VIDEO: ગ્લોબલ સાઉથના અપમાન પર પીએમ મોદીની સિંહગર્જના! BRICS મંચ પરથી કરી દીધી મોટી જાહેરાત!
છેલ્લું અપડેટ : 12 Sept 2026
બ્રિક્સ સમિટ 2026 (BRICS Summit 2026) માં વડાપ્રધાન નરેન્દ્ર મોદીએ વૈશ્વિક શાસન (Global Governance) ની વર્તમાન વ્યવસ્થા પર આકરા પ્રહારો કરતા વૈશ્વિક સ્તરે મોટા પરિવર્તનની માંગ કરી છે. તેમણે ગ્લોબલ સાઉથ (વિકાસશીલ દેશો) ની અવગણના સામે અવાજ ઉઠાવતા જણાવ્યું કે, વર્તમાન વૈશ્વિક વ્યવસ્થા 'પ્રિવિલેજની પિરામિડ' સમાન છે, જેને બદલીને 'પાર્ટનરશિપ પ્લેટફોર્મ' બનાવવી અનિવાર્ય છે.
વડાપ્રધાન મોદીએ શિખર સંમેલનમાં કહ્યું કે, આજે ગ્લોબલ સાઉથ વૈશ્વિક કટોકટીઓની પહેલી હરોળમાં ઊભો છે, પરંતુ નિર્ણય લેવાની પ્રક્રિયામાં તે સૌથી પાછળ છે. આ અસંતુલનને દૂર કરવા માટે તેમણે વૈશ્વિક શાસન સુધારણા માટે 10 પ્રસ્તાવો સંયુક્ત રીતે તૈયાર કરી આગામી સમિટ સુધીમાં તેને 'બ્રિક્સ સુધારણા રોડમેપ' (BRICS Reform Roadmap) નું સ્વરૂપ આપવાનો પ્રસ્તાવ મૂક્યો હતો.
આ રોડમેપ તૈયાર કરવા માટે તેમણે ત્રણ મુખ્ય પાસાંઓ પર ભાર મૂક્યો છે: પ્રતિનિધિત્વ (Representation), જવાબદારી (Responsiveness) અને નિયમ નિર્માણ (Rule-making).
પ્રતિનિધિત્વ અંગે વાત કરતાં પીએમ મોદીએ સ્પષ્ટ કર્યું કે સંયુક્ત રાષ્ટ્ર સુરક્ષા પરિષદ (UNSC) માં સુધારા હવે વધુ લાંબા સમય સુધી ટાળી શકાય તેમ નથી. આ બાબતે વાટાઘાટો ચોક્કસ સમયમર્યાદા અને સ્પષ્ટ પરિણામો સાથે જોડાયેલી હોવી જોઈએ. આ ઉપરાંત, આંતરરાષ્ટ્રીય નાણાકીય સંસ્થાઓમાં મતદાન શક્તિ, નેતૃત્વના પદો અને નીતિગત પ્રાથમિકતાઓ આજના આર્થિક વાસ્તવિકતાઓ સાથે સુસંગત હોવી જરૂરી છે. વૈશ્વિક આર્થિક વિકાસને વેગ આપતા દેશોએ વૈશ્વિક આર્થિક શાસનને આકાર આપવામાં પણ યોગ્ય ભૂમિકા ભજવવી જોઈએ.
બ્રિક્સ સંગઠનને વધુ મજબૂત અને કાર્યક્ષમ બનાવવા માટે પીએમ મોદીએ આગામી 20 વર્ષ માટે એક નવો અને મહત્ત્વાકાંક્ષી એજન્ડા રજૂ કર્યો છે. તેમણે જણાવ્યું કે સંસ્થાકીય ગતિશીલતા જાળવી રાખવા માટે બ્રિક્સની અધ્યક્ષતા દર વર્ષે બદલાતી હોવા છતાં તેની સંગઠનાત્મક ગતિમાં કોઈ અડચણ ન આવવી જોઈએ. આ માટે તેમણે 'ટ્રાઇકા' (Troika) વ્યવસ્થા દ્વારા તમામ પહેલો અને પરિણામોના ફોલો-અપ માટે 'બ્રિક્સ સાતત્ય અને અમલીકરણ મિકેનિઝમ' (BRICS Continuity and Implementation Mechanism) ની સ્થાપના કરવાનો પ્રસ્તાવ મૂક્યો છે. સાથે જ, દરેક નિર્ણય સાથે જોડાયેલ નોડલ પોઈન્ટ, સમયમર્યાદા અને અમલીકરણની સ્થિતિની નોંધ કરવા માટે એક સુરક્ષિત ડિજિટલ રિપોઝીટરી બનાવવાની પણ હિમાયત કરી હતી.
વડાપ્રધાને ભારપૂર્વક જણાવ્યું કે, વર્તમાન વૈશ્વિક શાસનનું માળખું એક પિરામિડ જેવું છે, જ્યાં સત્તા અને નિર્ણય લેવાની તાકાત ટોચ પર કેન્દ્રિત છે, જ્યારે નીચેના સ્તરે એવા દેશો છે જે આ નિર્ણયોથી પ્રભાવિત થાય છે પરંતુ તેને આકાર આપવામાં અસમર્થ છે. આ અસમાન માળખાને બદલીને દરેક રાષ્ટ્રને સમાન અવાજ અને ભાગીદારી મળે તે દિશામાં આગળ વધવું પડશે.
