પ્લે સ્કૂલના ટોઈલેટમાંથી મળ્યો 'સ્પાય કેમેરા', સંચાલક જ જોતાં હતા લાઈવ

દિલ્હીને અડીને આવેલા નોઈડાના ફેઝ-3 પોલીસ સ્ટેશન વિસ્તારમાં આવેલી 'પ્લે સ્કૂલ'ના ટોઈલેટમાં લગાવેલા બલ્બના હોલ્ડરમાં 'સ્પાય કેમેરા' મળી આવવાનો મામલો સામે આવ્યો છે. પોલીસે કેસ નોંધીને સ્કૂલના ડિરેક્ટર નવનીશ સહાયની ધરપકડ કરી છે. તપાસ દરમિયાન પોલીસને ખબર પડી કે તેણે 'સ્પાય કેમેરા' ઓનલાઈન મંગાવ્યો હતો.

બલ્બ હોલ્ડરમાંથી પ્રકાશ આવતો દેખાયો 

'પ્લે સ્કૂલ'ની એક શિક્ષિકાએ પોલીસને જણાવ્યું કે તે 10 ડિસેમ્બરે સ્કૂલના ટોયલેટમાં ગઈ હતી. આ દરમિયાન તેની નજર બલ્બના હોલ્ડર પર પડી હતી. તેણે  બલ્બના હોલ્ડરમાંથી પ્રકાશ આવતો જોયો તો તેને શંકા ગઈ. તેણે શાળાના ગાર્ડને બોલાવીને તેની તપાસ કરાવી અને તેમાં એક 'સ્પાય કેમેરા' લગાવેલ જોવા મળ્યો. તેણે આ અંગેની માહિતી શાળાના ડિરેક્ટર નવનીશ સહાયને આપી હતી. આરોપ છે કે તેણે આ અંગે ન તો કોઈ કાર્યવાહી કરી અને ન તો કોઈ જવાબ આપ્યો.

પીડિતાનો દાવો છે કે આ પહેલા પણ તેને સ્કૂલના ટોયલેટમાં એક 'સ્પાય કેમેરા' મળ્યો હતો, જે તેણે ડિરેક્ટરને આપ્યો હતો. ફરિયાદીનો દાવો છે કે જ્યારે તેણે સિક્યોરિટી ગાર્ડ સાથે વાત કરી તો તેણે કહ્યું કે ડિરેક્ટરે તેની પાસે જ આ કેમેરા લગાવડાવ્યો હતો.

ડિરેક્ટર મોબાઈલ અને કોમ્પ્યુટર પર લાઈવ જોતા હતા

પોલીસ તપાસમાં એ પણ સામે આવ્યું છે કે કેમેરામાં ન તો કોઈ ચિપ છે કે ન તો કોઈ રેકોર્ડિંગ. આરોપીએ પૂછપરછ દરમિયાન જણાવ્યું હતું કે કેમેરા માત્ર લાઈવ બતાવી શકે છે, આથી તે કેમેરાની મદદથી ટોઈલેટ જતી વ્યક્તિને કોમ્પ્યુટર અને મોબાઈલ દ્વારા લાઈવ જોતો હતો.

આરોપીએ એ પણ જણાવ્યું કે તેણે આ કેમેરા તાજેતરમાં જ ઓનલાઈન મંગાવ્યો હતો. કેમેરા બલ્બ હોલ્ડરમાં છુપાયેલો રહે છે જેથી કોઈ તેને સરળતાથી પકડી ન શકે. હાલ પોલીસ સિક્યુરિટી ગાર્ડની ભૂમિકા અંગે પણ તપાસ કરી રહી છે.