VIDEO: મુંબઈમાં લાંબા સમયના સૂકા વાતાવરણ બાદ રવિવારે મોસમનો પ્રથમ સારો વરસાદ
છેલ્લું અપડેટ : 22 Jun 2026
મુંબઈમાં લાંબા સમયના સૂકા વાતાવરણ બાદ રવિવારે મોસમનો પ્રથમ સારો વરસાદ નોંધાયો છે, જેના કારણે શહેરના અનેક વિસ્તારોમાં પાણી ભરાઈ ગયા છે. વાંદરા ઈસ્ટ વિસ્તારમાં ભારે વરસાદના પગલે રસ્તાઓ પર પાણી ભરાઈ જવાથી સામાન્ય જનજીવન પ્રભાવિત થયું છે. અચાનક થયેલા વરસાદને કારણે રસ્તાઓ પર પાણી ફરી વળતા વાહનચાલકોને ભારે હાલાકીનો સામનો કરવો પડ્યો હતો જેથી ટ્રાફિકની ગતિ પણ ધીમી પડી ગઈ હતી. હવામાન વિભાગ દ્વારા મુંબઈમાં આગામી ૨૨ અને ૨૩ જૂન માટે યલો એલર્ટ જાહેર કરવામાં આવ્યું છે. વિભાગના જણાવ્યા અનુસાર, વરસાદની સાથે વીજળીના કડાકા અને ૩૦ થી ૪૦ કિમી પ્રતિ કલાકની ઝડપે પવન ફૂંકાવાની શક્યતા છે. શહેરમાં ઘણા દિવસોથી ગરમી અને બફારાનું પ્રમાણ વધુ હતું પરંતુ હવે ચોમાસું સક્રિય થતા લોકોને રાહત મળી છે. મ્યુનિસિપલ કોર્પોરેશન દ્વારા નીચાણવાળા વિસ્તારોમાં ભરાયેલા પાણીના નિકાલ માટેની કામગીરી હાથ ધરવામાં આવી રહી છે. મુંબઈગરાઓને સલામત રહેવા અને બિનજરૂરી મુસાફરી ટાળવાની સૂચના આપવામાં આવી છે.
