શપથ લીધા બાદ મેલોનીના આમંત્રણ પર ઈટલી જશે મોદી, જાણો અન્ય કયા દેશોની લેશે મુલાકાત

9 જૂને ત્રીજી વખત વડાપ્રધાન પદના શપથ લીધા બાદ નરેન્દ્ર મોદી તેમની પહેલી વિદેશ યાત્રા પર ઈટલી જવા રવાના થશે. વડાપ્રધાન મોદીએ જી-7 સમિટમાં ભાગ લેવા માટે ઈટલીના પીએમ જ્યોર્જિયા મેલોનીનું આમંત્રણ સ્વીકાર્યું છે. 13થી 15 જૂન દરમિયાન ઈટલીમાં G7 દેશોની સમિટ યોજાશે. મીડિયા રિપોર્ટ્સ અનુસાર, વિદેશ મંત્રાલયે એક નિવેદનમાં કહ્યું કે, મોદીએ ગુરુવારે ઈટાલિયન પીએમ મેલોની સાથે વાત કરી અને ઈટલીના પુગલિયામાં આયોજિત થનારી G7 સમિટના આઉટરીચ સત્રમાં આમંત્રણ આપવા બદલ તેમનો આભાર માન્યો.

G7ની અધ્યક્ષતા કરી રહ્યું છે ઈટલી

ઉલ્લેખનીય છે કે, આ વર્ષે ઈટલીને G7નું અધ્યક્ષ મળ્યું છે. આ સમિટમાં વૈશ્વિક આર્થિક પરિદ્રશ્ય, આંતરરાષ્ટ્રીય વેપાર, જળવાયુ પરિવર્તન અને રશિયા-યુક્રેન યુદ્ધની અસરો, ઈઝરાયેલ અને હમાસ વચ્ચેના સંઘર્ષ જેવા મહત્ત્વના મુદ્દાઓ પર ધ્યાન કેન્દ્રિત કરવામાં આવશે. G7 દેશોમાં કેનેડા, ફ્રાન્સ, જર્મની, ઈટલી, જાપાન, યુકે અને યુએસ સામેલ છે, જેમાં યુરોપિયન યુનિયન ગેસ્ટ તરીકે ચર્ચામાં ભાગ લે છે. તેમની મુલાકાત દરમિયાન પીએમ મોદી અમેરિકી રાષ્ટ્રપતિ અને અન્ય G7 નેતાઓ સાથે મુલાકાત કરશે.

ભારતનું વ્યસ્ત ડિપ્લોમેટિક શેડ્યૂલ

મીડિયા રિપોર્ટ્સ અનુસાર, શપથ ગ્રહણ સમારોહ પૂરો થયા બાદ ભારતનો ડિપ્લોમેટિક કાર્યક્રમ ખૂબ જ વ્યસ્ત રહેવાનો છે. G-7 પહેલા વિદેશ મંત્રી ઓક્ટોબરમાં યોજાનારી BRICS સમિટની તૈયારી માટે રશિયામાં 11 જૂને BRICS વિદેશ મંત્રીઓની બેઠકમાં ભાગ લેશે. ભારતીય વડાપ્રધાન જૂનના છેલ્લા સપ્તાહમાં બાંગ્લાદેશના વડાપ્રધાન શેખ હસીનાની યજમાની કરશે, ત્યારબાદ જુલાઈમાં કઝાકિસ્તાનમાં SCO સમિટમાં ભાગ લેશે, જ્યાં ચૂંટણી પછી ચીનના રાષ્ટ્રપતિ શી જિનપિંગને મળવાની સંભાવના છે.

યુક્રેનને આશા છે કે ભારત શાંતિ શિખર સમ્મેલનમાં ભાગ લેશે

યુક્રેનના રાષ્ટ્રપતિ વોલોડીમિર ઝેલેન્સકીએ વડાપ્રધાન નરેન્દ્ર મોદીને ચૂંટણીમાં જીત મેળવ્યા બાદ તેમના અભિનંદન સંદેશમાં નવી દિલ્હીને આગામી શાંતિ સમિટમાં ભાગ લેવાની અપીલ કરી છે. ઝેલેન્સકીએ વૈશ્વિક બાબતોમાં ભારતની મહત્ત્વપૂર્ણ ભૂમિકા અને સ્થાયી શાંતિ હાંસલ કરવા માટે સામૂહિક પ્રયાસોના મહત્ત્વ પર પ્રકાશ પાડ્યો હતો. વડાપ્રધાન મોદીએ જવાબમાં, વૈશ્વિક શાંતિની હિમાયત કરવા માટે ભારતની પ્રતિબદ્ધતાને પુષ્ટિ કરી છે. જોકે, એ સ્પષ્ટ નથી કે પીએમ મોદી સ્વિટ્ઝર્લેન્ડના બર્ગેનસ્ટોકમાં યોજાનારી યુક્રેન શાંતિ સમિટમાં ભાગ લેશે કે નહીં. માર્ચમાં, યુક્રેનના વિદેશ પ્રધાન દિમિત્રો કુલેબાએ નવી દિલ્હીની મુલાકાત લીધી અને ભારતીય વિદેશ પ્રધાન એસ. જયશંકરને મળ્યા. તેમની વાતચીત દરમિયાન, કુલેબાએ શાંતિ સમિટમાં ભાગ લેવા માટે ભારતની વિનંતીનો પુનરોચ્ચાર કર્યો અને ભારપૂર્વક જણાવ્યું કે, ભારત મહત્ત્વપૂર્ણ ભૂમિકા ભજવી શકે છે. જોકે, જયશંકરે કુલેબાની અપીલ પર જાહેરમાં ટિપ્પણી કરી ન હતી, આ બાબતે ભારતની સ્થિતિ અસ્પષ્ટ બનેલી છે.