VIDEO: "વિપક્ષને વિદ્યાર્થીઓના હિતમાં નહીં, રાજકારણમાં રસ છે": કોંગ્રેસ શાસિત રાજ્યોના પેપર લીક ગણાવીને જે.પી. નડ્ડાનો રાહુલ ગાંધી પર પલટવાર
છેલ્લું અપડેટ : 22 Jul 2026
દેશમાં ચાલી રહેલી પરીક્ષાઓમાં ગેરરીતિ અને પેપર લીકના મુદ્દા પર વિપક્ષી નેતા રાહુલ ગાંધીના આરોપો બાદ કેન્દ્ર સરકારનું વલણ સામે આવ્યું છે. કેન્દ્રીય આરોગ્ય મંત્રી જે.પી. નડ્ડાએ સ્પષ્ટ કર્યું છે કે વિપક્ષ દ્વારા કરવામાં આવેલા દાવાઓની સરકાર યોગ્ય તપાસ કરાવશે. દેશમાં પેપર લીક મુદ્દે ચાલી રહેલા રાજકીય ઘમાસાણ વચ્ચે કેન્દ્રીય આરોગ્ય મંત્રી જે.પી. નડ્ડાએ સંસદમાં વિપક્ષના નેતા રાહુલ ગાંધી પર પલટવાર કરતાં કોંગ્રેસ અને તેના સહયોગી પક્ષોના શાસન વાળા વિવિધ રાજ્યોમાં થયેલા પેપર લીકના કિસ્સાઓની લાંબી યાદી રજૂ કરી રાહુલ ગાંધીની દાનત સામે સવાલો ઉઠાવ્યા છે.
કેન્દ્રીય મંત્રી જે.પી. નડ્ડાએ દિલ્હીમાં પત્રકારો સાથે વાતચીતમાં જણાવ્યું હતું કે, "લોકસભામાં વિપક્ષના નેતા રાહુલ ગાંધીએ એક પ્રેઝન્ટેશન આપ્યું હતું અને તે પ્રેઝન્ટેશનમાં તેમણે આશરે 150 જેટલા પેપર લીકના કિસ્સાઓ અંગે ચર્ચા કરી હતી. આ બાબત તપાસનો વિષય છે. અમારી સરકાર એક જવાબદાર સરકાર હોવાને નાતે, ચોક્કસપણે આ તમામ બાબતોની ઊંડાણપૂર્વક તપાસ કરાવશે અને જે પણ સત્ય હશે તે દેશ અને જનતા સમક્ષ રજૂ કરશે."
જે.પી. નડ્ડાએ મીડિયા સમક્ષ આંકડા અને ઘટનાઓ ટાંકીને જણાવ્યું હતું કે: જમ્મુ અને કાશ્મીરમાં કોંગ્રેસ અને નેશનલ કોન્ફરન્સ (NC) ની સરકાર છે, ત્યાં સર્વિસ સિલેક્શન બોર્ડની પરીક્ષાનું પેપર લીક થયું હતું.
હિમાચલ પ્રદેશ: કોંગ્રેસ શાસિત હિમાચલ પ્રદેશના સ્કૂલ એજ્યુકેશન બોર્ડમાં પણ પેપર લીકની ઘટના બની હતી.
ઝારખંડ: ઝારખંડ એકેડેમિક કાઉન્સિલ (JAC) હેઠળ હિન્દી અને સાયન્સના પેપરો લીક થયા હતા, જ્યાં કોંગ્રેસ અને ઝારખંડ મુક્તિ મોરચા (JMM) ની ગઠબંધન સરકાર છે.
તેલંગાણા: કોંગ્રેસ અને CPI સમર્થિત સરકાર ધરાવતા તેલંગાણામાં ઇન્ટરમીડિયેટ ભાષાનું પેપર તેમજ SSC નું પેપર પણ લીક થયું હતું.
તમિલનાડુ અને પશ્ચિમ બંગાળ: તમિલનાડુમાં B.Ed કોર્સનું પેપર અને પશ્ચિમ બંગાળમાં (TMC સરકાર હેઠળ) પોલીસ કોન્સ્ટેબલ ભરતી પરીક્ષાનું પેપર લીક થયું હતું.
પંજાબ, કેરળ અને કર્નાટક: પંજાબમાં સબઓર્ડિનેટ સર્વિસ સિલેક્શન બોર્ડની ગ્રુપ-B પરીક્ષામાં ગેરરીતિ થઈ, કેરળમાં PSCની ૨૬ પરીક્ષાઓના પેપરમાં અનિયમિતતાઓ સામે આવી, જ્યારે કોંગ્રેસ શાસિત કર્નાટકમાં પ્રેપરેટરી બોર્ડ અને PUC નું પેપર લીક થયું હતું.
રાહુલ ગાંધી સામે સીધા સવાલો
જે.પી. નડ્ડાએ વિપક્ષના નેતા રાહુલ ગાંધીને આડે હાથ લેતા કહ્યું કે, "આ ખૂબ જ લાંબી યાદી છે, જેના પર જ્યારે પણ સમય આવશે ત્યારે અમે ચર્ચા કરવા તૈયાર છીએ. પરંતુ હું વિપક્ષના નેતા રાહુલ ગાંધીને પૂછવા માગું છું કે તમે આટલા 'સિલેક્ટિવ' કેમ છો? તમે UPA અને UPA સમર્થિત સરકારોના પેપર લીક અંગે કેમ કોઈ ચર્ચા ન કરી? તમે તેમનાથી અંતર કેમ જાળવી લીધું? આ બાબત સ્પષ્ટ દર્શાવે છે કે તમારો ઉદ્દેશ્ય વિદ્યાર્થીઓનું કલ્યાણ કરવાનો કે શિક્ષણની ગુણવત્તા સુધારવાનો નથી. તમને વિદ્યાર્થીઓને ન્યાય અપાવવામાં કોઈ રસ નથી; તમે માત્ર વિદ્યાર્થીઓના મુદ્દાઓ પરથી રાજકીય રોટલા શેકવા માગો છો, જે અત્યંત દુર્ભાગ્યપૂર્ણ છે."
"આપણે આક્ષેપ-પ્રતિઆક્ષેપથી ઉપર ઊઠીને આ બાબતે ચર્ચા કરવી જોઈએ. ચર્ચા માટે સૌથી શ્રેષ્ઠ માધ્યમ સંસદ છે, અને અમે એ ચર્ચા માટે તૈયાર છીએ. ચાલો, ઊંડાણપૂર્વકની ચર્ચા દ્વારા તમામ વિગતોમાં ઊંડા ઊતરીને એક વ્યાપક ચર્ચા કરીએ. પેપર લીક થવા પાછળ કયા પરિબળો જવાબદાર છે? તેમાં કયા લોકો સામેલ છે, અને કેન્દ્ર સરકારે તેનો શો પ્રતિભાવ આપ્યો છે? જ્યારે પણ પેપર લીકની ઘટના આપણા ધ્યાનમાં આવી છે, ત્યારે આપણે આ મુદ્દાને કેવી રીતે ઉકેલ્યો છે, અને અન્ય સરકારોએ તેને કેવી રીતે ઉકેલવો જોઈએ? આપણે કયા મુદ્દા પર ઊંડાણપૂર્વક વિચારણા કરીને એવો ઉકેલ લાવવો જોઈએ જેથી આપણા લાખો-કરોડો વિદ્યાર્થીઓ સાથે અન્યાય ન થાય?..."
"આ મુદ્દા પર સંસદમાં ચર્ચા કરવામાં આવશે. અમે તેના પર વિગતવાર ચર્ચા કરવા માટે તૈયાર છીએ. અમે સંસદના મંચ પર પેપર લીક સંબંધિત તમામ બાબતો પર ચર્ચા કરવા માટે તૈયાર છીએ... વિપક્ષે પોતાના વિચારો રજૂ કરવા જોઈએ, અને સરકાર તેનો જવાબ આપશે..."
રાજકીય પૃષ્ઠભૂમિ
ઉલ્લેખનીય છે કે, NEET-UG સહિત વિવિધ સ્પર્ધાત્મક પરીક્ષાઓમાં ગેરરીતિઓ સામે આવ્યા બાદ સંસદથી લઈને શેરીઓ સુધી વિપક્ષ સતત સરકાર પર આક્રમક પ્રહારો કરી રહ્યો છે. સંસદમાં વિપક્ષના નેતા તરીકે રાહુલ ગાંધીએ દેશમાં છેલ્લા કેટલાક સમયમાં થયેલા વિવિધ પેપર લીકની ઘટનાઓ અંગે એક રજૂઆત કરી હતી. કેન્દ્રીય મંત્રી નડ્ડાના આ નિવેદન બાદ હવે આ મામલે સરકાર તરફથી તપાસની દિશામાં કયા પગલાં લેવાય છે તેના પર સૌની નજર ટકેલી છે.