‘મત ચોરી સામે મૌન નહીં’: મમતા બેનર્જીએ INDIA ગઠબંધનના 1 નવેમ્બરના ‘ચલો દિલ્હી’ માર્ચને આપ્યું સમર્થન
દેશમાં કથિત મત ચોરી અને ચૂંટણી પ્રક્રિયામાં અનિયમિતતાઓના મુદ્દે વિપક્ષી INDIA ગઠબંધને કેન્દ્ર સરકાર સામે મોરચો ખોલ્યો છે. પશ્ચિમ બંગાળનાં પૂર્વ મુખ્યમંત્રી અને તૃણમૂલ કોંગ્રેસનાં નેતા મમતા બેનર્જીએ આગામી 1 નવેમ્બરે દિલ્હીના રામલીલા મેદાનમાં યોજાનારી ‘ચલો દિલ્હી રામલીલા માર્ચ’ને સમર્થન આપ્યું છે. તેમણે વિદ્યાર્થીઓ, યુવાનો, મહિલાઓ, કામદારો અને નાગરિક સમાજના સભ્યોને આ વિરોધ પ્રદર્શનમાં જોડાવા અપીલ કરી છે.
‘મત પર જોખમ હોય ત્યારે મૌન રહેવું વિકલ્પ નથી’
મમતા બેનર્જીએ સોશિયલ મીડિયા પ્લેટફોર્મ X પર પોસ્ટ કરીને જણાવ્યું કે, જ્યારે મતદાનના અધિકાર પર જોખમ ઊભું થાય ત્યારે મૌન રહેવું કોઈ વિકલ્પ નથી. તેમણે લોકોને લોકશાહીનું રક્ષણ કરવા અને બંધારણને બચાવવા માટે એકજૂથ થવાની અપીલ કરી હતી. તેમણે ઇલેક્ટ્રોનિક વોટિંગ મશીન (EVM), મતદારોના ડેટા, મતદાર યાદીઓ અને મતગણતરીની પ્રક્રિયા અંગે પણ સવાલો ઉઠાવ્યા હતા. મમતા બેનર્જીના જણાવ્યા અનુસાર, કથિત મત ચોરી સામેની લડાઈ દરેક ભારતીયના મતદાન અને પોતાની પસંદગી વ્યક્ત કરવાના અધિકારના રક્ષણ માટેની લડાઈ છે. તેમણે પશ્ચિમ બંગાળ સહિત અન્ય રાજ્યોમાં મત ચોરીના લગાવવામાં આવેલા આરોપો અંગે જવાબદારી નક્કી કરવાની માંગ પણ કરી હતી.
રાહુલ ગાંધીએ પણ લોકોને જોડાવા કરી અપીલ
કોંગ્રેસના નેતા અને લોકસભામાં વિપક્ષના નેતા રાહુલ ગાંધીએ પણ 1 નવેમ્બરના માર્ચમાં ભાગ લેવા લોકોને અપીલ કરી છે. સોશિયલ મીડિયા પર જાહેર કરેલા વીડિયો સંદેશમાં તેમણે જણાવ્યું હતું કે આ માર્ચ કોઈ એક રાજકીય પક્ષનો કાર્યક્રમ નથી, પરંતુ લોકશાહી અને બંધારણનું રક્ષણ કરવા ઇચ્છતા તમામ નાગરિકોનો સામૂહિક પ્રયાસ છે. રાહુલ ગાંધીએ લોકોને નિર્ભય બનીને માર્ચમાં જોડાવા જણાવ્યું હતું. તેમણે પોલીસ કાર્યવાહી કે લાઠીચાર્જની સંભાવનાથી ડર્યા વિના લોકશાહી અને બંધારણના રક્ષણ માટે આગળ આવવાની અપીલ કરી હતી. તેમણે વિદ્યાર્થી સંગઠનોને પણ પક્ષીય વિચારધારાથી ઉપર ઊઠીને આ વિરોધમાં જોડાવા કહ્યું હતું. જે વિદ્યાર્થીઓને લાગે છે કે તેમની અભિવ્યક્તિની સ્વતંત્રતા, વિચારો અને વિચારવાની રીત પર હુમલો થઈ રહ્યો છે, તેમને પણ માર્ચમાં ભાગ લેવા આમંત્રણ આપ્યું હતું.
રામલીલા મેદાનમાં શક્તિપ્રદર્શનની તૈયારી
દિલ્હીના રામલીલા મેદાનમાં યોજાનારી આ રેલી માટે INDIA ગઠબંધન દ્વારા તૈયારીઓ કરવામાં આવી રહી છે. મત ચોરીના આરોપો ઉપરાંત મતદાર યાદીઓની વિશેષ સઘન સુધારણા પ્રક્રિયા (SIR) અને મુખ્ય ચૂંટણી કમિશનર જ્ઞાનેશ કુમારના મુદ્દાને પણ વિપક્ષ ઉઠાવવાની તૈયારીમાં છે. રેલી પહેલાં વિપક્ષી સાંસદો દ્વારા મોક પાર્લામેન્ટ યોજવાની પણ યોજના છે. આ કાર્યક્રમમાં મુખ્ય ચૂંટણી કમિશનર જ્ઞાનેશ કુમાર સામે પ્રતીકાત્મક રીતે મહાભિયોગની કાર્યવાહી કરવાનો પ્રયાસ કરવામાં આવશે. કોંગ્રેસ અધ્યક્ષ મલ્લિકાર્જુન ખડગે INDIA ગઠબંધનના સાંસદો સાથે બેઠક યોજી રહ્યા છે. આ બેઠક અને મોક પાર્લામેન્ટ બાદ 1 નવેમ્બરે રામલીલા મેદાનમાં રેલી યોજાશે, જેમાં વિપક્ષ ચૂંટણી પ્રક્રિયાની પારદર્શિતા અને મતદારોના અધિકારોને લગતા મુદ્દાઓ ઉઠાવશે.
