EDના પૂર્વ ડેપ્યુટી ડિરેક્ટરની રાજકીય એન્ટ્રી, અમૃતપાલની પાર્ટીમાં જોડાયા; પૂર્વ DSP સેખોં પણ સાથે આવ્યા
છેલ્લું અપડેટ : 23 Sept 2026
એન્ફોર્સમેન્ટ ડિરેક્ટોરેટ (ED)ના પૂર્વ ડેપ્યુટી ડિરેક્ટર નિરંજન સિંહ અને પૂર્વ ડીએસપી બલવિંદર સેખોં બુધવારે ‘અકાલી દલ વારિસ પંજાબ દે’માં જોડાયા છે. બંનેએ ચંદીગઢમાં અમૃતપાલના પિતા તરસેમ સિંહ અને ધારાસભ્ય મનપ્રીત અયાલીની ઉપસ્થિતિમાં પાર્ટીનું સભ્યપદ ગ્રહણ કર્યું હતું. ઉલ્લેખનીય છે કે, પંજાબના ખડૂર સાહિબના સાંસદ અમૃતપાલ સિંહ ‘અકાલી દલ વારિસ પંજાબ દે’ના વડા છે.
મજીઠિયા મંત્રી હતા ત્યારે પૂર્વ ED અધિકારી તેમની પૂછપરછ કરી ચૂક્યા છે
નિરંજન સિંહ EDમાં ફરજ દરમિયાન ઘણા હાઈ-પ્રોફાઇલ અને ચર્ચિત કેસોની તપાસનો હિસ્સો રહ્યા છે. તેમણે ડ્રગ્સ કેસમાં શિરોમણી અકાલી દલના નેતા બિક્રમ સિંહ મજીઠિયાની પણ પૂછપરછ કરી હતી. આ કેસની પૂછપરછ દરમિયાન જ નિરંજન સિંહની બદલી કરવામાં આવતાં તે સમયે ભારે રાજકારણ ગરમાયું હતું.
વાસ્તવમાં, નિરંજન સિંહે પંજાબના ચર્ચિત કરોડો રૂપિયાના સિન્થેટિક ડ્રગ રેકેટ એટલે કે ભોલા ડ્રગ કેસમાં મની લોન્ડરિંગની ઊંડાણપૂર્વક તપાસ કરી હતી. આ સંદર્ભમાં તેમણે પૂછપરછ માટે પંજાબના પૂર્વ મહેસૂલ મંત્રી બિક્રમ સિંહ મજીઠિયાને પણ સમન્સ પાઠવ્યા હતા.
રાજકારણમાં પ્રવેશ અંગે શું બોલ્યા નિરંજન સિંહ?
EDના પૂર્વ ડેપ્યુટી ડિરેક્ટર નિરંજન સિંહે કહ્યું, “રાજકારણમાં આવવાનો મારો કોઈ વિચાર નહોતો, પરંતુ આજે પંજાબની સ્થિતિ બદથી બદતર થઈ ગઈ છે. આજે અને પહેલાં પણ રાજ એ લોકો ચલાવી રહ્યા છે જેઓ માફિયા ચલાવી રહ્યા છે. પંજાબમાં આજે ભ્રષ્ટાચારની હદ વટાવી ગઈ છે. પંજાબમાં સિંચાઈ કૌભાંડ થયું હતું, પરંતુ આ સરકાર આવ્યા પછી પણ કોઈ કાર્યવાહી કરવામાં આવી નથી.”
તેમણે આગળ કહ્યું, “વારિસ પંજાબ દે ઘણા સમયથી ડ્રગ્સ સામે લડી રહ્યું છે. પરંતુ તેમને સમગ્ર પંજાબના સમર્થનની જરૂર છે. આ કોઈ ધાર્મિક સંગઠન નથી પરંતુ સૌનું સંગઠન છે. મારો કોઈ અંગત સ્વાર્થ નથી, હું તેમનું સમર્થન કરવા અહીં આવ્યો છું. હું ડ્રગ્સ અને ભ્રષ્ટાચાર સામે કામ કરીશ. જો સરકાર બનશે તો ડ્રગ્સ માફિયા અને અન્ય માફિયાઓએ પંજાબ છોડવું પડશે.”
'EDના 3 ડિરેક્ટરોએ મને મજીઠિયા કેસમાં તપાસ કરવા ન દીધી'
નિરંજન સિંહે આક્ષેપ કર્યો કે, “EDના ૩ ડિરેક્ટરોએ મને બિક્રમ મજીઠિયા કેસમાં તપાસ કરવા દીધી નહોતી. જ્યારે ભારત સરકાર પોતે જ ઇચ્છતી નહોતી કે તપાસ થાય, તો હું કેવી રીતે તપાસ કરી શકું? મેં આ અંગે સરકારને પત્રો પણ લખ્યા હતા. એવી કોઈ સરકાર નથી જે EDનો દુરુપયોગ ન કરતી હોય.”
