કેન્દ્રીય મંત્રી જ્યોતિરાદિત્ય સિંધિયાની માતા 'માધવી રાજે સિંધિયા'નું નિધન, દિલ્હી AIIMSમાં હતા દાખલ 

કેન્દ્રીય મંત્રી જ્યોતિરાદિત્ય સિંધિયાના માતા માધવી રાજે સિંધિયાનું ગુરુવારે સવારે AIIMSમાં નિધન થયું હતું. સવારે 9.28 કલાકે તેમણે અંતિમ શ્વાસ લીધા હતા. સિંધિયા પરિવારની રાજમાતા છેલ્લા કેટલાક દિવસોથી દિલ્હી AIIMSમાં વેન્ટિલેટર પર હતા.

માધવી રાજે છેલ્લા ત્રણ મહિનાથી દિલ્હીની એક મોટી હોસ્પિટલમાં સારવાર હેઠળ હતા અને ન્યુમોનિયા તેમજ સેપ્સિસથી પીડિત હતા. તાજેતરમાં, ત્રીજા તબક્કાના મતદાન (ગુના લોકસભા) પહેલા,  બગાડતા તેમને દિલ્હી AIIMSમાં દાખલ કરવામાં આવ્યા હતા. દિલ્હીમાં તેમના મૃત્યુ બાદ માધવી રાજેના પાર્થિવ દેહને અંતિમ સંસ્કાર માટે મધ્ય પ્રદેશના ગ્વાલિયર લાવવામાં આવશે.

ચૂંટણી પ્રચાર અધવચ્ચે છોડીને દિલ્હી જવું પડ્યું હતું.

છેલ્લા કેટલાક મહિનાઓથી દિલ્હીની એક હોસ્પિટલમાં સારવાર લઈ રહેલા માધવી રાજે સિંધિયાની તબિયત નાજુક તબક્કામાં પહોંચી ગઈ હતી. ગુના સંસદીય ક્ષેત્રના ભાજપના ઉમેદવાર જ્યોતિરાદિત્ય સિંધિયા સાથે તેમની પત્ની પ્રિયદર્શિની રાજે અને પુત્ર મહાઆર્યમન સિંધિયાએ ચૂંટણી પ્રચાર અધવચ્ચે છોડીને દિલ્હી જવું પડ્યું હતું.

કેન્દ્રીય મંત્રી જ્યોતિરાદિત્ય સિંધિયા અને તેમની પત્ની અને પુત્ર ચૂંટણી પ્રચાર દરમિયાન છેલ્લા એક મહિનાથી ગુના-અશોકનગર અને શિવપુરીમાં હતા. દરમિયાન, કેન્દ્રીય પ્રધાનની માતા માધવી રાજે સિંધિયાની તબિયતમાં સતત ઉતાર-ચઢાવના અહેવાલો આવ્યા હતા.

નેપાળના રાજવી પરિવારની રાજકુમારી હતા

વર્ષ 1966માં નેપાળના રાજવી પરિવારની રાજકુમારી માધવીના લગ્ન ગ્વાલિયરના મહારાજા જ્યોતિરાદિત્ય સિંધિયાના પિતા માધવરાવ સિંધિયા સાથે થયા હતા. નોંધનીય છે કે 30 સપ્ટેમ્બર, 2001ના રોજ કોંગ્રેસના તત્કાલિન નેતા માધવરાવ સિંધિયાનું મૈનપુરી (યુપી) પાસે વિમાન દુર્ઘટનામાં મૃત્યુ થયું હતું.