Video: "તમારો મત લૂંટી લેશે આ લૂંટારાઓ..." — કોંગ્રેસ સાંસદે ચૂંટણી પંચ અને સરકાર સામે ખોલ્યો મોરચો

કોંગ્રેસ સાંસદ ઈમરાન મસૂદે મતદાર યાદીમાં મોટા પાયે થયેલી કથિત ગેરરીતિઓને લઈને સનસનાટીભર્યા આક્ષેપો કર્યા છે. લખનૌ ખાતે પત્રકારો સાથે વાત કરતા તેમણે જણાવ્યું કે કોંગ્રેસ પાર્ટીએ માત્ર હવામાં આક્ષેપો નથી કર્યા, પરંતુ નક્કર પુરાવા અને તથ્યો સામે મૂક્યા છે.

ઈમરાન મસૂદે દાવો કર્યો હતો કે, "વોટર આઈડી (EPIC) નંબર એ જ રહે છે, પરંતુ મતદારનું નામ અને તેના પિતાનું નામ સંપૂર્ણપણે બદલી નાખવામાં આવ્યું છે. આ કોઈ નાની બાબત નથી; માત્ર એક જ વિધાનસભા ક્ષેત્રમાં ૧૩,૦૦૦થી પણ વધુ મતોમાં આ પ્રકારે ચેડાં કરવામાં આવ્યા છે."

તેમણે દેશના નાગરિકોને પોતાના મતાધિકાર પ્રત્યે સતર્ક રહેવાની અપીલ કરતા કહ્યું કે જો દેશમાં આવી જ રીતે ચાલતું રહ્યું, તો લોકશાહીમાં ચૂંટણીઓનો કોઈ અર્થ રહેશે નહીં. લોકોએ પોતાના મતોનું રક્ષણ જાતે કરવું પડશે, નહીં તો લોકશાહીને નબળી પાડીને સત્તા મેળવવા બેઠેલા લૂંટારાઓ જનાદેશની ખુલ્લેઆમ ચોરી કરશે.

આ લડાઈને 'દેશ બચાવવાની લડાઈ' ગણાવતા સાંસદે સ્પષ્ટ ચીમકી આપી હતી કે કોંગ્રેસ આ અન્યાય સામે ચૂપ નહીં બેસે. આ મામલે તેઓ રસ્તા પર ઉતરીને આંદોલન કરશે, સંસદમાં અવાજ ઉઠાવશે અને જરૂર પડ્યે અદાલતનો દરવાજો પણ ખખડાવશે.