'પૂર્વી ભારતીય ચીની જેવા તો દક્ષિણના આફ્રિકી', સામ પિત્રોડાએ ફરી આપ્યું વિવાદિત નિવેદન

કોંગ્રેસના નેતા સામ પિત્રોડાએ થોડા દિવસો પહેલા સંસાધનોની પુનઃવિતરણ અને વારસાગત ટેક્સની વાત કરીને ચૂંટણી મધ્યે નવો મુદ્દો ઊભો કરી દીધો હતો. તેમના નિવેદનને મુદ્દો બનાવીને પીએમ મોદીએ કોંગ્રેસને આડેહાથ લીધી હતી. હવે ફરી એક વખત સામ પિત્રોડાએ કરેલી વાતચીતને પગલે કોંગ્રેસને ઝટકો લાગી શકે છે. સામ પિત્રોડાએ એક મીડિયા હાઉસ સાથે વાતચીત દરમિયાન ભારતીયોના દેખાવ અંગે વાંધાજનક ટિપ્પણી કરી હતી. તેમણે કહ્યું કે ઉત્તર-પૂર્વ ભારતના લોકો ચીની જેવા દેખાય છે. દક્ષિણ ભારતીયો આફ્રિકન જેવા છે અને ઉત્તર ભારતીયો કંઈક અંશે ગોરા છે. ભારતની વિવિધતાની વાત કરીએ તો સામ પિત્રોડાની આવી ટિપ્પણી નવો વિવાદ સર્જી શકે છે.
 
ઈન્ડિયન ઓવરસીઝ કોંગ્રેસના અધ્યક્ષ સામ પિત્રોડાએ કહ્યું, 'અમે અત્યાર સુધીની જેમ વિવિધતામાં એકતા જાળવી શકીએ છીએ. છેલ્લા 75 વર્ષોમાં આપણે એક સારું વાતાવરણ બનાવ્યું છે જ્યાં દરેક વ્યક્તિ રહી શકે. તેમણે કહ્યું, 'ભારત જેવા વૈવિધ્યસભર દેશને આપણે સાથે રાખી શકીએ છીએ. પૂર્વ ભારતના લોકો ચીન જેવા દેખાય છે. પશ્ચિમના લોકો આરબો જેવા દેખાય છે, ઉત્તરના લોકો ગોરા જેવા અને દક્ષિણ ભારતીયો આફ્રિકન જેવા દેખાય છે. કોઈ વાંધો નથી. આપણે બધા એક છીએ અને ભાઈ-બહેન છીએ. સેમ પિત્રોડાએ ધ સ્ટેટ્સમેનને આપેલા ઈન્ટરવ્યુમાં આ વાત કહી છે, જે હવે વાયરલ થઈ રહી છે.

https://twitter.com/ShivAroor/status/1788081821445759303
 
તેમણે કહ્યું કે ભારતના લોકો ભાષાકીય, ધાર્મિક અને ખાદ્ય વિવિધતાનું સન્માન કરે છે, જે દરેક પ્રદેશમાં બદલાય છે. હું ફક્ત આ ભારતમાં જ માનું છું. જ્યાં દરેક માટે જગ્યા હોય અને તેમને પોતાની રીતે જીવન જીવવાનો મોકો મળી રહ્યો છે. તેમણે એમ પણ કહ્યું કે ભારતના વિચારો લોકતંત્ર, સ્વતંત્રતા, ઉદારતાના છે, જેને આજે રામ મંદિર દ્વારા પડકારવામાં આવી રહ્યા છે. તેમણે કહ્યું કે પીએમ ઘણીવાર માત્ર મંદિરોમાં જ જાય છે. તેઓ માત્ર રાષ્ટ્રીય નેતાની જેમ વાત કરતા નથી પરંતુ ભાજપના નેતાની જેમ ચર્ચા પણ કરે છે.
 
સામ પિત્રોડાના ઈન્ટરવ્યુની આ ક્લિપ સોશિયલ મીડિયા પર વાયરલ થઈ રહી છે. તેમના નિવેદન પર  આસામના સીએમ હિમંતા બિસ્વા સરમાએ પણ ટિપ્પણી કરી છે. તેણે કહ્યું, 'સામ ભાઈ, હું પૂર્વોત્તરનો છું અને ભારતીય દેખાઉં છું. અમે વિવિધતામાં માનીએ છીએ. આપણે ભલે જુદા દેખાઈએ, પણ આપણે બધા એક છીએ. અમારા દેશ વિશે થોડું તો સમજી લો. જણાવી દઈએ કે, વારસાગત વેરાના મામલામાં સામ પિત્રોડા એટલા ઘેરાયા હતા કે કોંગ્રેસે તેમના નિવેદનથી દૂરી લીધી હતી.