‘મોદીને કહો જ્ઞાનેશ કુમારને હટાવે, 30 સેકન્ડમાં આંદોલન બંધ થઈ જશે’: રાહુલ ગાંધી

દિલ્હીમાં 1 નવેમ્બરે યોજાનારી રાહુલ ગાંધીની પ્રસ્તાવિત રેલીને લઈને વેપારીઓમાં ચિંતા જોવા મળી રહી છે. દિવાળી સહિતના તહેવારોની સિઝનમાં બજારોમાં વધતા વેપારને ધ્યાનમાં રાખીને સદર બજાર બારી માર્કેટ ટ્રેડ એસોસિએશનના પ્રમુખ પરમજીત સિંહ પમ્માએ રાહુલ ગાંધી અને રેલીના આયોજકોને કાર્યક્રમની તારીખ પર પુનર્વિચાર કરવા અપીલ કરી છે. તેના જવાબમાં રાહુલ ગાંધીએ કહ્યું કે, “મોદીજીને કહો કે આરોપી નંબર 4 જ્ઞાનેશ કુમારને હટાવે, 30 સેકન્ડમાં આંદોલન બંધ થઈ જશે.”

તહેવારોના વેપાર પર અસર થવાની આશંકા

દિલ્હીના જથ્થાબંધ બજારોમાં દિવાળી સહિતના તહેવારો દરમિયાન મોટા પ્રમાણમાં વેપાર થાય છે. આ સમયગાળામાં ભેટ-સોગાદની વસ્તુઓ, સજાવટનો સામાન, કપડાં, ક્રોકરી અને અન્ય ચીજવસ્તુઓની માગ વધે છે. દેશના વિવિધ રાજ્યોમાંથી વેપારીઓ અને ગ્રાહકો ખરીદી માટે દિલ્હીના બજારોમાં આવે છે. પરમજીત સિંહ પમ્માના જણાવ્યા અનુસાર, રેલીના કારણે ટ્રાફિક ડાયવર્ઝન, રસ્તાઓ પર પ્રતિબંધો અને સુરક્ષા વ્યવસ્થામાં ફેરફાર થવાથી ગ્રાહકોને બજારો સુધી પહોંચવામાં મુશ્કેલી પડી શકે છે. તેના પરિણામે વેપારીઓને મોટું આર્થિક નુકસાન થવાની આશંકા છે.

સદર બજારથી ચાંદની ચોક સુધીના વેપારીઓની ચિંતા

સદર બજાર, ચાંદની ચોક, ખારી બાવલી, ફતેહપુરી અને આઝાદ માર્કેટ દિલ્હીનાં મુખ્ય વેપારી કેન્દ્રો છે. તહેવારો દરમિયાન આ બજારોમાં ખરીદી માટે મોટી સંખ્યામાં લોકોની અવરજવર રહે છે. વેપારીઓનું કહેવું છે કે તેઓ પહેલેથી જ ટ્રાફિક જામ, પાર્કિંગની સમસ્યા અને માલસામાનની હેરફેરમાં આવતી મુશ્કેલીઓનો સામનો કરી રહ્યા છે. આવા સમયે રેલીને કારણે વધારાના પ્રતિબંધો લાગશે તો દુકાનદારો ઉપરાંત કર્મચારીઓ, મજૂરો, ટ્રાન્સપોર્ટરો અને વેપાર સાથે સંકળાયેલા અન્ય લોકોની આજીવિકા પર પણ અસર પડી શકે છે. એસોસિએશનના પ્રમુખે વેપારીઓ અને સામાન્ય નાગરિકોના હિતને ધ્યાનમાં રાખીને રેલીની તારીખ બદલવા અથવા કાર્યક્રમ મુલતવી રાખવા અપીલ કરી છે.

વેપારીઓને રાહુલ ગાંધીનો સંદેશ

આ વિવાદ વચ્ચે રાહુલ ગાંધીએ વેપારીઓને સંબોધીને સોશિયલ મીડિયા પર સંદેશ આપ્યો હતો. તેમણે લખ્યું હતું કે, “દિલ્હીના દરેક વેપારીને: અમે તમને પ્રેમ કરીએ છીએ અને તમારી વાત સાંભળી રહ્યા છીએ.” રાહુલ ગાંધીએ દિલ્હીમાં મેટ્રો સેવા બંધ થવા, રસ્તાઓ સીલ થવા અને અવરજવર પર અસર પડવા માટે સરકારને જવાબદાર ઠેરવી હતી. તેમણે મત ચોરીના આરોપોનો ઉલ્લેખ કરતાં દાવો કર્યો હતો કે જો મત સુરક્ષિત નહીં હોય તો દુકાન, બચત અને બાળકોનું ભવિષ્ય પણ સુરક્ષિત રહી શકશે નહીં. રાહુલ ગાંધીએ વડાપ્રધાન નરેન્દ્ર મોદીને મુખ્ય ચૂંટણી કમિશનર જ્ઞાનેશ કુમારને હટાવવાની માગ કરી હતી. તેમના દાવા મુજબ, જો આ પગલું લેવામાં આવે તો 30 સેકન્ડમાં આંદોલન બંધ થઈ શકે છે.