હવે દિલ્હીમાં મનફાવે તેમ નહીં યોજી શકાય રેલીઓ, પોલીસની નવી SOPમાં અનેક નિયમો

દેશની રાજધાની દિલ્હીમાં ધરણા-પ્રદર્શન અને મોટી રેલીઓના આયોજનને લઈને ટૂંક સમયમાં જ કડક નિયમો લાગુ થવા જઈ રહ્યા છે. સૂત્રો પાસેથી મળતી માહિતી મુજબ, દિલ્હી પોલીસે રામલીલા મેદાન સહિત અન્ય સ્થળો પર યોજાતી જનસભાઓ અને પ્રદર્શનોને વ્યવસ્થિત કરવા માટે એક નવી સ્ટાન્ડર્ડ ઓપરેટિંગ પ્રોસિજર (SOP) તૈયાર કરી છે. હાલમાં આ નવા નિયમોનો ડ્રાફ્ટ મંજૂરી માટે પોલીસ હેડક્વાર્ટર ખાતે મોકલવામાં આવ્યો છે. એકવાર મંજૂરી મળી ગયા બાદ, દિલ્હીના તમામ પ્રદર્શન સ્થળો પર આ નવી ગાઇડલાઇનનો ચુસ્તપણે અમલ કરવામાં આવશે. તાજેતરમાં થયેલા વિવિધ આંદોલનોને ધ્યાનમાં રાખીને સુરક્ષા અને કાયદો-વ્યવસ્થા જાળવવા માટે આ પગલું લેવામાં આવી રહ્યું છે.

રામલીલા મેદાનમાં મનમાની ભીડ પર લાગશે અંકુશ

નવા પ્રસ્તાવિત નિયમોને મંજૂરી મળ્યા બાદ હવે રામલીલા મેદાનમાં આયોજકો પોતાની મરજી મુજબ બેફામ ભીડ એકઠી કરી શકશે નહીં. દિલ્હી પોલીસની નવી SOP મુજબ, રામલીલા મેદાનમાં એક સમયે મહત્તમ 50 હજાર લોકોને જ એકઠા થવાની પરવાનગી આપવામાં આવશે. જોકે, કોઈપણ કાર્યક્રમમાં કેટલા લોકો સામેલ થઈ શકશે તેનો અંતિમ નિર્ણય કાર્યક્રમનું સ્વરૂપ અને સુરક્ષા વ્યવસ્થાની સમીક્ષા કર્યા બાદ ઉચ્ચ અધિકારીઓ દ્વારા લેવામાં આવશે, એટલે કે જરૂર જણાય તો 50 હજારથી ઓછી સંખ્યાની પણ મંજૂરી મળી શકે છે.

પ્રદર્શન માટે સમય, અરજી અને સુરક્ષાના નવા નિયમો

પોલીસ દ્વારા તૈયાર કરાયેલા ડ્રાફ્ટમાં આયોજકો માટે કેટલીક મહત્ત્વની શરતો મૂકવામાં આવી છે. હવે કોઈપણ ધરણા કે પ્રદર્શન માટે આયોજકોએ ઓછામાં ઓછા 10 દિવસ અગાઉ અરજી કરવાની રહેશે અને 'વેન્યુ અવેલેબિલિટી સર્ટિફિકેટ' લેવું ફરજિયાત બનશે. આ ઉપરાંત, પ્રદર્શનનો સમય પણ નક્કી કરી દેવામાં આવ્યો છે, જે મુજબ માત્ર સવારે 10 વાગ્યાથી સાંજના 5 વાગ્યા સુધી જ કાર્યક્રમ યોજી શકાશે.

આયોજકોએ ટ્રાફિક અને પાર્કિંગની વ્યવસ્થા માટે પોલીસ સાથે સંકલન સાધવું પડશે. નવા નિયમોમાં સ્પષ્ટ જણાવાયું છે કે રસ્તા, ફૂટપાથ કે ઈમરજન્સી રૂટ બ્લોક કરવાની મંજૂરી નહીં મળે. તેમજ હથિયારો, જ્વલનશીલ પદાર્થો અને પ્રતિબંધિત વસ્તુઓ લઈ જવા પર સંપૂર્ણ પ્રતિબંધ રહેશે, જ્યારે ડ્રોન ઉડાડવા માટે પણ અગાઉથી મંજૂરી લેવી પડશે.

સ્થાનિક લોકોની સુવિધા અને ટ્રાફિક નિયંત્રણનો મુખ્ય હેતુ

ઐતિહાસિક રીતે દિલ્હીનું રામલીલા મેદાન મોટા આંદોલનો અને રાજકીય રેલીઓનું મુખ્ય કેન્દ્ર રહ્યું છે. પરંતુ, અહીં ભેગી થતી વિશાળ ભીડને કારણે આસપાસના વિસ્તારોમાં ભારે ટ્રાફિક સર્જાય છે, જેનાથી સ્થાનિક રહેવાસીઓને ભારે હાલાકી ભોગવવી પડે છે અને કાયદો-વ્યવસ્થા જાળવવામાં પણ મુશ્કેલી ઊભી થાય છે. આ તમામ સમસ્યાઓના કાયમી ઉકેલ માટે દિલ્હી પોલીસે આ વ્યવસ્થિત માળખું તૈયાર કર્યું છે. પોલીસ હેડક્વાર્ટરની મંજૂરીની મહોર વાગતા જ દિલ્હીમાં ધરણા-પ્રદર્શનનો નવો તબક્કો આ કડક નિયમો સાથે શરૂ થશે.