગંભીર ગુનાઓ નોંધાયેલા છે, જેમાંથી બે કેસમાં અદાલત દ્વારા સજા પણ ફટકારવામાં આવી ચૂકી છે. આ કાળા કારોબાર સાથે સંકળાયેલા સાજિદ અને સત્તાર નામના અન્ય શંકાસ્પદ શખ્સોની સંડોવણી અંગે પણ પોલીસ દ્વારા ઊંડાણપૂર્વક તપાસ કરવામાં આવી રહી છે. પ્રશાસન દ્વારા લેવામાં આવેલા આ આકરા પગલાંથી સ્થાનિક સ્તરે સક્રિય ભૂ-માફિયાઓ અને નશાના વ્યાપારીઓમાં ભારે ફફડાટ વ્યાપી ગયો છે. બીકાનેર પોલીસની આ સરાહનીય ઝુંબેશ સરકારી સંપત્તિને મુક્ત કરાવવા અને યુવાધનને નશાના દળદળમાંથી બચાવવા માટે એક મોટું કારગત કદમ સાબિત થશે.
બ્યૂરો રિપોર્ટ જીએસટીવી
